އުމްރާ ވިސާއަކީ މޯލްޑިވްސް ހައްޖު ކޯޕަރޭޝަނުންވެސް ފޯރުކޮށްދޭ ހިދުމަތެއް ކަމަށާއި ވީހާވެސް އަވަހަކަށް އުމްރާވެރިންނަށް ފުރޭނެގޮތް ހަމަޖެއްސުމަށް އިސްލާމިކް މިނިސްޓްރީން ސަފާ ގުރޫޕަށް އަންގައިފިއެވެ.
ވިސާ ހަމަނުޖެހުމުގެ ސަބަބުން ސަފާ ހައްޖު އެންޑް އުމްރާ ގުރޫޕުން މިއަދު ހެނދުނު ދިޔުމަށް ހަމަޖެހިފައިވާ އުމްރާ ދަތުރު ކެންސަލް ކޮށްފައި ވަނީ މިއަދު ހެނދުނުގެ ވަގުތެއްގައެވެ.
އެގޮތުން އެ ގްރޫޕްގެ ވައިބާ ގްރޫޕްގައި ހެނދުނު އާންމު ކޮށްފައިވާ މެސެޖްގައި ބުނެފައިވަނީ މިއަދުގެ އެވަގުތާ ހަމައަށް ސައުދީން އުމްރާ ވިސާ ދޫކުރާ ކުންފުނިން އެ ގްރޫޕަށް އެއްވެސް ވިސާއެއް ދޫކޮށްފައި ނުވާތީ ފުރެން ނެތް ކަމަށެވެ.
މިކަމާ ގުޅިގެން އިސްލާމިކް މިނިސްޓްރީން ބުނީ، އުމްރާވެރިން ފުރަން ހަަމަޖެހިފައިވާ ގަޑިއާ ހަމައަށްވެސް ވިސާ ހަމަޖެހިފައި ނުވާ ކަމަށާއި ތިން މަސް ދުވަހަށް އުމްރާގެ ވިސާ ލިބޭއިރު ކުންފުނީގެ ފަރާތުން ދުރާލާ ވިސާ ހަމަޖައްސާފައި ނުވާކަން މިނިސްޓްރީއަށް ފާހަގަ ކުރެވިފައިވާ ކަމަށެވެ.
އުމްރާ ވިސާއަކީ ސައުދީ ސަރުކާރުން އެކަމަށް ހުއްދަ ދީފައިވާ އޭޖެންސީތަކުން އުމްރާ ކުންފުނިތަކަށް ދޭ ހިދުމަތެއް ކަމަށެވެ. އަދި މި ވިސާއަކީ މޯލްޑިވްސް ހައްޖު ކޯޕަރޭޝަނުންވެސް ފޯރުކޮށްދޭ ހިދުމަތެއް ކަމަށެވެ.
"މި މައްސަލަ ދިމާވެފައި ވަނީ ސަޢޫދީީ ސަރުކާރުން ނުވަތަ ދިވެހި ސަރުކާރުން ދޭންޖެހޭ އެއްވެސް ހުއްދައެއް ނުލިބިގެން ނޫންކަމަށާއި އައްސަފާ ޕްރައިވެޓް ލިމިޓެޑްގެ ފަރާތުން ވިސާ ހޯދުމަށް އެދުނު ސަޢޫދީ އެޖެންސީގެ ފަރާތުން މިހާތަނަށް ވިސާގެ ކަންކަން ހަމަޖެހިފައި ނުވާތީ ކަމަށް އެ ކުންފުނިން މައުލޫމާތުދޭ" މިނިސްޓްރީން ބުންޏެވެ.
އުމްރާވެރިންގެ އަތުން އިތުރު ފައިސާއެއް ނެގުމަކާ ނުލައި، މި ރަމަޟާންމަހު ވީހާވެސް އަވަހަކަށް އުމްރާވެރިންނަށް ފުރޭނެ އިންތިޒާމު ހަމަޖެއްސުމަށް މިނިސްޓްރީން ވަނީ ސަފާ ގުރޫޕަށް އަންގާފައެވެ.
Advertisement
This content is created and paid for by advertisers and does not involve Voice Journalists
