މިއަދު ކުރިއަށްދާ ގުރައިދޫ ދާއިރާގެ ބައި-އިލެކްޝަނުގެ ވޯޓުލާ ވަގުތު އިތުރުކުރީ ސަރުކާރުން އިލެކްޝަން ކޮމިޝަނަށް ނުފޫޒު ފޯރުވައިގެންކަމަށް އީސީގެ ރައީސް ފުއާދު ތައުފީގު އެއްބަސްވެވަޑައިގެންފައި ވާކަމަށް އިދިކޮޅު އިއްތިހާދު ވަގުތީގޮތުން ހިންގެވުމާއި ހަވާލުވެހުންނެވި ޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވެއްޖެ އެވެ.
އަބްދުއްރަހީމް މިފަދައިން ވިދާޅުވެފައިވަނީ މިއަދު ކުރިއަށްދާ ރައްޔިތުންގެ މަޖިލީހުގެ ގުރައިދޫ ދާއިރާގެ ބައި-އިލެކްޝަންގައި، ވޯޓުނެގުމަށް ހަމަޖެހިފައިވާ ވަގުތުގައި މޫސުން ގޯސްވެ ވިއްސާރަވުމުގެ ސަބަބުން ވޯޓުލާން ދިޔުމަށް ދަތިވެފައިވާތީ، ވީހާވެސް ގިނަަބަޔަކަށް ވޯޓުލުމުގެ ފުރުސަތު ފަހިކޮށްދިނުމުގެ ގޮތުން ވޯޓުލުމުގެ ވަގުތު މިއަދު 17:00އަށް އިތުރުކޮށްފައިވާކަމަށް އީސީން އިއުލާނުކުރިތާ ކުޑަ ވަގުތުކޮޅެއް ފަހުން ކުރެއްވި ޓްވީޓެއްގަ އެވެ.
އަބްދުއްރަހީމް ވިދާޅުވީ ވޯޓުލާ ވަގުތު އިތުރުކުރުމާއި ގުޅިގެން އީސީން ސިޔާސީ ޕާޓީތަކާއި މަޝްވަރާކޮށްފައި ނުވާކަމަށެވެ. އަދި އެ މައްސަލައިގައި އިދިކޮޅުން ވަނީ އީސީގެ ޓީމާއި ބައްދަލުވެސްކޮށްފަ އެވެ.
އެކަމާއި ގުޅޭގޮތުން އަބްދުއްރަހީމް ކުރެއްވި ޓްވީޓުގައި ވިދާޅުވީ މިއަދު ކުރިއަށްދާ ކ.ގުރައިދޫ ދާއިރާގެ ބައި-އިލެކްޝަންގައި ވާދަކުރާ ޕާޓީތަކާ މަޝްވަރާ ކުރުމެއްނެތި ވޯޓްލުމުގެ ވަގުތު އިތުރުކުރީ ސަރުކާރުން އިލެކްޝަންސް ކޮމިޝަންގެ ރައީސް ފުވާދު ތައުފީގަށް ނުފޫޒު ފޯރުވައިގެންކަމަށް އީސީގެ ރައީސް ފުއާދު އެއްބަސްވެވަޑައިގެންފައި ވާ ކަމަށެވެ.
އަދި ވަގުތު އިތުރު ކުރުމަށް ސަރުކާރުން އީސީއަށް ނުފޫޒު ފޯރުވީ އިންތިޚާބާއި ގުޅިގެން އެމްޑީޕީން ޖެހި ހިސާބު ދިމާނުވެގެންކަމަށް އަބްދުއްރަހީމް ވަނީ ވިދާޅުވެފަ އެވެ.
އިލެކްޝަން ކޮމިޝަނުން ވޯޓުލާ ވަގުތު އިތުރުކުރުމާއި ގުޅިގެން އިދިކޮޅުން ދަނީ ކަންބޮޑުވުން ފާޅުކުރަމުން ނެވެ. އަދި އެކަމާއި ގުޅިގެން ވޯޓުލުން ކުރިއަށް ދިޔަ ސަރަހައްދުތަކުގައި ކޮންމެވެސް ވަރެއްގެ ނުތަނަވަސްކަމެއް ވެސް އުފެދިގެން ދިޔައެވެ.
Advertisement
This content is created and paid for by advertisers and does not involve Voice Journalists
