ކުރިއަށް އޮތް ރިޔާސީ އިންތިޚާބާއި ގުޅިގެން އޮތް ކަންބޮޑުވުންތަކާއެކު ޕްރޮގްރެސިވް ކޮންގްރެސް ކޯލިޝަނުން އިލެކްޝަން ކޮމިޝަނާއި ބައްދަލުކޮށްފި އެވެ. 

އިލެކްޝަން ކޮމިޝަނާއި ބަދައްލުކުރުމަށްފަހު މީޑިއާތަކަށް މައުލޫމާތު ދެއްވަމުން ޕީޕީއެމްގެ ނައިބުރައީސް އަހުމަދު ޝިޔާމު ވަނީ އިންތިޚާބުތަކާއި ގުޅިގެން އިދިކޮޅުން ހިއްސާކުރި ކަންބޮޑުވުންތަކުގެ ތަފްސީލު ހިއްސާކުރައްވާފަ އެވެ. 

ޝިޔާމު ވިދާޅުވީ ނިމިގެން ދިޔަ ގުރައިދޫ ދާއިރާގެ ބައި-އިލެކްޝަނަށް ބަލާލި ނަމަވެސް، ނުވަތަ އޭގެ ކުރިން ބޭއްވި ކޮމަންޑޫ ދާއިރާގެ ބައި-އިލެކްޝަނަށް ބަލާލި ނަމަވެސް އިންތިޚާބާއި ދިމާކޮށް ދައުލަތުގެ ވަސީލަތްތައް ނަހަމަ ގޮތުގައި ބޭނުންކޮށްފައި އޮތްކަން ހާމަވެގެންދާނެ ކަމަށެވެ. 

ގުރައިދޫ އިންތިޚާބަށް އެކަނި ސަރުކާރުން ކުރި ޚަރަދުތަކަށް ބަލާއިރުވެސް އެއީ ކަނޑައެޅިގެން ނުފޫޒު ފޯރުވުމަށް ކުރަމުންދިޔަ ކަމެއްކަން ޔަގީން ކުރެވޭނެކަމަށް ޝިޔާމު ވިދާޅުވި އެވެ. 

ޝިޔާމު ވިދާޅުވީ ސްޓެލްކޯގެ ލޯންޗުފަހަރުތައް ބޭނުން ކުރުމާއި ސްޓެލްކޯގެ އެމްޑީ ހުންނަވައިގެން އިންތިޚާބުގައި ކުރަމުންދިޔަ ކަންކަން އަމިއްލަފުޅަށް ތަޖުރިބާވެސް ކުރެވިފައިވާ ކަމަށެވެ. އެ މައްސަލަތައް ހުށައެޅު ނަމަވެސް އެ މައްސަލަތައް ބަލާ ފިޔަވަޅު ނޭޅުމަކީ އިންތިހާއަށް ކަންބޮޑުވާގެ ގޮތުގައި އޭނާ ފާހަގަކުރެއްވި އެވެ. 

އަދި އެ ހާލަތު އެހެން އޮވެ ރިޔާސީ އިންތިޚާބާއި ބައްދަލުކުރަން ޖެހުމަކީ އިންތިޚާބުގެ ސައްހަކަމާމެދު ސުވާލު އުފެއްދުމުގެ ޖާގަ އޮތް ކަމެއްގެ ގޮތުގައި ޝިޔާމު ވިދާޅުވި އެވެ. 

ޝިޔާމު ވިދާޅުވީ 2023 ވަނަ އަހަރުގެ ރިޔާސީ އިންތިޚާބަށް އެންމެ ފުރަތަމަ ކެންޑިޑޭޓެއް ދެއްކީ ޕީޕީއެމުން ކަމަށެވެ. އެއީ އެ ޕާޓީގެ ރައީސް އަބްދުﷲ ޔާމީން އަބްދުލްގައްޔޫމު ކަމަށެވެ. 

އެހެން ނަމަވެސް އެމްއެމްޕީއާރުސީގެ މައްސަލަތަކާއި ގުޅުވާ އެމަނިކުފާނަށް ފުލުފުލުގައި ދައުވާތައް އުފުލަމުންދާއިރު، އެމަނިކުފާނާއި ދެކޮޅަށް ހެކިބަސް ދިނުމަށް ފުލުހުންގެ ތަހުގީގު ޓީމުން ހަރަކާތްތެރިވަމުންދާކަމަށް ޝިޔާމު ވިދާޅުވި އެވެ. އަދި އެއީ އިދިކޮޅުގެ ބޮޑު ކަންބޮޑުވުމެއްގެ ގޮތުގައި ފާހަގަކުރެއްވި އެވެ. 

ޝިޔާމު ވިދާޅުވީ ޕީޕީއެމްގެ ރިޔާސީ ކެންޑިޑޭޓަށް ވީތީ އަދި ވާދަވެރި ސިޔާސީ ލީޑަރަށް ވީތީ ރައީސް ޔާމިނަށް އަމާޒުކޮށްގެން ދައުވާ އުފުލަމުންދާކަމީ އެންމެންނަށް ވެސް އެނގޭ ކަމެއް ކަމަށެވެ. 

މި ސަރުކާރުގެ އުމުރުގެ ގިނަ ދުވަސްތަކެއް ރައީސް ޔާމިނަށް ހުންނަވަން ޖެހިވަޑައިފގަތީ ޖަލުގައި ކަމަށާއި، އެމަނިކުފާނަށް ސިޔާސީ މަސައްކަތް ނުކުރެވޭގޮތަށް ބަންދުކޮށްފައިވާ ބަހައްޓާ މަައްސަލަ އީސީގެ ސަމާލުކަމަށް ގެނެސްފައިވާނެކަމަށް ޝިޔާމު ވިދާޅުވި އެވެ. އަދި އެކަމަށް ޙައްލެއް ގެނެސްދިނުމަށް އީސީގެ އިމްތިޔާޒުތައް ބޭނުން ކުރުމަށް އެދިފައިވާނެ ކަމަށް ޝިޔާމު ވިދާޅުވި އެވެ. 

ވ އާރަށުގެ މުއާމަލާތާއި ގުޅުވާ ރައީސް އަބްދުﷲ ޔާމީން އަބްދުލްގައްޔޫމުގެ މައްޗަށް ދަށު ކޯޓުން ކުރި ހުކުމް ހައިކޯޓުގައި އިސްތިއުނާފުކޮށްފައިވާއިރު، އެ މައްސަލައިގައި ލސްކަމެއް އުޅޭކަން އީސީގެ ސަމާލުކަމަށް ގެނެސްފައިވާނެކަމަށް ޝިޔާމު ވިދާޅުވި އެވެ. 

ޝިޔާމު ވިދާޅުވީ މިދިޔަ ފެބްރުއަރީ މަހު ރައީސް ޔާމިނުގެ ފަރާތްޕުޅުން އާރަށު މައްސަލަ ހައިކޯޓުގައި މައްސަލަ އިސްތިއުނާފުކޮށްފައިވާ ކަމަށެވެ. އެހެން ނަމަވެސް އެ މައްސަލަ ރަޖިސްޓާކުރުމަށް ވެސް ހައިކޯޓުން ދިގު މުއްދަތެއް ނަގާފައިވާ ކަމަށާއި، އެ މައްސަލަ ރަޖިސްޓާ ކުރިފަހުން މިހާތަނަށް އެންމެ އަޑުއެހުމެއްވެސް ބާއްވާފައި ނުވާކަމަށެވެ. 

އިސްތިއުނާފީ މައްސަލަތައް ލަސްކުރުމަކީ ހައިކޯޓުގެ ރޫހާއިވެސް ޚިލާފު ކަމެއް ކަމަށާއި، އެ މައްސަލަ އަވަސްކުރުމަކީ މިހާރަށް ވަރަށް މުހިންމު ކަމެއްގެ ގޮތުގައި އިދިކޮޅު ކޯލިޝަނުން ދެކޭތީ އެކަން އީސީގެ ސަމާލުކަމަށްވެސް ގެނެސްފައިވާނެކަމަށް ޝިޔާމު ވިދާޅުވި އެވެ. 

އީސީއާއި ބައްދަލުކުރުމަށްފަހު އިދިކޮޅުން މީޑިއާތަކަށް މައުލޫމާތު ދެއްވަނީ

ޝިޔާމު އިތުރަށް ވިދާޅުވީ ރިިޔާސީ އިންތިޚާބަކީ މިނިވަން އިންތިޚާބެއްކަމަށް ކަށަވަރުކުރުމަށް އީސީން ވަރަށް ބޮޑަށް ފާރަވެރިވާން ޖެހޭ ކަމަށެވެ. އަދި އެމަގަށް އިންތިޚާބު ގެނައުމަށް ދުރާލާ މަސައްކަތްތަކެއް ކުރަން ޖެހޭ ކަމަށެވެ. 

އެއްވެސް ކެންޑިޑޭޓެއްގެ ހައްގަށް ހުރަސްއެޅޭކަމަށް ވާނަމަ، އެކަން ބަލައި ކެންޑިޑޭޓުންގެ ހައްގުތައް ކަށަވަރުކޮށްދިނުމަކީ އީސީން ކޮންމެހެން ކުރަން ޖެހޭ ކަމެއްކަމަށް ޝިޔާމު ވިދާޅުވި އެވެ. އެއާއެކު އޭނާ ވިދާޅުވީ ރިޔާސީ އިންތިޚާބަށް އިދިކޮޅުން ވެސް ވަރަށް ބޮޑަށް ފާރަވެރިވާނެކަމަށް ވިދާޅުވެފަ އެވެ. އަދި ރައީސް ޔާމިނުގެ އިންތިޚާބީ ހައްގުތައް ކަށަވަރުކުރުމަށް ކެނޑިނޭޅި މަސައްކަތްކުރައްވާނެ ކަމުގެ ޔަގީންކަން ދެއްވާފަ އެވެ.