ގުރައިދޫ ދާއިރާގެ އިންތިޚާބު ކާމިޔާބުކުރުމަށް މާއްދީގޮތުން މީހުންނަށް ބަހާނެ އެއްޗެއް ނެތް ކަމަށާއި، ނިކުމެ ވަޑައިގެން ހުންނެވީ މީގެ ކުރިން އެ ދާއިރާގެ ތަމްސީލުކުރެއްވި މަރުޙޫމު އިބްރާހިމް ރިޒާ ގެ ލެގަސީ ދެމެހެއްޓުމަށްކަމަށް ގުރައިދޫ ދާއިރާގެ ބައި-އިލެކްޝަނުގައި ޕީޕީއެމް ތަމްސީލުކުރައްވާ ހުސެއިން ރިޒާ ވިދާޅުވެއްޖެ އެވެ.
އެމަނިކުފާނު އެފަދައިން ވިދާޅުވެފައިވަނީ ގުރައިދޫ ދާއިރާގެ އިންތިޚާބުގެ ކެމްޕޭނުތެރޭގައި މި އިންތިޚާބުގައި ވާދަކުރައްވާ ސަރުކާރު ހިންގާ މައި ޕާޓީ އެމްޑީޕީއާއި އެމްއެންޕީން ދާއިރާގެ މެމްބަރުންނަށް ފައިސާ ބަހާ، ވޯޓު ގަތުމުގެ މަސައްކަތް ކުރާކަމަށް ތުހުމަތުތައް ކުރެވެމުންދާއިރު، އެކަން ފާހަގަކުރެވިފައިވޭތޯ އައްސަވާ ކުރެއްވި ސުވާލަކަށް ޗެނަލް-13 ގެ ޕްރޮގްރާމުގައި ވާހަކަދައްކަވަމުން ނެވެ.
ރިޒާ ވިދާޅުވީ އޭނާގެ މަރުޙޫމު ބޭބެ ސިޔާސީ މައިދާނަށް ނިކުމެވަޑައިގަތީ އަދި އެންމެ ފުރަތަމަ ގުރައިދޫ ދާއިރާގެ މަޖިލީސް ގޮނޑިއަށް ނިކުމެ ވަޑައިގަތީ ހުސް އަތާ ކަމަށެވެ.
އެހެން ނަމަވެސް، ދާއިރާގެ ރައްޔިތުން މަރުޙޫމު ރިޒާއަށް ވޯޓުދެއްވީ އެމަނިކުފާނުގެ ކިބައިގައި ހުރި ރިވެތި އަޚުލާޤާއި ދާއިރާގެ ރައްޔިތުންނާއި ދޭތެރޭ ބެހެއްޓެވި ގާތްކަމާއި އޯގާތެރިކަމުގެ ސަބަބުންކަމަށް ރިޒާ ވިދާޅުވި އެވެ.
އެއާއެކު އޭނާ ވިދާޅުވީ ދާއިރާގެ ރައްޔިތުން ބޭނުންވަނީ އެމީހުންނަށް އިންތިޚާބާއި ދިމާކޮށް ފައިސާ ދޭނެ ފަރާތެއް ނޫން ކަމަށެވެ. ގުރައިދޫ ދާއިރާގެ ރައްޔިތުންނަކީ އެއްވެސް އިރެއްގައި ފައިސާގެ ނުފޫޒުގައި ޖެހިވަޑައިގެން ބައެއް ނޫން ކަަމަށާއި އެ ބޭފުޅުން ބޭނުންފުޅުވަނީ އޯގާތެރިކަމާއެކު ރައްޔިތުންނާއި ގުޅުން ބަދަހިކޮށް، ގުޅިގެން މަސައްކަތްކުރާނެ ފަރާތެއްކަމަށް ރިޒާ ވިދާޅުވި އެވެ.
"އިންތިޚާބުތަކާއި ބެހޭގޮތުން އަރަމުންދާ އަޑުތަކަށް ބަލާއިރުގައި، ޕާޓީތަކުން ބޮޑެތި ހޭދަތައް ކުރުމަކީ އެކަށީގެންވާ ކަމެއް. އެހެން ނަމަވެސް އަޅުގަނޑުމެން އަތުގައި ނެތް ހަގީގަތުގައިވެސް ބަހާނެ އެއްވެސް އެއްޗެއް. ދާއިރާގެ ރައްޔިތުން ބޭނުންވާގޮތުގައި މި ގޮނޑި ދެމެހެއްޓުމުގެ އެންމެ ބޮޑު ބޭނުމަކީ އެ ބޭފުޅުން ޤަބޫލުކުރަނީ މަރުހޫމު ރިޒާގެ ކިބައިގައި ހުންނަ ސިފަތައް، އޯގާތެރިކަމާއި ހިތްހެޔޮކަމާއި އެބޭފުޅުންނާއި އޮންނަ ގާތް ގުޅުމާއި، 15 އަހަރުވެގެންދާއިރު މި ގުޅުން މިހެން ދެމިއޮތުމުގެ އެންމެ ބޮޑު ސަބަބަކީ މަރުހޫމު ރިޒާ ދާއިރާގެ ބޭފުޅުންނާއި ބެހެއްޓެވި ގާތްކަން. އެހެންވީމަ އެބޭފުޅުން ބޭނުމެއް ނުވޭ މި ގޮނޑި އެހެން ގޮތަކަށް ބަދަލުވެގެން ދާކަށް"
ޕީޕީއެމްގެ ކެންޑިޑޭޓު ހުސެއިން ރިޒާ
ރިޒާ ވިދާޅުވީ މި އިންތިޚާބުގައި ކުރިމަތިލައްވާފައި ދެން ތިއްބެވި ދެ ބޭފުޅުންނަށް ވުރެ ގާތް ގުޅުމެއް އެމަނިކުފާނު ރައްޔިތުންނާއެކު ބާއްވާނެ ކަމަށެވެ. އަދި ބޭބެ ދެއްކެވި މަގުން ރައްޔިތުންނަށް އޯގާތެރި ބޭފުޅަކަށް ވެވަޑައިގަންނަވާނެ ކަމަށެވެ.
ކުރިއަށް އޮތް ރިންތިޚާބުގައި ފައިސާގެ ދަޅަ ދައްކައިގެން ރައްޔިތުންގެ ވިސްނުން އަނބުރާ ލެވިދާނެކަމަށް ޤަބޫލު ނުކުރައްވާކަމަށާއި، ގުޅި ގުރައިދޫ މާފުށީގެ ރައްޔިތުންގެ ހިތްތަކުގައި އެ ދާއިރާ މީގެ ކުރިން ތަމްސީލުކުރެއްވި މެމްބަރު އިބްރާހިމް ރިޒާއަށް އޮތީ އެ ދާއިރާގެ ގޮނޑި ފައިސާއަށް ވިއްކާލާވަރަށް ވުރެ މާ މަތިވެރި ދަރަޖައެއް ދެއްވާފައިކަމަށް އޭނާ ވިދާޅުވި އެވެ.
Advertisement
This content is created and paid for by advertisers and does not involve Voice Journalists
