އިދިކޮޅު ކޯލިޝަންގެ ރިޔާސީ ކެންޑިޑޭޓް އަދި ކުރީގެ ރައީސް ރައީސް ޔާމީން އަބްދުލްގައްޔޫމް ގެ މައްޗަށް ކްރިމިނަލް ކޯޓާއި ހައިކޯޓުގައި ކުރިއަށްދާ މައްސަލަތަކާއި ގުޅިގެން ހުރި ކަންބޮޑުވުންތަކާއިއެކު އިދިކޮޅު ލީޑާޝިޕްގެ ދެ ބޭފުޅުން މިއަދު ކޮލޮމްބޯ އަށް ވަޑައިގަތުމަށް ހަމަޖެހިއްޖެއެވެ. 

އިދިކޮޅުން ބުނީ ކޮލޮމްބޯ އަށް ވަޑައިގަންނަވާނީ ޕީއެންސީގެ ނައިބު ރައީސް އަދި މާވަށު ދާއިރާގެ މެމްބަރު މުހައްމަދު ސައީދު އާއި ޕީއެންސީގެ ޕީޖީ ލީޑަރު މަޑުއްވަރީ ދާއިރާގެ މެމްބަރު އާދަމް ޝަރީފް ކަމަށެވެ. އެ ދެ ބޭފުޅުންގެ ކޮލޮމްބޯއަށް ކުރައްވާ މި ދަތުރުގައި ބޭރުގެ ޑިޕްލޮމެޓުންނާ ބައްދަލުކުރެއްވުމަށް ހަމަޖެހިފައިވާ ކަމަށް އިދިކޮޅުން މައުލޫމާތު ދެއެވެ. 

އެގޮތުން ބޭރުގެ ޑިޕްލޮމެޓުންނާއި ރައީސް ޔާމީންގެ ޝަރީއަތް ހިނގަމުންދާގޮތުގެ ކަންބޮޑުވުން ހިއްސާ ކުރައްވާނެ ކަން ވަނީ ފާހަގަކޮށްފައެވެ. 

އިދިކޮޅުން ބޭރުގެ ޑިޕްލޮމެޓުންނާއި ހިއްސާ ކުރައްވާނެ ކަމަށް ފާހަގަކޮށްފައިވާ ބައެއް ކަންކަން؛ 

1) ރައީސް ޔާމީންގެ އިސްތިއުނާފްގެ މައްސަލަ އަދިވެސް ތާވަލް ނުކުރާތީ އާއި ދަށު ކޯޓުގައި ހުރި މައްސަލަތައް ފަތުއަޑު ކިޔާފައި ކުރިއަށް ގެންދިޔުން

2) ރައީސް ޔާމީނަށް ގާނޫނުތަކުން ލިބެންޖެހޭ އެތަކެއް ހައްގުތަކެއް މިކަންކަމުގެ ސަބަބުން ގެއްލިގެންދާ މައްސަލަ

3) ދާދި ފަހުން ހޯމް މިނިސްޓަރ އިމްރާން އަބްދުالله ގެ ޓުވީޓުން ރައީސް ޔާމީނާއި ދޭތެރޭ ޒާތީ ވެފައިވާ މިންވަރު ހާމަވާތީއާއި އެކަމަކީ ރައީސް ޔާމީންގެ ރައްކާތެރިކަމާމެދު އެ ކޯލިޝަނުން ކަންބޮޑުވާ ކަމަކަށްވާތީ އެކަމާ ބެހޭ މައުލޫމާތު

4) ރައީސް ޔާމީނަކީ އިދިކޮޅު ކޯލިޝަންގެ ރިޔާސީ ކެންޑިޑޭޓަށްވާއިރު އެމަނިކުފާނަށް ކެމްޕެއިން ކުރުމުގެ ހައްގުތަކުން މަހްރޫމްކޮށް ސިޔާސީ ބޭނުމަކަށް ރައީސް ޔާމީން ޖަލަށް ލައިގެން މިސަރުކާރުން ގަސްތުގައި އަނިޔާދެމުންދާ މައްސަލައިގެ ކަންބޮޑުވުން 

ވ. އާރަށު މުއާމަލާތާއި ގުޅުވާ ރައީސް ޔާމިންގެ މައްޗަށް އުފުލާފައިވާ ދައުވާތައް ސާބިތުވާކަމަށް ކަނޑައަޅާ މިދިޔަ ޑިސެމްބަރު މަހު އެމަނިކުފާނުގެ މައްޗަށް ޖަލު ހުކުމެއް ކޮށްފައިވީ ނަމަވެސް އެއީ ނުހައްޤުން އިއްވާފައިވާ ހުކުމެއް ކަމަށާއި، ހައިކޯޓުގައި އޮތް އިސްތިއުނާފު މައްސަލަ އެމަނިކުފާނު ކާމިޔާބު ކުރައްވާނެކަމަށް އިދިކޮޅުން ދަނީ ބުނަމުންނެވެ. 

އަދި މީގެ އިތުރުން، އެމަނިކުފާނު ޖަލަށް ލައިގެން، އެ ޖަލުގައި ކެމެރާ ހަރުކޮށް، އެމަނިކުފާނު ކުރައްވާ ކަންކަން ހޯމް މިނިސްޓަރު ޢިމްރާން އަބްދުالله ބައްލަވާ ކަމަށްވެސް އިދިކޮޅުން ތުހުމަތު ކުރެއެވެ.