ރަމަޟާން މަހުގެ ފަހު ދިހައިގެ ދުވަސްތައް ގުނަމުންދާއިރު އިދިކޮޅު ކޯލިޝަނަށް މަގުތަކަށް ނިކުމެ އިހުތިޖާޖު ކުރަން ޖެހުނީ މި އަނިޔާވެރި ސަރުކާރުގެ ކިބައިން ޤައުމު ސަލާމަތްކުރުމުގެ މަސައްކަތް ކުރުމަށްކަމަށް އިދިކޮޅު ކޯލިޝަންގެ އެކްޝަން ޑިޕާޓުމަންޓުގެ ޗެއާ އަދި މަޖިލީހުގެ ހޯރަފުށީ ދާއިރާގެ ކުރީގެ މެމްބަރު މުޙައްމަދު އިސްމާއިލް ވިދާޅުވެއްޖެ އެވެ.

މުޙައްމަދު އިސްމާއިލް މިފަދައިން ވިދާޅުވެފައިވަނި ފަހު ދިހަޔަށް ބެލުމެއް ނެތި އިދިކޮޅުން މަގުމަތީގައި މުޒާހަރާ ކުރަމުންދާތީ އަމާޒުވި ފާޑުކިޔުންތަކަށް ރައްދުދެއްވާ ކުރެއްވި ޓްވީޓެއްގަ އެވެ.

އެގޮތުން މުޙައްމަދު އިސްމާއިލް ވިދާޅުވީ އިދިކޮޅު ކޯލިޝަންގެ ސަޕޯޓަރުން މަގުތަކަށް ނިކުންނަނީ އިޝާ ނަމާދާއި ތާރީވީހު ނަމާދަށްވެސް ފަހުގައި ކަމަށެވެ. އަދި މަގުމައްޗަށް ނިކުމެ އިހުތިޖާޖު ކުރަމުންދަނީ މި އަނިޔާވެރި ވެރިކަމުން މި ގައުމު ސަލާމަތް ކުރުމުގެ މަސައްކަތް ކުރުމަށް ކަމަށެވެ.

Advertisement

އެ ޓްވީޓާއި ގުޅޭ އިތުރު ތަފްސީލު ދެއްވަމުން މުޙައްމަދު އިސްމާއިލް "ވޮއިސް" އަށް ވިދާޅުވީ ޤައުމު މިހާރު ވެއްޓިފައިވާ އަނދަވަޅުން ސަލާމަތް ކުރުމުގެ ޤާބިލުކަން ލިބިފައިވާ ހަމައެކަނި ސިޔާސީ ލީޑަރަކީ ރައީސް އަބްދުالله ޔާމީން އަބްދުލްގައްޔޫމު ކަމަށެވެ.

އެމަނިކުފާނަކީ ޕީޕީއެމްގެ ރިޔާސީ ކެންޑިޑޭޓުކަމަށް ވެފައި، ވާދަވެރި ސިޔާސީ ލީޑަރުގެ ހައިސިއްޔަތުން ސަރުކާރު ޖަވާބުދާރީ ކުރުވުމުގެ ޒިންމާ އުފުއްލަވަން ޖެހިވަޑައިގަންނަވާ ފަރާތްކަމަށް ވާއިރު، މި ސަރުކަރުން އެމަނިކުފާނުގެ މައްޗަށް ނުހައްގުން ހުކުމެއް ކޮށް ޖަލުގައި އެކަހެރިކޮށްފައި ބޭއްވުމަކީ ޤައުމަށް ލިބޭ ވަރަށް ބޮޑު ނިކަމެތިކަމެއް ކަމަށް މުޙައްމަދު އިސްމާއިލް ވިދާޅުވި އެވެ.

ރަމަޟާން މަހުގެ ފަހު ދިހައެއް ބައްދަލު ކުރިއިރުވެސް އެމަނިކުފާނަށް ކުޑަވެސް ލިޔެއް ދެއްވާފައި ނުވުމަކީ ސަރުކާރުގެ އަނިޔާވެރިކަން ފެނިގެންދާ ކަމެއްކަމަށް ސިފަކުރައްވާ މުޙައްމަދު އިސްމާއިލް ވިދާޅުވީ މަގުތަކަށް ނިކުމެ ސުލްހަވެރިކަމާއެކު އިދިކޮޅުގެ ސަޕޯޓަރުން ކުރަމުންދާ މަސައްކަތަކީ މި ގައުމުގައި އިންސާފު ޤާއިމުކޮށްދިނުމަށް ގޮވާލާ އަޑުއުފުލުން ކަމަށެވެ.

އިހުތިޖާޖުގެ ބައިވެރިންނަށް އަނިޔާކޮށްގެން ނުވަތަ ހައްޔަރުކޮށްގެން މި މަސައްކަތް ނުހުއްޓުވޭނެ ކަމަށާއި، ރައީސް ޔާމިނު މިނިވަންކޮށް އެމަނިކުފާނަށް ސިޔާސީ މަސައްކަތް ކުރުމުގެ ފުރުސަތު ފަހިކޮށްދެންދެން މި އިހުތިޖާޖުތައް ހުއްޓާނުލާނެކަމަށް މުޙައްމަދު އިސްމާއިލް ވިދާޅުވި އެވެ.