އައްޑޫއިން ފެނުނު މީސްލްސް ކޭސްއާ ގުޅުންހުރި އެއްވެސް މީހަކު މިހާތަނަށް ޕޮޒިޓިވް ނުވާކަމަށް ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ބުނެފިއެވެ.
ހިމަބިއްސަށް ޕޮޒިޓިވް ވެފައިވާ މީހަކު އައްޑޫއިން ފެނުނީ މިދިޔަ ހޯމަ ދުވަހުއެވެ. އެ ކޭސްއާ ގުޅިގެން އައްޑޫ އިކުއިޓޯރިއަލް ހޮސްޕިޓަލުން ވަނީ ކޮންޓެކްޓް ޓްރޭސިންގް ހަދައި، މައުލޫމާތު އޮޅުންފިލުވާފައެވެ.
ކޭސް ފެނުމާ ގުޅިގެން، ކަނޑައެޅިފައިވާ އުސޫލެއްގޮތަށް ކޭސް ފެނުނު ހިސާބުގެ ވަށައިގެންވާ ސަރަހައްދުގައި ދިރިއުޅޭ މީހުންގެ ކޮމިއުނިޓީ ސާރވޭ ކުރިއަށް ގެންގޮސްފައިވާ ކަމަށާއި މީސްލްސް ވެކްސިންގެ ދެ ޑޯޒް ފުރިހަމަ ނުކޮށް ތިބި މީހުނާއި އަދި ޑޯޒްތައް ފުރިހަމަ ކުރިކަމުގެ ރެކޯޑް ނެތް މީހުންނަށް ވެކްސިން ދިނުމަށް ރިންގް ވެކްސިނޭޝަން ކުރިއަށް ގެންދެވިފައި ވާކަމަށް އެޗްޕީއޭއިން ބުންޏެވެ.
މި ކޭސްއާ ގުޅިގެން ކޮންޓެކްޓުންގެ ގޮތުގައި 65 ފަރާތެއް ފާހަގަ ކުރެވުނު ކަމަށާއި ނަމަވެސް އޭގެން އެއްވެސް މީހެއްގެ ފަރާތުން މިހާތަނަށް ބަލީގެ އަލާމާތެއް ފެނިފައި ނުވާކަމަށް އެޗްޕީއޭއިން ބުންޏެވެ.
މީގެއިތުރުން އެޗްޕީއޭއިން ބުނީ، މި ކޭސްއާ ގުޅުންހުރި ހުރިހާ ފަރާތެއްވެސް ވަނީ މީސްލްސް ވެކްސިން ފުރިހަމަ ކޮށްފައި ކަމަށެވެ.
"ކޮމިއުނިޓީ ސަރވޭގައި 41 ފަރާތެއްގެ މައުލޫމަތު ސާފުކުރެވިފައިވޭ. މީގެތެރޭގައި 16 ގެއަކާއި 1 ފިހާރަ ހިމެނޭ. ސަރވޭއަށް ފަހު 19 ފަރާތަކަށް ވެކްސިން ދީފައިވޭ" އެޗްޕީއޭއިން ބުންޏެވެ.
Advertisement
This content is created and paid for by advertisers and does not involve Voice Journalists
