ޕީޕީއެމަށް ނިސްބަތްވެ ވަޑައިގަންނަވާ މާލޭ ސިޓީ ކައުންސިލްގެ މެދު ހެންވޭރު ދާއިރާގެ މެމްބަރު އާދަމް ރަމީޒުގެ ސުލޫކީ މައްސަލައެއް ބަލަން ފެއްޓީ ފަހަރެއްގައި ރިޔާސީ ޓިކެޓާއި ގުޅިގެން، ނުވަތަ އެފަދަ މައްސަލައަކާއި ގުޅުމެއް އޮތް ކަމެއްގައި ނޫން ކަމަށް އިދިކޮޅު އިއްތިހާދު ވަގުތީގޮތުން ހިންގެވުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވެއްޖެ އެވެ. 

އަބްދުއްރަހީމް އެކަން ހާމަކުރައްވާފައިވަނީ ރަމީޒުގެ ސުލޫކީ މައްސަލަބަލަން ރައީސް ޔާމިނަށް ވާދަނުކުރެވޭނެ ހާލަތެއްގައި ޕާޓީގެ ރިޔާސީ ޓިކެޓު މާލޭ ސިޓީގެ މޭޔަރު ޑރ މުޙައްމަދު މުއިއްޒަށް ހޯދާދިނުމަށް ރަމީޒު ކެމްޕޭނު ކުރައްވަމުން ގެންދަވާތީކަމަށް ރާއްޖޭގެ ބައެއް މީޑިއާތަކުން ރިޕޯޓު ކުރަމުންދާ ދަނޑިވަޅެއްގައި ޗެނަލް-13 އަށް ދެއްވި އިންޓަވިއުއެއްގަ އެވެ. 

އަބްދުއްރަހީމް ވަނީ ރަމީޒުގެ ސުލޫކީ މައްސަލައާއި ގުޅިގެން ފަތުރަމުންްދާ ޚަބަރުތައް ދޮގުކުރައްވާފަ އެވެ. 

Advertisement

ރަމީޒުގެ ސުލޫކީ މައްސަލަ ބަލަމުން ދަނިކޮށް އޭނާ ވަނީ ޕީޕީއެމުން އިސްތިއުފާދީފަ އެވެ. އޭނާ ޕާޓީން ވަކިވެ ވަޑައިގަތީ ޕާޓީއަށް އެކަށީގެންވާ ވަގުތު ނުދެއްވާތީކަމަށް އޭނާ ވަނީ ވިދާޅުވެފަ އެވެ. 

އަބްދުއްރަހީމް ވިދާޅުވީ ޕީޕީއެމްގެ ރިޔާސީ ކެންޑިޑޭޓަކީ ރައީސް އަބްދުﷲ ޔާމީން އަބްދުލްގައްޔޫމު ކަމަށެވެ.

އެކަމާމެދު ލީޑަޝިޕްގެ އެއްވެސް ބޭފުޅެއްގެ ޚިޔާލު ތަފާތުވުން ނެތް ކަމަށާއި، ލީޑަޝިޕްގެ ހުރިހާ ބޭފުޅުންވެސް މަސައްކަތްޕުޅު ކުރައްވަމުން ގެންދަވަނީ ކުރިއަށް އޮތް ރިޔާސީ އިންތިޚާބު ރައީށް ޔާމިނަށް ކާމިޔާބު ކޮށްދިނުމަށް ކަމަށް ތަކުރާރުކޮށް އަބްދުއްރަހީމް ވަނީ ވިދާޅުވެފަ އެވެ.