ހދ. ކުމުންދޫ ނެރުމައްޗަށް ދޯންޏެއް އަރާ އޭގައި ތިބި މީހުންނާއި ތަކެއްޗަށް ބޮޑެތި ގެއްލުންތަކެއް ލިބިއްޖެ އެވެ. 

ނެރުމައްޗަށް އަރާފައި ވަނީ ކުމުންދާއި ކުޅުދުއްފުއްޓާއި ދެމެދު ދަތުރު ކުރާ "ކުރަނގި 2" ދޯންޏެވެ.

މިއަދު މެންދުުރު ހިނގި އެ ހާދިސާގައި ދޯނީގައި ހުރި އެކަކުގެ އަތް ވަނީ ބިންދައިގެން ގޮސްފަ އެވެ. އަދި އިތުރު މީހަކަށްވެސް އަނިޔާވެފައިވާކަމަށް މައުލޫމާތު ލިބެއެބެ. އެ ދެމީހުންނަށްވަނީ ކުމުންދޫ ސިއްހީ މަރުކަޒުގައި ފަރުވާ ދީފައެވެ. 

ރާޅު ބޮޑުވުމުގެ ސަބަބުން ހިނގި އެހާދިސާގައި އެ ދޯނިން ގެނައި ބައެއް މުދާ ވެސް ވަނީ ކަނޑަށް ދޫވެފަ އެވެ. އެ ރަށު ކައުންސިލު މެންބަރު، އަލީ ގާސިމް ވިދާޅުވީ އޭގެތެރެއިން ބައެއް މުދާ ކަނޑުމަތިން ނަގާފައިވާ ކަމަށެވެ. އެހެން ނަމަވެސް ގިނަ އަދަދެއްގެ މުދާ ކަނޑަށް ދޫވެގެން ގޮސްފައިވާކަމަށް އޭނާ ވިދާޅުވި އެވެ. 

އެ ރަށުގެ ކައުންސިލުން ބުނިގޮތުގައި ކުމުންދޫގެ ނެރުގެ މައްސަލައަކީ ރައްޔިތުން އަބަދުވެސް ކުރަމުން އަންނަ ޝަކުވާއެކެވެ. 187 ހެކްޓަރު ހުންނަ އެރަށުގެ ނެރު، އިރުމަތި ފަރާތުގައި ކަނޑާފައި ހުރުމުގެ ސަބަބުން ރާޅު ބޮޑުވާ މޫސުމެއްގައި ނަމަ އެރަށު ފަޅަށް ވަދެ ނުކުމެ އުޅުމަކީ ދަތިކަމެއްކަން ކައުންސިލުން ފާހަގަކުރެ އެވެ. 

ކުމުންދޫގައި މިފަދަ ނުރައްކާތެރި ހާދިސާއެއް ހިނގާފައިވާއިރު، އެ ރަށު ބަނދަރު އަޕްގްރޭޑް ކުރުމުގެ މަސައްކަތް ވަނީ އެމްޓީސީސީއާއި ހަވާލުކޮށްފަ އެވެ. 

އެ މަސައްކަތުގެ ތެރެއިން އެރަށު ވާޓަރު މަރާމާތު ކުރުމާއި އިތުރު 700 ފޫޓަށް ވާޓަރު ދަމާލުމާއި ބަނދަރު ބޮޑު ކުރުމުގެ އިތުރުން ޓީޖެޓީއެއް ގާއިމު ކުރުމާއި 290 މީޓަރުގެ ބޮޑުހިލަޖަހައި ބޭރުތޮއްޓެއް ލުމުގެ އިތުރުން 40 މީޓަރުގެ ބޮޑު ހިލައިގެ ރިވެޓްމަންޓު ޖެހުމާއި އަދި 60 މީޓަރުގެ ބޮޑު ހިލައިގެ ގްރޮއިން ޖެހުމުގެ މަސައްކަތް އެމްޓީސީސީން ކުރުމަށް ވަނީ ހަމަޖެހިފަ އެވެ.

ނަމަވެސް އެ މަސައްކަތުގެ ތެރެއިން ވެސް ބަނދަރު އެހެން ދިމާލަކަށް ބަދަލު ކުރުމަށް ނިންމާފައި ނުވުމަކީ ވަރަށް ބޮޑު ކަންބޮޑުވުމެއްގެ ގޮތުގައި އެ ރަށު ކައުންސިލުން ގެންދަނީ ފާހަގަކުރަމުން ނެވެ.