ޕްލާސްޓިކް ކޮތަޅުން އަގު ނަގަން ފެށުމާއި ގުޅިގެން ހުރި ކަންބޮޑުވުންތަކުގެ އަޑު އިއްވައި ދިނުމަށް އަންނަ ހުކުރު ދުވަހު "ކޮތަޅު"ގެ ނަމުގައި އިދިކޮޅު ޕީޕީއެމް/ޕީއެންސީން ހާއްސަ ޖަލްސާއެއް ބޭއްވުމަށް ނިންމައިފިއެވެ.

އިދިކޮޅުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޕީއެންސީގެ ނައިބު ރައީސް އަބްދުރަހީމް އަބްދުالله (އަދުރޭ) ވިދާޅުވީ  ކޮތަޅު މައްސަލައާއި ގުޅިގެން ބާއްވާ އެ ޖަލްސާ އޮންނާނީ ހުކުރު ދުވަހު ރޭގަނޑު 8:30 ގަައި އާޓިފިޝަލް ބީޗުގައިކަމަށެވެ. 

އަދުރޭ ވިދާޅުވީ އެ ޖަލްސާ "ކޮތަޅު"ގެ ނަމުގައި ބޭއްވި ނަމަވެސް މިހާރު ރާއްޖޭގެ ސިޔާސީ މަޝްރަހްގައި ހިނގަމުންދާ ވަރަށް ގިނަ ކަންކަމާ ގުޅޭ މައުލޫމާތު ރައްޔިތުންނަށް ލިބިގެން ދާނެކަމަށެވެ.

Advertisement

މީގެއިތުރުން އިދިކޮޅު އިއްތިހާދުގެ ލީޑަރު ކުރީގެ ރައީސް އަބްދުالله ޔާމީން އަބްދުލް ގައްޔޫމްއަށް މި ސަރުކާރުން ދެމުން ގެންދާ އަނިޔާގެ ވާހަކަވެސް އިދިކޮޅުގެ އެންމެހައި ޖަލްސާއެއްގައި ދައްކަމުންދާ އުސޫލުން އެ ޖަލްސާގައި ދައްކާނެކަމަށާ، ޖަލްސާގައި އެންމެ ބޮޑަށް ދެކެވޭނީ ވެސް އެވާހަކަ ކަމަށް އަދުރޭ ވިދާޅުވިއެވެ.

އެގޮތުން، މިސަރުކާރު ފެށުނީއްސުރެ ވެސް ރައީސް ޔާމީންއަށް އަނިޔާ ކުރާ ވާހަކަ އިދިކޮޅުން ދައްކަމުން އަންނަ ކަން އަދުރޭ ފާހަގަ ކުރެއްވިއެވެ. އަދި މީގެ ކުރިން ރައީސް ޔާމީންގެ މައްސަލަތައް ލައިވް ކޮށް ދައްކަމުން ދިޔަ ނަމަވެސް، މިހާރު ކްރިމިނަލް ކޯޓުގައި ކުރިއަށްދާ ފުއްގިރި މައްސަލައިގެ އަޑުއެހުންތައް ލައިވް ނުކުރާ ކަން ފާހަގަކުރައްވައި އަދުރޭ ވަނީ އެ މައްސަލަ އާއި ގުޅިގެން ކަމާބެހޭ ފަރާތްތަކާއި މަޝްވަރާ ކުރެއްވުމުގެ ކަންކަން ކުރަމުންދާ ކަމަށް ވިދާޅުވެފައެވެ.