ކުރިއަށް އޮތް ރައްޔިތުންގެ މަޖިލީހުގެ ގުރައިދޫ ދާއިރާގެ ބައި-އިލެކްޝަނަށް ނުފޫޒު ފޯރުވުމަށް ސަރުކާރުން އަމަލުކުރަމުންދަނީ މީގެ ކުރިން ކޮމަންޑޫ ދާއިރާގެ ބައި-އިލެކްޝަނުގައި ކަންކަން ކުރިގޮތަށްކަމަށް އިދިކޮޅުން ބުނެފި އެވެ. 

އިދިކޮޅުން މިފަދައިން ބުނެފައިވަނީ ގުރައިދޫ ދާއިރާގެ އިންތިޚާ.ބަށް ނުފޫޒު ފޯރުވުމަށްޓަކައި ސަރުކާރުން ގިނަ ކަންތައްތަކެއް ކުރަމުންދާކަން ފާހަގަކޮށް ކަންބޮޑުވުން ފާޅުކުރަމުން ނެވެ. 

ގުރައިދޫ ދާއިރާގެ އިންތިޚާބާއި ގުޅޭ މައުލޫމާތުތައް ހިއްސާކުރުމަށް އިދިކޮޅު ކޯލިޝަނުން މާފުށީގައި ބޭއްވި ޚާއްސަ ހަރަކާތެއްގައި ނޫސްވެރިންގެ ސުވާލުތަކަށް ޖަވާބުދެއްވަމުން އިދިކޮޅު ކޯލިޝަން ވަގުތީގޮތުން ހިންގެވުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުالله ވިދާޅުވީ ސަރުކާރުން މި އިންތިޚާބަށް ނުފޫޒު ފޯރުވުމަށްޓަކައި އަމަލުކުރަމުންދަނީ ކޮމަންޑޫ އިންތިޚާބަށް ނުފޫޒުފޯރުވުމަށްޓަކައި އަމަލުކުރި ގޮތާއި އެއްގޮތަކަށް ކަމަށެވެ. 

Advertisement

ސަރުކާރު އޮތީ އިންތިޚާބަށް ނުފޫޒު ފޯރުވުމުގައި ހައްދުފަހަނަ އަޅާފައި ކަމަށާއި، އިންތިޚާބަށް ނުފޫޒު ފޯރުވުމަށް ސަރުކާރުގެ ކުންފުންިތައް މެދުވެރިކޮށް މަސައްކަތްތައް ކުރަމުންދާކަން އިދިކޮޅުގެ ސަމާލުކަމަށް އައިސްފައިވާކަމަށް އަބްދުއްރަހީމް ވިދާޅުވިއެވެ. އަދި އެކަމުގެ ކޮންމެސްވަރެއްގެ ތަފްސީލުތަކެއްވެސް އޭނާ ވަނީ ހިއްސާކުރައްވާފަ އެވެ. 

އަބްދުއްރަހީމް ވިދާޅުވީ ސަރުކާރުން އިންތިޚާބަށް ނުފޫޒު ފޯރުވާ މައްސަލަ އިދިކޮޅުން އޭސީސީއަށް ހުށައެޅުމަށް މަސައްކަތް ކުރަމުންދާ ކަމަށެވެ. 

އެއާއެކު އޭނާ ވިދާޅުވީ ގުޅި-ގުރައިދޫ-މާފުށީ ދާއިރާގެ ރައްޔިތުން ތިބީ ސަރުކާރުން ފޯރުވާ ނުފޫޒަށް ތަބާވެ އެމްޑީޕީއަށް ގޮނޑި ދޫކޮށްލާ ގޮތަކަށް ނޫން ކަމަށެވެ. 

އިންތިޚާބާއި ދިމާކޮށް ސަރުކާރުން ރައްޔިތުންނަށް ވާ ވައުދުތަކަކީ ފުއްދާނެ ވައުދުތަކެއް ނޫންކަން ރައްޔިތުންނަށް އެނގޭ ކަމަށާއި، އެހެންކަމުން ކޮމަންޑޫ އިންތިޚާބަށް ނުފޫޒުފޯރުވައިގެން ގޮނޑި ކާމިޔާބުކުރި ގޮތަށް ގުރައިދޫ ދާއިރާގެ ގޮނޑި ކާމިޔާބުކުރެވިދާނެ ކަމަށް ހީކުރުމަކީ މޮޔަކަމެއް ކަމަށް އަބްދުއްރަހީމް ވިދާޅުވި އެވެ.