ވިސާ ހަމަނުޖެހުމުގެ ސަބަބުން ސަފާ ހައްޖު އެންޑް އުމްރާ ގުރޫޕުން މިއަދު ހެނދުނު ދިޔުމަށް ހަމަޖެހިފައިވާ އުމްރާ ދަތުރު ކެންސަލް ކުރުމުން، އެކަން ހިނގާދިޔަ ގޮތް މިނިސްޓްރީން ބަލަން ފަށައިފިއެވެ.

ސަފާ ގްރޫޕްގެ ވައިބާ ގްރޫޕްގައި ހެނދުނު އާންމު ކޮށްފައިވާ މެސެޖްގައި ބުނެފައިވަނީ މިއަދުގެ އެވަގުތާ ހަމައަށް ސައުދީން އުމްރާ ވިސާ ދޫކުރާ ކުންފުނިން އެ ގްރޫޕަށް އެއްވެސް ވިސާއެއް ދޫކޮށްފައި ނުވާތީ ފުރެން ނެތް ކަމަށެވެ.

އެހެންކަމުން އެއްވެސް ބޭފުޅަކު ފުރުމަށް އެއާޕޯޓަށް ވަޑައިނުގަތުމަށް އެ ގްރޫޕްއިން މެސްޖްގައި އެދިފައިވެއެވެ.

Advertisement

އެކަމާ ގުޅިގެން އިސްލާމިކް މިނިސްޓްރީން ބުނީ މިފަދަ ކަމެއް ހިނގައިގެން އުޅޭކަމުގެ ޝަކުވާ އެ މިނިސްޓްރީއަށް ލިބިފައިވާ ކަމަށާއި އެކަން ހިނގާދިޔަ ގޮތް ވަރަށް ގާތުން ބަލަމުންދާ ކަމަށެވެ.

"އަލް ސަފާ ޕްރައިވެޓް ލިމިޓެޑްގެ ފަރާތުން މި ރަމަޟާން މަހު އުމްރާއަށް ގެންދަން ހަމަޖެހިފައިވާ އުމްރާވެރިން އުމްރާއަށް ގެންދިއުމުގައި މައްސަލަތަކެއް ދިމާވެ، އުމްރާއަށް ނުފުރޭ ކަމުގެ ޝަކުވާ މިއަދު މިނިސްޓްރީއަށް ލިބުމާ ގުޅިގެން މިނިސްޓްރީއިން މިދަނީ އެކަން ހިނގާފައިވާ ގޮތް ވަރަށް ގާތުން ބަލަމުން" މިނިސްޓްރީން ބުންޏެވެ.

މައުލޫމާތު ލިބިފައިވާ ގޮތުން ސަފާ ގްރޫޕްއިން ވަނީ ސައުދީ އެއާލައިންގައި އުމްރާވެރިން ފުރުމަށް މިއަދަށް ހަމަޖައްސާ، އެ މީހުންގެ ލަގެޖުތައް އިއްޔެ އެއާޕޯޓަށް ގެންގޮސްފައެވެ.