ދުނިޔޭގެ ޤައުމުތަކާއި ގުޅުން ކަނޑާލައިގެން ރާއްޖެއަށް ވާނެ މޮޅެއް ނެތް ކަމަށް މަރަދޫ ދާއިރާގެ މެމްބަރު އިބްރާހިމް ޝަރީފް ވިދާޅުވެއްޖެއެވެ. 

ޝަރީފް މިހެން ވިދާޅުވީ އެމަނިކުފާނު ކުރެއްވެވި ޓްވީޓެއްގައެވެ. ޝަރީފް ވިދާޅުވެފައި ވަނީ ރާއްޖެއަކީ ދުނިޔޭގެ ކޯޓު ތަކުންނާއި ޔޫއެން އިން ނިންމާ ނިންމުންތައް ބަލައި ނުގަނެ ބޮލާލާ ޖެހޭ ވަރުގެ އާރާއި ބާރު ހުރި ޤައުމެއް ނޫން ކަމަށެވެ. އަދި ޤައުމު ތަކާއި އެކު އެކުވެރި ގުޅުމެއް ބޭއްވުމަކީ ރާއްޖެއަށް އެންމެ މަސްލަހަތު އޮތް ގޮތް ކަމަށެވެ.

"ދުނިޔޭގެ ގުޅުންތަކާއި ގުޅުން ކަނޑާލައިގެން ރާއަޖެއަށް ވާނެ މޮޅެއް ނެތް، ރާއްޖެގެ މަސްލަހަތަށް އެންމެ ފައިދާހުރި ގޮތަކީ ޤައުމިތަކާއި ގާތް ގުޅުމެއް ބޭއްވުން، ދުނިޔޭގެ ޤައުމު ތަކާއި ޖައްސާލައިގެން  އިދިކޮޅުން މިކުރާ މަސައްކަތަކީ ވަރަށް ނުރައްކާތެރި ކަމެއް" ޝަރީފް ވިދާޅުވެފައިވެއެވެ.

ޝަރީފް މިހެން ވިދާޅުވެފައި މިވަނީ ޗާގޯސް ގެ މައްސަލައިގައި ގޮތެއް ނިންމުން ހުކުރު ދުވަހަށް ތާވަލު ކުރެވި، މި މައްސަލައާއި ގުޅިގެން އެތައް ފާޑު ކިޔުންތަކެއް ސަރުކާރަށާއި ރައީސް އަށް އަމާޒުވަމުން ދާ ދުވަސް ވަރެއް ގައެވެ. 

ޗާގޯސް މައްސަލައިގައި ގޮތް ނިންމުމަށް ބާއްވާ އަޑު އެހުން ޖަރުމަނުގައި ހުންނަ އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް) ގައި މިމަހުގެ 28 ވަނަ ދުވަހުގެ 11:00 ގައި އޮންނާނެއެވެ. އެއީ ރާއްޖޭ ގަޑިން 8:00 ގައެވެ.