ދަރަންޏަކީ މިހާރު ސަރުކާރުން ވާހަކަދައްކަން ބޭނުންވާ މައުލޫއެއް ނޫން ކަމަށް ކުރީގެ އިކޮނޮމިކް މިނިސްޓަރު އަދި ރައްޔިތުންގެ މަޖިލީހުގެ މާވަށު ދާއިރާގެ މެމްބަރު މުޙައްމަދު ސައީދު ވިދާޅުވެއްޖެ އެވެ. 

ސައީދު މިފަދައިން ވިދާޅުވެފައިވަނީ ދައުލަތުގެ ޖުމްލަ ދަރަނި 120 ބިލިއަން ހުރަސްކޮށްފައިވާއިރު، އަދި ސަރުކާރުގެ ދަރަނި އިތުރުވަމުންދާ ދިއުމާއި ގުޅިގެން ވޯލްޑް ބޭންކު ފަދަ ބައިނަލްއަގުވާމީ މާލީ އިދާރާތަކުން ދަރަނި ކުޑަ ކުރުމަށް އަންގަމުން ދިޔަ ނަމަވެސް އެކަންކަމަށް ސަރުކާރުން އަޅާނުލާކަން ފާހަގަކޮށް ޗެނަލް-13 ގެ ޕްރޮގްރާމެއްގައި ވާހަކަ ދައްކަވަމުން ނެވެ. 

ސައީދު ވިދާޅުވީ ދިވެހިރާއްޖޭގެ ދަރަނި އިތުރުވީ ހަމައެކަނި ކޯވިޑް-19 ގެ ސަބަބުންކަމަށް ބުނުމަކީ ސަރުކާރުން އޮޅުވާލާ އޮޅުވާލުމެއް ކަމަށެވެ. 

ސައީދު ވިދާޅުވީ ކޯވިޑަށް ފަހު ރާއްޖޭގެ ބޯޑަރުތައް ހުޅުވާލުމާއެކު ރިސޯޓުތައް ފުރި ބާރުވެގެން ގޮސްފައިވާ ކަމަށެވެ. އަދި ރާއްޖެއަށް ލިބެމުން އައި އާމްދަނީ އިތުރުވެގެން ގޮސްފައިވާ ކަމަށެވެ. 

އެހެން ނަމަވެސް ދަރަނި އިންތިހާއަށް ދިޔައީ މައްޗަށް ކަމަށާއި، ނެލި ދަރަނިން ކުރި ކަމެއް ވެސް އުވަތަ ރައްޔިތުންނަށް ފައިދާހުރި އެސެޓެއްވެސް މިހާތަނަށް އުފެއްދިފައި ނުވާކަމަށް ސައީދު ވިދާޅުވި އެވެ. 

ދައުލަތުގެ ދަރަނީގެ ވާހަކައަކީ މިއަދު ވަރަށް އާދައިގެ ވާހަކައަކަށް ވެއްޖެ ކަމަށާއި، ސަރުކާރުން ހަގީގަތުގައި މިހާރު ދަރަނީގެ ވާހަކަ ވެސް ދައްކަން ބޭނުން ނުވާކަމަށް ސައީދު ވިދާޅުވި އެވެ. 

ސައީދު މިފަދައިން ވިދާޅުވެފައިވާއިރު މި ސަރުކާރުން މިހާތަނަށް 39 ލޯނެއް ވަނީ ނަގާފަ އެވެ. އެ ލޯނުތަކުގެ ތެރެއިން 2022 ވަނަ އަހަރު ނަގާފައިވަނީ ޖުމްލަ 8 ލޯނެވެ.

ފިނޭންސް މިނިސްޓްރީން އާންމުކޮށްފައިވާ ހިސާބުތަކަށް ބަލާއިރު މާލޭގެ ކުނި މެނޭޖުކުރުމުގެ ނިޒާމު ހަރުދަނާކޮށް ކުނިން ހަކަތަ އުފެއްދުމުގެ ނިޒާމު ރަނގަޅުކުރުމަށް 18 މިލިއަން އެމެރިކާ ޑޮލަރުގެ ލޯނެއް އިސްލާމިކް ޑިވެލޮޕްމެންޓު ބޭންކުން ނަގާފައިވެއެވެ.

ބަޖެޓު ސަޕޯޓު ލޯނެއްގެ ގޮތުގައި 100 މިލިއަން އެމެރިކާ ޑޮލަރުގެ ލޯނެއް ސީއެފްއެސްއައިޓީން ނަގާފައިވެއެވެ. އަދި މަސްވެރިކަމުގެ ސިނާއަތަށް އެހީތެރިވުމަށް އިސްލާމިކް ޑިވެލޮޕްމެންޓު ބޭންކުން 8.7 މިލިއަން ޑޮލަރުގެ ލޯނެއް ނަގާފައިވެއެވެ. އައިއެންޖީއާއި އޭބީއެން އެމްރޯއާއި އިތުރު ބޭންކަކުން ގުޅިފަޅު ހިއްކުމުގެ މަޝްރޫޢު ހިންގުމަށް 101.7 މިލިއަން ޔޫރޯ ނުވަތަ 111 މިލިއަން ޑޮލަރުގެ ލޯނެއް ނަގާފައިވެއެވެ.

ކޮވިޑް-19 ހެލްތު ފެސިލިޓީގެ ގޮތުގައި ޔޫރަޕިއަން އިންވެސްޓުމެންޓު ބޭންކުން އިތުރު 18 މިލިއަން ޔޫރޯ ނުވަތަ 20.2 މިލިއަން ޑޮލަރު ނަގާފައިވެއެވެ. ފުލުހުސް ސްޓޭޝަންތަކެއް އެޅުމަށް 40 މިލިއަން ޑޮލަރު އިންޑިއާގެ އެގްޒިމް ބޭންކުން، ބޭނުންކުރާ ވަކި ކަމެއް ބަޔާންނުކޮށް 100 މިލިއަން ޑޮލަރުގެ ލައިން އޮފް ކްރެޑިޓެއް އެގްޒިމް ބޭންކުން ނަގާފައިވެއެވެ.

އަތޮޅު ތެރޭގެ ތައުލީމުގެ ފެންވަރު ރަނގަޅުކުރުމުގެ މަޝްރޫޢެއް ހިންގުމަށް ކަމުގައި ބުނެ، އިންޓަނޭޝަނަލް ޑިވެލޮޕްމެންޓް އެސޯސިއޭޝަނުން 4.5 މިލިއަން ޑޮލަރުގެ ލޯނެއް ނަގާފައިވެއެވެ.

ފާއިތުވި އަހަރު ނެގި މި 8 ލޯނުގެ ޖުމްލަ އަދަދަކީ 404.5 މިލިއަން އެމެރިކާ ޑޮލަރެވެ. ދިވެހި ރުފިޔާއިންނަމަ އެއީ 6.2 ބިލިއަން ރުފިޔާއެވެ.