ކ މާފުށީގައި އެމްޑީޕީގެ ވަރުގަދަ އެކްޓިވިސްޓުންގެ ގޮތުގައި ފާހަގަ ކުރެވޭ ދެ މީހަކު ހިމެނޭހެން ޕީޕީއެމް އާއި 6 މީހަކު ގުޅިއްޖެއެވެ.

ރޭ މާފުށީގައި ބޭއްވުނު ރަސްމިއްޔާތެއްގައި ޕީޕީއެމް އަށް ސޮއިކުރި މީހުންގެ ތެރޭގައި އެރަށުގެ ބޮޑެތި ވިޔަފާރިވެރިންވެސް ހިމެނެއެވެ. އެ ހަމީހުންވެސް ވަނީ ރޭގެ ރަސްމިއްޔާތުގައި އެމީހުން ޕީޕީއެމް އަށް ސޮއިކުރި ފޯމް މިވަގުތު ޕީޕީއެމް ކޯލިޝަން ހިންގުމާއި ހަވާލުވެ ހުރި ޢަބްދުރަޙީމް ޢަބްދުالله އާއި ހަވާލުކޮށްފައެވެ.

މިރަސްމިއްޔާތުގައި ޕީޕީއެމް ޕީއެންސީ ކޯލިޝަންގެ ފަރާތުން ގުރައިދޫ ދާއިރާގެ މަޖިލްސް ގޮނޑިއަށް ވާދަކުރައްވާ ހުސެއިން ރިޒާ ބައިވެރިވެފައި ވެއެވެ. އަދި ހުސެއިން ރިޒާ ވަނީ މިރަސްމިއްޔާތުގައި ވާހަކަ ދައްކައިފައެވެ.

Advertisement

ހުސެއިންގެ ވާހަކައިގައި ވިދާޅުވީ ޕީޕީއެމް އިން ރަށްރަށަށް ދަނީ ބަހާނެ އެއްޗެއް ހިފައިގެން ނޫން ކަމަށެވެ. އަދި ޕާޓީއިން އޭނާ އާއި ހަވާލުކުރި ޒިންމާއަކީ އެނާގެ ބޭބެގެ ލެގަސީ ދެމެހެއްޓުން ކަމަށާއި، އެ އޯގާތެރިކަމާއި، އެ ހިތްހެޔޮކަމާއި، އެ ރީތި ސިފަތައް ދެމެހެއްޓުން ކަމަށެވެ.

މި ރަސްމިއްޔާތުގައި ޕާޓީއަށް އަލަށް ގުޅުނު މާފުށީ މީހުންގެ ތެރެއިން ވާހަކަ ދެއްކި އަލީ ރަމީޒް ބުނެފައިވަނީ އޭނާ ޕީޕީއެމް އާއި ގުޅުނީ ރައީސް ޔާމީނަށް ލިބެމުންދާ އަނިޔާތަކުން ސަލާމަތްކުރުމަށް އެހީތެރި ވުމަށް ކަމަށެވެ.

ރޭގެ ރަސްމިއްޔާތުގައި ޕީޕީއެމް އަށް އަލަށް ގުޅުނު މީހުންގެ ތެރޭގައި އެރަށުގެ ކުރީގެ ކައުންސިލަރަކުވެސް ހިމެނެއެވެ. އަލަށް ގުޅުނު ހަމީހުންނާއި އެކު އެ މީހުންގެ އާއިލާގެ ވެސް ގިނަ ބަޔަކު ވަނީ ޕީޕީއެމް އާއި ގުޅިފައެވެ.

ހުސްވެފައިވާ ގުރައިދޫ ދާއިރާގެ ގޮނޑިއަށް ވާދަކުރަނީ ރާއްޖޭގެ އެންމެ ބޮޑު ދެޕާޓީއިންނެވެ. އެމްޑީޕީ އިން ވާދަކުރަނީ އިބްރާހިމް ޝާޒްއެވެ. ޕީޕީއެމް ޕީއެންސީ ކޯލިޝަނުން ވާދަކުރަނީ ކުރިން ގުރައިދޫ ދާއިރާގެ މެމްބަރުކަން ކުރެއްވެވި އިބްރާހިމް ރިޒާގެ ކޮއްކޮ ހުސެއިން ރިޒާ އެވެ. ގުރައިދޫ ދާއިރާގެ ގޮނޑި ހުސްވެފައި ވަނީ އެދާއިރާގެ މެމްބަރުކަން ކުރައްވަމުން ދިޔަ އިބްރާހިމް ރިޒާ ކެންސަރު ބައްޔަށް ފަރުވާ ހޯއްދަވަމުން ދަނިކޮށް ނިޔާވުމުންނެވެ.

ދެޕާޓީ އިން ވެސް ދަނީ ވަރަށް ވަރުގަދަ އަށް އިންތިޚާބަށް ތައްޔާރުވެ ކެމްޕެއިން ކުރަމުންނެވެ. މި އިންތިޚާބު ބޭއްވުމަށް ހަމަޖެހިފައިވަނީ މި ހިނގާ އޭޕްރީލް މަހުގެ 15 ވަނަ ދުވަހުއެވެ.