ޗާގޯސް މައްސަލައިގައި، އެކުގައި މަސައްކަތް ކުރަން ތިބި ކޮންމެ ބަޔަކާއެކު މަސައްކަތް ކުރާނެ ކަމަށް ޕީއެންސީގެ ރައީސް ޢަބްދުއްރަޙީމް (އަދުރޭ) ވިދާޅުވެއްޖެއެވެ.

އަބްދުއްރަހީމް މިހެން ވިދާޅުވީ، އިއްޔެ ހަވީރުު ޕީޕީއެމް އޮފީހުގައި ކުރިއަށްދިޔަ ނޫސްވެރިންގެ ބައްދަލުވުމުގައި ވާހަކަ ދައްކަވަމުންނެވ.

އަބްދުއްރަހީމް ވިދާޅުވީ ޗާގޯސް މައްސަލައިގައި އެހެން ޕާޓީތަކަށްވުރެ ކުރިން އިސްނެގީ ޕީޕީއެމް/ޕީއެންސީން ކަމަށާއި އެ މައްސަލައިގައި އެންމެ ފުރަތަމަ މަސައްކަތް ފެށީވެސް އެ ޕާޓީން ކަމަށެވެ.

Advertisement

"އެންމެ ފުރަތަމަ ކަމަކަށް، ޗާގޯސް މައްސަލައިގަ ދެންމެގަ ތި ވިދާޅުވި ޕާޓީތަކަށް ވުރެ ކުރިން އިސްނެގީ އަޅުގަނޑުމެން. މިދިޔަ އަހަރު ރައީސް ޔާމީނު މިނިވަންކޮށް ހުންނަވައިގެން އެންމެ ފުރަތަމަ މި މައްސަލައިގަ އިސްނަންގަވާ މަސައްކަތް ފެއްޓެވީ. އެ ދުވަހުން ފެށިގެން އަޅުގަނޑުމެން މި އަންނަނީ މި އަޑު އުފުލަމުން." އަބްދުއްރަހީމް ވިދާޅުވިއެވެ.

ޗާގޯސް މައްސަލައަކީ މައްސަލައެއްކަން ވެސް މި ސަރުކާރަށް ފާހަގަ ކުރެވުނީ ރިޔާސީ އިންތިހާބު ބޯމަތިވުމުންކަކަށް ތުހުމަތު ކުރައްވައި އަބްދުއްރަހީމް ވިދާޅުވީ ޕީޕީއެމްއިން މި ވާހަކަ ދައްކަނީ އިންތިހާބަކާ ގުޅުވައިގެން ނޫން ކަމަށެވެ.

"އަޅުގަނޑުމެން މި ދަންނަވަނީ މީ ގައުމީ މައްސަލައެކޭ. މި މައްސަލައިގަ އަޅުގަނޑުމެންނާއެކީގަ މަސައްކަތް ކުރަން ތިބި ކޮންމެ ބަޔަކާ އެކީގަ މަސައްކަތް ކުރަން ޕީޕީއެމް/ ޕީއެންސީ މިއޮތީ ތައްޔާރަށް" އަބްދުއްރަހީމް ވިދާޅުވިއެވެ.

ޗާގޯސް އައިލެންޑްސް އާއި ރާއްޖެއާ ދެމެދު އިން ކަނޑައަޅަން މޮރިޝަސް އިން އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީސް (އިޓްލޮސް) އަށް ހުށަހަޅާފައިވާ މައްސަލަ ނިމުނީ ރާއްޖެއިން ވަކާލާތު ކުރި ގޮތަށެވެ.

ރާއްޖެ އާއި ޗާގޯސް ޖަޒީރާއާ ދެމެދު އެއްވެސް ފަރާތަކަށް 200 ނޯޓިކަލް މޭލު ހަމަނުވެ، ހާއްސަ އިގުތިސޯދީ ސަރަހައްދު ފުށުއަރާ ގާތްގަނޑަކަށް 95،000 އަކަކިލޯމީޓަރުގެ ސަރަހައްދެއް އޮވެއެވެ.

އިޓްލޮސް އިން އެ މައްސަލައިގައި ހުކުމް އިއްވީ ފުށުއަރާ 200 ނޯޓިކަލް މޭލުގެ ސަރަހައްދު ރާއްޖެއާއި މޮރިޝަސްއާ ދެމެދު އެއްވަރަކަށް ބެހުމަށެވެ.

މި މައްސަލާގައި މޮރިޝަސްއިން ވަކާލާތު ކުރަމުން އައީ އިން ކަނޑައެޅުމުގައި ބްލެންހެމް ފަރުން މިން އަޅަން ފެށުމަށެވެ. ނަމަވެސް ރާއްޖޭން ވަކާލާތު ކުރަމުން އައީ މޮރިޝަސްއިން ބޭނުންވާ ފަދައިން ބްލެންހެމް ފަރުން މިންއެޅުމުގެ ބަދަލުގައި ޕެރޯސް ބަންހޯސްއާއި ސެލޮމަން އައިލެންޑްސް ދެ އަތޮޅުގައި ފާހަގަކުރާ ނުކުތާތަކަކުން ފެށިގެން ކަނޑުގެ ސަރަހައްދު މިންކުރުމަށެވެ.

ދެ ފަރާތުގެ ވާހަކައަށް ބެލުމަށް ފަހު އިޓްލޮސް އިން ނިންމީ މޮރިޝަސްގެ ހުށަހެޅުން ބަލައިނުގަނެވޭނެ ކަމަށެވެ. އަދި ބްލެންހެމް ފަރަކީ ބޭސްޕޮއިންޓުކަމަށް ކަމަށް ބެލުމަށް ޤަބޫލުކުރެވޭ މިންވަރަށް މޮރިޝަސްއަށް ހެކި ހުށަހެޅިފައިނުވާކަމަށް އިޓްލޮސްގައި މައްސަލަ ބެއްލެވި ޗެމްބަރުން ބުނެފައިވެއެވެ.

އެހެންކަމުން، ރާއްޖެއާއި ޗާގޮސްގެ މެދުގައިވާ ކަނޑުގެ ސަރަހައްދުން ފުށުއަރާ ސަރަހައްދު ބައިކުރާނީ ރާއްޖެއިން އެދުނު ގޮތަށް ޕެރޯސް ބަންހޯސްއާއި ސޮލަމަން އައިލެންޑްސް ދެ އަތޮޅުގައި ފާހަގަކުރާ ނުކުތާތަކުން ފެށިގެން ޗާގޮސްގެ ކަނޑުގެ ސަރަހައްދު މިންކޮށްގެން ކަމަށް އިޓްލޮސްގައި މައްސަލަ ބެއްލެވި ޗެމްބަރުން ވަނީ ނިންމާފައެވެ.