ދިވެހި ކޮންމެ ރައްޔިތަކަށް ކުރިމަތިވެލޭ ގޮތަށް އދ. ދިގުރަށުން ގޯތި ދޫކުރުމަށް އެރަށު ކައުންސިލުން އިއުލާނު ކޮށްފިއެވެ.

މިދިޔަ ބުރާސްފަތި ދުވަހުން ފެށިގެން، ބަންޑާރަ ގޯއްޗަށް އެދި ހުށަހެޅުމުގެ ފުރުޞަތު ހުޅުވާލާފައި ވާއިރު، މި ބުރުގައި އެރަށުން ދޫކުރުމަށް ހަމަޖެހިފައި ވަނީ 2000 އަކަފޫޓުގެ 77 ގޯއްޗެވެ.

ގޯއްޗަށް އެދި ހުށަހަޅާ މީހުންނަކީ ދިވެހި ރައްޔިތަކަށް ވާންޖެހޭ ކަމަށާއި، މީލާދީ ގޮތުން 18 އަހަރު ފުރިފައިވާ މީހެއްކަމަށް ވާންޖެހެއެވެ. 

Advertisement

ދިގުރަށު ކައުންސިލުން ބުނީ، ގޯއްޗަށް އެދުމުގެ ޝަރުތުހަމަވާ ފަރާތްތަކުން "ދިރިއުޅުމަށްޓަކައި އދ. ދިގުރަށުން ބަންޑާރަ ގޯއްޗަށް އެދޭ ފޯމް" ފުރިހަމަ ކުރުމަށްފަހު މިއަދުން ފެށިގެން، އަންނަ މަހުގެ ނުވަ ވަނަ ދުވަހުގެ މެންދުރު 13:00 ގެ ނިޔަލަށް އެރަށު ކައުންސިލް އިދާރާއަށް ފޯމު ހުށަހެޅޭނެ ކަމަށެވެ.     

"ރަސްމީ ބަންދު ނޫން ކޮންމެ ދުވަހަކު ގޯއްޗަށް އެދޭ ފޯމް ރަމަޟާން މަހުގެ ދުވަސްތަކާއި ޝައްވާލު މަހުގެ ފުރަތަމަ 07 ދުވަހާއި ހަމައަށް ދޫކުރުން އޮންނާނީ ހެނދުނު 09:30 އިން 10:30 އާ ދެމެދު އަދި ފޯމު ބަލައިގަތުން އޮންނާނީ ހެނދުނު 10:45 އިން މެންދުރު 12:30 އަށެވެ. ރަމަޟާން މަހާއި ޝައްވާލު މަހުގެ 07 ވަނަ ދުވަހުގެ ފަހުން ގޯއްޗަށް އެދޭ ފޯމު ދޫކުރުން އޮންނާނީ ހެނދުނު 08:30 އިން 10:00 އާ ދެމެދު އަދި ފޯމު ބަލައިގަތުން އޮންނާނީ ހެނދުނު 10:15 އިން މެންދުރު 13:00 އަށެވެ." އެ ކައުންސިލްގެ އިއުލާނުގައިވެއެވެ.

ގޯއްޗަށް އެދޭ ފޯމް ކައުންސިލްގެ ވެބްސައިޓް www.dhigurah.gov.mv އިން އަދި އެ އިދާރާއިން ކޮށްފައިވާ އިޢުލާނާއެކު ލިބެން ހުންނާނެ ކަމަށް ދިގުރަށު ކައުންސިލުން ބުންޏެވެ.