ޕީޕީއެމަށް ނިސްބަތްވެ ވަޑައިގަންނަވާ މާލޭ ސިޓީ ކައުންސިލްގެ މެދު ހެންވޭރު ދާއިރާގެ މެމްބަރު އާދަމް ރަމީޒުގެ ސުލޫކީ މައްސަލައެއް ބަލަން ފެއްޓީ ފަހަރެއްގައި ރިޔާސީ ޓިކެޓާއި ގުޅިގެން، ނުވަތަ އެފަދަ މައްސަލައަކާއި ގުޅުމެއް އޮތް ކަމެއްގައި ނޫން ކަމަށް އިދިކޮޅު އިއްތިހާދު ވަގުތީގޮތުން ހިންގެވުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވެއްޖެ އެވެ.
އަބްދުއްރަހީމް އެކަން ހާމަކުރައްވާފައިވަނީ ރަމީޒުގެ ސުލޫކީ މައްސަލަބަލަން ރައީސް ޔާމިނަށް ވާދަނުކުރެވޭނެ ހާލަތެއްގައި ޕާޓީގެ ރިޔާސީ ޓިކެޓު މާލޭ ސިޓީގެ މޭޔަރު ޑރ މުޙައްމަދު މުއިއްޒަށް ހޯދާދިނުމަށް ރަމީޒު ކެމްޕޭނު ކުރައްވަމުން ގެންދަވާތީކަމަށް ރާއްޖޭގެ ބައެއް މީޑިއާތަކުން ރިޕޯޓު ކުރަމުންދާ ދަނޑިވަޅެއްގައި ޗެނަލް-13 އަށް ދެއްވި އިންޓަވިއުއެއްގަ އެވެ.
އަބްދުއްރަހީމް ވަނީ ރަމީޒުގެ ސުލޫކީ މައްސަލައާއި ގުޅިގެން ފަތުރަމުންްދާ ޚަބަރުތައް ދޮގުކުރައްވާފަ އެވެ.
"ރަމީޒުގެ މައްސަލަ މިތަނުގެ ސުލޫކީ ކޮމެޓީއަށް ދިޔަ. އެއީ އެއްގޮތަކަށްވެސް ރިޔާސީ ޓިކެޓާއި ގުޅިގެންނޫން. ދެން ޕާޓީގެ ތެރެއިން ހުންނާނެތާ ސުލޫކީ ފިޔަވަޅު އަޅަން ޖެހޭކަހަލަ މައްސަލަތައް. އޭގެ މައްސަލައެއް އެއީ. އެއީ ފަހަރެއްގައިވެސް ލީޑަޝިޕަށް ރައީސް ޔާމީން ވަކި އެއްޗެއް އަންގަވައިގެން ނޫނީ ރައީސް ވިދާޅުވެގެނެއް ނޫން. އެއީ އަޅުގަނޑުމެންނާއި ހަމަޔަށް މައްސަލައެއް އައިމަ އެ މައްސަލަ ބަލަން އަޅުގަނޑުމެން ނިންމީ"
ޕީއެންސީގެ ރައީސް އަބްދުއްރަހީމް އަބްދުﷲ
ރަމީޒުގެ ސުލޫކީ މައްސަލަ ބަލަމުން ދަނިކޮށް އޭނާ ވަނީ ޕީޕީއެމުން އިސްތިއުފާދީފަ އެވެ. އޭނާ ޕާޓީން ވަކިވެ ވަޑައިގަތީ ޕާޓީއަށް އެކަށީގެންވާ ވަގުތު ނުދެއްވާތީކަމަށް އޭނާ ވަނީ ވިދާޅުވެފަ އެވެ.
އަބްދުއްރަހީމް ވިދާޅުވީ ޕީޕީއެމްގެ ރިޔާސީ ކެންޑިޑޭޓަކީ ރައީސް އަބްދުﷲ ޔާމީން އަބްދުލްގައްޔޫމު ކަމަށެވެ.
އެކަމާމެދު ލީޑަޝިޕްގެ އެއްވެސް ބޭފުޅެއްގެ ޚިޔާލު ތަފާތުވުން ނެތް ކަމަށާއި، ލީޑަޝިޕްގެ ހުރިހާ ބޭފުޅުންވެސް މަސައްކަތްޕުޅު ކުރައްވަމުން ގެންދަވަނީ ކުރިއަށް އޮތް ރިޔާސީ އިންތިޚާބު ރައީށް ޔާމިނަށް ކާމިޔާބު ކޮށްދިނުމަށް ކަމަށް ތަކުރާރުކޮށް އަބްދުއްރަހީމް ވަނީ ވިދާޅުވެފަ އެވެ.
Advertisement
This content is created and paid for by advertisers and does not involve Voice Journalists
