ދަރަންޏަކީ މިހާރު ސަރުކާރުން ވާހަކަދައްކަން ބޭނުންވާ މައުލޫއެއް ނޫން ކަމަށް ކުރީގެ އިކޮނޮމިކް މިނިސްޓަރު އަދި ރައްޔިތުންގެ މަޖިލީހުގެ މާވަށު ދާއިރާގެ މެމްބަރު މުޙައްމަދު ސައީދު ވިދާޅުވެއްޖެ އެވެ.
ސައީދު މިފަދައިން ވިދާޅުވެފައިވަނީ ދައުލަތުގެ ޖުމްލަ ދަރަނި 120 ބިލިއަން ހުރަސްކޮށްފައިވާއިރު، އަދި ސަރުކާރުގެ ދަރަނި އިތުރުވަމުންދާ ދިއުމާއި ގުޅިގެން ވޯލްޑް ބޭންކު ފަދަ ބައިނަލްއަގުވާމީ މާލީ އިދާރާތަކުން ދަރަނި ކުޑަ ކުރުމަށް އަންގަމުން ދިޔަ ނަމަވެސް އެކަންކަމަށް ސަރުކާރުން އަޅާނުލާކަން ފާހަގަކޮށް ޗެނަލް-13 ގެ ޕްރޮގްރާމެއްގައި ވާހަކަ ދައްކަވަމުން ނެވެ.
ސައީދު ވިދާޅުވީ ދިވެހިރާއްޖޭގެ ދަރަނި އިތުރުވީ ހަމައެކަނި ކޯވިޑް-19 ގެ ސަބަބުންކަމަށް ބުނުމަކީ ސަރުކާރުން އޮޅުވާލާ އޮޅުވާލުމެއް ކަމަށެވެ.
"ގެންނަވާ ހިތަށް، ގާތްގަނޑަކަށް 24 މަސް ދުވަހުގެ ވާހަކަ މި ދަންނަވަނީ. މި 24 މަސް ދުވަހު ކިހެނެއްތޯ ސަރުކާރު ގައުމު މެނޭޖުކުރީ، މާނައަކީ ކޯވިޑާއި ހެދިތޯ ގައުމު މިހާލަތަށް ވެއްޓުނީ. މި ވިސްނުންފުޅުގައި ބަހައްޓަވާތި. ބަލާއިރު ރާއްޖެއަށް އެންމެ ބައި ރުފިޔާއެއް ނުލިބުނު ނަމަވެސް މި ދެންނެވި 24 މަސް ދުވަހު ރާއްޖެއަށް އެންމެ ބޮޑު ލާރިއެއް ނުލިބުނު ނަމަވެސް ސަރުކާރުގައި ރައީސުލްޖުމްހޫރިއްޔާއެއް ނެތް ނަމަވެސް ބޭރު ގައުމުތަކުން ދީފި އެ 24 މަސް ދުވަސް ރާއްޖެ ހިންގޭވަރަށް ފައިސާ، ކޯވިޑް މެނޭޖު ކުރެވޭ ވަރަށް ފައިސާ"
މާވަށު ދާއިރާގެ މެމްބަރު/ ކުރީގެ އިކޮނޮމިކް މިނިސްޓަރު މުހައްމަދު ސައީދު
ސައީދު ވިދާޅުވީ ކޯވިޑަށް ފަހު ރާއްޖޭގެ ބޯޑަރުތައް ހުޅުވާލުމާއެކު ރިސޯޓުތައް ފުރި ބާރުވެގެން ގޮސްފައިވާ ކަމަށެވެ. އަދި ރާއްޖެއަށް ލިބެމުން އައި އާމްދަނީ އިތުރުވެގެން ގޮސްފައިވާ ކަމަށެވެ.
އެހެން ނަމަވެސް ދަރަނި އިންތިހާއަށް ދިޔައީ މައްޗަށް ކަމަށާއި، ނެލި ދަރަނިން ކުރި ކަމެއް ވެސް އުވަތަ ރައްޔިތުންނަށް ފައިދާހުރި އެސެޓެއްވެސް މިހާތަނަށް އުފެއްދިފައި ނުވާކަމަށް ސައީދު ވިދާޅުވި އެވެ.
ދައުލަތުގެ ދަރަނީގެ ވާހަކައަކީ މިއަދު ވަރަށް އާދައިގެ ވާހަކައަކަށް ވެއްޖެ ކަމަށާއި، ސަރުކާރުން ހަގީގަތުގައި މިހާރު ދަރަނީގެ ވާހަކަ ވެސް ދައްކަން ބޭނުން ނުވާކަމަށް ސައީދު ވިދާޅުވި އެވެ.
"ބިލިއަނުން މިލިއަނުން ކިޔަމުން ކިޔަމުން ގޮސް މިވެއްޖެ ދެން ވަރަށް އާދައިގެ ކަމަކަށް، 100 ބިލިއަނޭ ބުނީމަ އަބަދު އަޑު އިވި އިވި ނުވޭ އެހާބޮޑު ކަމަކަށް ވެސް. ސަރުކާރުން ވަރަށް އަޅާ ނުލާ މައުލޫއަށް ވެފަ މިއޮތީ"
މާވަށު ދާއިރާގެ މެމްބަރު/ ކުރީގެ އިކޮނޮމިކް މިނިސްޓަރު މުހައްމަދު ސައީދު
ސައީދު މިފަދައިން ވިދާޅުވެފައިވާއިރު މި ސަރުކާރުން މިހާތަނަށް 39 ލޯނެއް ވަނީ ނަގާފަ އެވެ. އެ ލޯނުތަކުގެ ތެރެއިން 2022 ވަނަ އަހަރު ނަގާފައިވަނީ ޖުމްލަ 8 ލޯނެވެ.
ފިނޭންސް މިނިސްޓްރީން އާންމުކޮށްފައިވާ ހިސާބުތަކަށް ބަލާއިރު މާލޭގެ ކުނި މެނޭޖުކުރުމުގެ ނިޒާމު ހަރުދަނާކޮށް ކުނިން ހަކަތަ އުފެއްދުމުގެ ނިޒާމު ރަނގަޅުކުރުމަށް 18 މިލިއަން އެމެރިކާ ޑޮލަރުގެ ލޯނެއް އިސްލާމިކް ޑިވެލޮޕްމެންޓު ބޭންކުން ނަގާފައިވެއެވެ.
ބަޖެޓު ސަޕޯޓު ލޯނެއްގެ ގޮތުގައި 100 މިލިއަން އެމެރިކާ ޑޮލަރުގެ ލޯނެއް ސީއެފްއެސްއައިޓީން ނަގާފައިވެއެވެ. އަދި މަސްވެރިކަމުގެ ސިނާއަތަށް އެހީތެރިވުމަށް އިސްލާމިކް ޑިވެލޮޕްމެންޓު ބޭންކުން 8.7 މިލިއަން ޑޮލަރުގެ ލޯނެއް ނަގާފައިވެއެވެ. އައިއެންޖީއާއި އޭބީއެން އެމްރޯއާއި އިތުރު ބޭންކަކުން ގުޅިފަޅު ހިއްކުމުގެ މަޝްރޫޢު ހިންގުމަށް 101.7 މިލިއަން ޔޫރޯ ނުވަތަ 111 މިލިއަން ޑޮލަރުގެ ލޯނެއް ނަގާފައިވެއެވެ.
ކޮވިޑް-19 ހެލްތު ފެސިލިޓީގެ ގޮތުގައި ޔޫރަޕިއަން އިންވެސްޓުމެންޓު ބޭންކުން އިތުރު 18 މިލިއަން ޔޫރޯ ނުވަތަ 20.2 މިލިއަން ޑޮލަރު ނަގާފައިވެއެވެ. ފުލުހުސް ސްޓޭޝަންތަކެއް އެޅުމަށް 40 މިލިއަން ޑޮލަރު އިންޑިއާގެ އެގްޒިމް ބޭންކުން، ބޭނުންކުރާ ވަކި ކަމެއް ބަޔާންނުކޮށް 100 މިލިއަން ޑޮލަރުގެ ލައިން އޮފް ކްރެޑިޓެއް އެގްޒިމް ބޭންކުން ނަގާފައިވެއެވެ.
އަތޮޅު ތެރޭގެ ތައުލީމުގެ ފެންވަރު ރަނގަޅުކުރުމުގެ މަޝްރޫޢެއް ހިންގުމަށް ކަމުގައި ބުނެ، އިންޓަނޭޝަނަލް ޑިވެލޮޕްމެންޓް އެސޯސިއޭޝަނުން 4.5 މިލިއަން ޑޮލަރުގެ ލޯނެއް ނަގާފައިވެއެވެ.
ފާއިތުވި އަހަރު ނެގި މި 8 ލޯނުގެ ޖުމްލަ އަދަދަކީ 404.5 މިލިއަން އެމެރިކާ ޑޮލަރެވެ. ދިވެހި ރުފިޔާއިންނަމަ އެއީ 6.2 ބިލިއަން ރުފިޔާއެވެ.
Advertisement
This content is created and paid for by advertisers and does not involve Voice Journalists
