މާލެ ސިޓީ ކައުންސިލުން މާލެ ފެހި ކުރާއިރު ސަރުކާރުން ގަސް ކަނޑާ ހުސްކުރަނީ ކަމަށް މާލޭ މޭޔަރު ޑރ. މުހައްމަދު މުއިއްޒު ވިދާޅުވެއްޖެއެވެ.

މުއިއްޒު ކުރެއްވި ޓުވީޓެއްގައި ވިދާޅުވީ، އަމީނީ މަގުގެ ގަސްތައް އެއްކޮށް ނަގަމުންދާ ކަމަށާއި އެކަމާ ސިޓީ ކައުންސިލުން ދެކޮޅު ކަމަށެވެ.

"މާލެ ސިޓީ ކައުންސިލުން ގަސް އިންދުމާއި މާލެ ފެހި ކުރުމުގެ މަސައްކަތް ކުރަމުންދާއިރު ސަރުކާރުގެ ކިބައިން ފެންނަނީ ގަސްތައް ކަނޑާ ހުސްކުރަމުންދާތަން. އަމީނީ މަގު ގެ ގަސްތައް އެއްކޮށް ނަގަމުންދަނީ މާލެ ސިޓީ ކައުންސިލް އިން އެކަމާ ދެކޮޅު ހަދަމުން ދަނިކޮށް" މުއިއްޒު ވިދާޅުވިއެވެ.

މާލެ ސިޓީ ކައުންސިލްގެ ސްޓްރެޓެޖިކް އެކްޝަން ޕްލޭންގައި ހިމެނިފައިވާ “އެއްލައްކަ ގަސް“ ޕްރޮގްރާމް މިދިޔަ އަހަރުގެ ޖެނުއަރީ 1 ވަނަ ދުވަހުއެވެ.

މާލެ ފެހި ކުރުމަށް ސިޓީ ކައުންސިލުން ވަނީ ގަސް ކޮމިޓީއެއްވެސް އެކުލަވާލާފައެވެ.

މާލެ ސިޓީ ކައުންސިލްގެ ފަރާތުން ކުރިއަށްގެންދާ އެއްލައްކަ ގަސް ޕްރޮގްރާމަކީ ފަސް އަހަރަށް އެކުލަވާލައިފައިވާ މާލެ ސިޓީކައުންސިލްގެ ސްޓްރެޓެޖިކް އެކްޝަން ޕްލޭންގެ 2.6 ގައިވާ ގަސް އިންދާ ހައްދާނެ ގޮތުގެ ޕްލޭން ކަމާ ބެހޭ ފަންނީ ފަރާތް ތަކުގެ ލަފައާއި މާލެ ސިޓީގެ ރައްޔިތުންގެ ބައިވެރިވުމާއި އެއްގޮތަށް އެކުލަވާލުމުގެ މަސައްކަތުގެ ތެރެއިން ކުރިއަށްދާ މަޝްރޫޢުއެކެވެ.

އެހެންކަމުން މާލެ ފެހި ކުރުމުގެ މަސައްކަތް ފުޅާ ދާއިރާއެއްގައި ކުރަމުންދާއިރު، މާލޭގެ ބިޔަ ގަސްތައް ކަނޑަމުންދާތީ ސިޓީ ކައުންސިލުން އަބަދުވެސް ކަންބޮޑުވުން ފާޅު ކުރެއެވެ.

މިކަމާ ގުޅިގެން ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވެފައި ވަނީ، އަމީނީ މަގު ހެދުމަކީ ކޮންމެ ގޮތެއްގައި ވެސް ކުރަންޖެހިފައިވާ ކަމެއް ކަމަށާއި އެހެންކަމުން އެކަން ކުރުމަށް ގަސްތައް ކަނޑާލަން ޖެހޭ ކަމަށެވެ. އަދި އެގަސްތައް ކެނޑުމަށްފަހު އުކާލުމުގެ ބަދަލުގައި އެހެން ތަނެއްގައި ގަސްތައް އިންދުމުގެ މަސައްކަތް ވެސް ކުރިއަށްދާނެ ކަމަށެވެ.

އަދި އެ މަގު ހަދައި ނިމުމަށްފަހު މަގު ފެހި ކުރުމުގެ މަސައްކަތް ވެސް ކުރިއަށްދާނެކަން އޭނާ ފާހަގަކުރެއްވިއެވެ.