ތިލަމާލެ ބްރިޖާއި އައްޑޫގެ މަގުތައް ހެދުމަށް ދިވެހި ސަރުކާރުން ހަވާލުކޮށްފައިވާ އިންޑިއާގެ އެފްކޮންސް ކުންފުނި ވިއްކާލި ނަމަވެސް، އެ ކުންފުންނާއި ރާއްޖެއާއެކު ދެމެދު އޮތް އެއްބަސްވުން އެގޮތުގައި އޮންނާނެ ކަމަށް ސަރުކާރުން ބުނެފިއެވެ.
އިންޑިއާގެ ބިލިއަނަރެއް ކަމުގައިވާ ޝާޕޫރު މިސްޓްރީގެ ޝާޕޫރުޖީ ޕަލޯންޖީ (އެސްޕީ)ގެ ދަށުން ހިންގަމުންދާ އެފްކޮންސް ކުންފުނި ވިއްކާލުމަށް އެ ގުރޫޕުން ނިންމާފައިވާ ކަމަށާ އެފަދައިން އެސްޕީ ގުރޫޕުން ނިންމީ އެ ކުންފުންޏަށް ދިމާވެފައިވާ މާލީ މައްސަލަތަކާއި ދަރަނިތައް އަދާކުރުމުގެ ގޮތުން ކަމަށް ބޭރުގެ ބައެއް މީޑިއާ ތަކުން ވަނީ ރިޕޯޓް ކޮށްފަ އެވެ.
އެކަމާއި ގުޅިގެން ރައީސް އޮފީހުން މިއަދު ބޭއްވި ނޫސްވެރިންގެ ބައްދަލުވުމުގައި، އެ އޮފީހުގެ ތަރުޖަމާނު މިޢްވާން މުޙައްމަދު ވިދާޅުވީ، އެކަން ސަރުކާރުގެ ސަމާލުކަމަށް އައިސްފައިވާކަމަށާ، ނަމަވެސް ރަސްމީ ސިފައެއްގައި އެކަމުގެ އެއްވެސް މަޢުލޫމާތެއް މިހާތަނަށް އެ ކުންފުނިން ސަރުކާރާއެކު ޙިއްސާކޮށްފައި ނުވާކަމަށެވެ.
މިޢްވާން ވިދާޅުވީ، އެފަދައިން އެ ކުންފުނި ވިއްކާލި ނަމަވެސް އެއީ ކަންބޮޑުވާންޖެހޭ ކަމެއް ނޫން ކަމަށާ، ދުނިޔޭގެ ބޮޑެތި ކުންފުނިތަކުން، އެ ކުންފުނިތަކުގެ އެސެޓް ވިއްކާ ގަނެ ހަދާކަމަށެވެ. އަދި އެފްކޮންސް ވިއްކާލިނަމަވެސް، ރާއްޖޭގައި އެ ކުންފުނިން ކުރިއަށްގެންދާ މަޝްރޫޢުއަކަށް އެއްވެސް އަސަރެއް ނުކުރާނެކަމަށް މިޢްވާން ވަނީ ވިދާޅުވެފައެވެ.
"މިސާލަކަށް ބަލަންޏާ ދުނިޔޭގެ އެންމެ ބޮޑު ސީޕްލޭން ފްލީޓް ރާއްޖޭގައި އޮތީ. އެކިފަހަރު އެކި ޝެއަރ ހޯލްޑަރުން ނަގައިގެން ހިންގައިފި. ވަރަށް ފަހުންވެސް އާ ކުންފުންޏަކަށް ބަދަލުވި. އެހެންނަމަވެސް އޮޕަރޭޝަނަށް ބުރޫ ނާރާ. އެފްކޮންސް ވިއްކާލި ނަމަވެސް ރާއްޖެއާއެކު އޮތް އެއްބަސްވުން އެގޮތުގައި އޮންނާނެ" މިޢްވާން ވިދާޅުވިއެވެ.
މިއާއެކު މިޢްވާން ވަނީ، ތިލަމާލެ ބްރިޖްގެ މަސައްކަތްތަށް ޝެޑިއުލާ އެއްގޮތަށް ކުރިއަށްދާކަމުގެ ޔަގީންކަން ދެއްވާފައެވެ.
Advertisement
This content is created and paid for by advertisers and does not involve Voice Journalists
