އިދިކޮޅުން ސިލްސިލާކޮށް ބާއްވަމުންދާ މުޒާހަރާގެ ތެރެއިން އެމްޓީސީސީގެ ބަސްތަކަށް ހުރަސްއަޅާ މައްސަލާގައި އެ ކުންފުނީގެ ސީއީއޯ އާދަމް އާޒިމް ކަންބޮޑުވުން ފާޅުކުރައްވާފިއެވެ.
މިކަމާއި ގުޅިގެން އާޒިމް މިއަދު ކުރެއްވި ޓްވީޓެއްގައި ވިދާޅުވެފައިވަނީ އެއްވެސް ބޭފުޅަކު ރައްޔިތުންނަށް ދެވޭ ހިދުމަތްތަކަށް ދަތިވާ ކަންތައް ނުކުރެއްވުމަށް ވަނީ އެދިފައެވެ.
މިއާއިއެކު މިގޮތަށް ބަސްތަކަށް ހުރަސް އެޅުމަކީ އިދިކޮޅުން މިހާރު އާންމުކޮށް ކުރާ ކަމެއް ކަމަށް ފާހަގަކުރައްވާ މިގޮތަށް އަމަލު ކުރައްވާތީ ރައްޔިތުން ގަޑިތަކަށް ތަންތަނަށް ގެންދިޔުމަށް އެމްޓީސީސީއަށް ދަތިވާ ކަމަށް އާޒިމް ވިދާޅުވިއެވެ.
އެހެންކަމުން ޕަބްލިކް ޓްރާންސްޕޯޓް އަށް ހުރަސް ނޭޅުމަށް އިދިކޮޅުގެ ފަރާތުން އެދުމާއިއެކު މިކަހަލަ ނާތަހުޒީބު ކަންތައް ކުރާ ބޭފުޅުން އިސްލާހު ކޮށްދެއްވުމަށް ފުލުހުންގެ ފަރާތުން އާޒިމް ވަނީ އެދިފައެވެ.
"މީގައި ތިޔަ އުނދަގޫ ކުރައްވާ ބޭފުޅާގެ ގާތް ތިމާގެ ރަހްމަތްތެރި އެއްވެސް އިނދެދާނެ. މީ ރައްޔިތުންނަށް ދެވޭ ހިދުމަތެއް." އާޒިމް ވިދާޅުވިއެވެ.
އާޒިމްގެ ޓުވީޓަށް ރައްދުދެއްވައި ޕީޕީއެމްގެ ހަރަކާތުކޮމެޓީގެ ރައީސް އަދި ކުރީގެ ހޯރަފުށި ދާއިރާގެ ރައީސް މުހައްމަދު އިސްމާއިލް ވިދާޅުވީ މުޒާހަރާ ކުރަނީ ޤާނޫނު އަސާސީން ލިބިފައިވާ އަސާސީ ހައްގުގެ ދަށުންކަމަށެވެ.
މިރޯދަމަހުވެސް އިދިކޮޅު އިއްތިހާދުން ދަނީ ޕީޕީއެމްގެ ރައީސް އަދި އެ ޕާޓީގެ ރިޔާސީ ކެންޑިޑޭޓު ރައީސް އަބްދުﷲ ޔާމީން އަބްދުލްގައްޔޫމު މިނިވަންކުރުމަށް ގޮވާލާ ފުރަމާލޭގައި ކޮންމެ ރެޔަކުހެން އަޑުއުފުލަމުންނެވެ.
އެގޮތުން މުޒާހަރާގެ ބައިވެރިންވަނީ މިދިޔަ މަހުގެ ފަހުކޮޅު ރައީސް ޞާލިހުގެ މޮޓޯކޭޑަށް ވެސް ހުރަސްއަޅާ އަޑުއުފުލާފައެވެ.
Advertisement
This content is created and paid for by advertisers and does not involve Voice Journalists
