ޕީޕީއެމްގެ ނައިބުރައީސް އަދި މާލޭ ސިޓީގެ މޭޔަރު ޑރ މުޙައްމަދު މުއިއްޒުގެ ސުލޫކީ މައްސަލައެއް ރައީސް އަބްދުﷲ ޔާމީން އަބްދުލްގައްޔޫމުގެ އާއިލާއިން ޕީޕީއެމްގެ ސުލޫކީ ކޮމެޓީއަށް ހުށައަޅާފައިވާކަމަށް ބުނެ ފަތުރަނީ ދޮގު ޚަބަރެއްކަމަށް އެ ޕާޓީން ބުނެފި އެވެ.
ޕީޕީއެމްގެ ރިޔާސީ ޓިކެޓު ޕީޕީއެމްގެ ރައީސް އަބްދުﷲ ޔާމީން އަބްދުލްގައްޔޫމަށް ރަސްމީކޮށް ހަވާލުކޮށްފައި ވަނިކޮށް، ޑރ މުއިއްޒު ރިޔާސީ ޓިކެޓު ހޯއްދެވުމަށް އަމިއްލަފުލަށް ކެމްޕޭނު ކުރައްވަމުންދާކަމަށް ބުނެ ރައީސް ޔާމިނުގެ އާއިލާއިން ޕީޕީއެމްގެ ސުލޫކީ ކޮމިޓީއަށް ހުށައަޅާފައިވާކަމަށް މީސްމީޑިއާގައި ވަނީ ރިޕޯޓުކޮށްފަ އެވެ.
އެހެން ނަމަވެސް ޕީޕީއެމުން ވަނީ އެކަން ދޮގުކޮށްފަ އެވެ.
އެކަމާއި ގުޅޭގޮތުން ޕީޕީއެމްގެ ތަރުޖަމާނު ހީނާ ވަލީދު ވިދާޅުވީ ޑރ މުއިއްޒުގެ ސުލުކީ މައްސަލައެއް ބަލާކަމަށް ބުނެ ފަތުރަމުންދަނީ ދޮގު ޚަބަރެއް ކަމަށެވެ.
"ވީޕީ މުއިއްޒުގެ މައްސަލައެއް ސުލޫކީ ކޮމެޓީއިން ބަލާކަމަށް ބުނެ ދެކެވޭ ވާހަކައަކީ ހަޤީގަތެއް ނޫން"
ޕީޕީއެމްގެ ތަރުޖަމާނު ހީނާ ވަލީދު
ޕީޕީއެމްގެ ރިޔާސީ ކެންޑިޑޭޓަކީ ޕާޓީގެ ރައީސް އަބްދުﷲ ޔާމީން އަބްދުލްގައްޔޫމު ކަމަށް ކަނޑައަޅާފައިވަނީ ޕީޕީއެމް-ޕީއެންސީގެ ޖޮއިންޓް ކައުންސިލް އިއްތިފާގުން ނެވެ.
އެފަހުން އެމަނިކުފާނަށް ރަސްމީކޮށް ވަނީ ރިޔާސީ ޓިކެޓު ހަވާލުކުރައްވާފަ އެވެ. ވ. އާރަށުގެ މުއާމަލާތާއި ގުޅުވާ މިދިޔަ ޑިސެމްބަރު މަހުގެ 25 ވަނަ ކްރިމިނަލް ކޯޓުން އިއްވި 11 އަހަރުގެ ޖަލު ހުކުމެއް އެމަނިކުފާނު ތަންފީޒު ކުރައްވަމުން ގެންދެވި ނަމަވެސް އެ މައްސަލަ މިހާރު ވަނީ ހައި ކޯޓުގައި އިސްތިއުނާފު ކޮށްފަ އެވެ.
ހައިކޯޓު މަރުހަލާއިން ރައީސް ޔާމީން މިނިވަންވެ ވަޑައިގަންނަވާނެ ކަމުގެ ފުރިހަމަ ޔަގީންކަން އޮތްކަމަށް އިދިކޮޅު ކޯލިޝަންގެ ލީޑަޝިޕާއި އެމަނިކުފާނުގެ ޤާނޫނީ ޓީމުން ވިދާޅުވަމުންދާއިރު، ޕީޕީއެމްގެ ރިޔާސީ ޓިކެޓާއި ގުޅިގެން ޕާޓީގެ އެތެރޭގައި އެއްވެސް ޚިޔާލު ތަފާތުވުންތަކެއް ނެތްކަމަށް އިދިކޮޅު އިއްތިހާދުގެ ލީޑަރޝިޕުން ދަނީ ތަކުރާރުކޮށް ވިދާޅުވަމުން ނެވެ.
Advertisement
This content is created and paid for by advertisers and does not involve Voice Journalists
