އިންތިހާބަށް ހަތަރު މަހަށް ވެފައިވަނިކޮށް މުޅި ހުޅުމާލޭގެ ރައްޔިތުންނަށް ބޮޑު އާމްދަނީ އެއްހޯދުމަށް ޕްލޭންކޮށްފައޮތް ފުރުސަތު ގެއްލުވާލަން ނިންމާފައިވުމަކީ ސަރުކާރަށް ރައްޔިތުންގެ ތާއީދެއް އެވެސް ވަރަކަށް ނެތްކަން ސާފުވާކަމެއް ކަމަށް އެސްޓީއޯގެ ކުރީގެ އެމްޑީ ހުސެއިން އަމްރު ވިދާޅުވެއްޖެ އެވެ.

ހުޅުމާލެ ތަރައްޤީ ކުރުމުގެ މާސްޓަރ ޕްލޭނަށް ބަދަލު ގެނެސް، ހުޅުމާލޭގެ ޔޮޓް މެރީނާ ސަރަހައްދު ހިއްކަން ނިންމާފައިވާ ކަމަށް ދެކެވޭ ވާހަކަތަކާއި ގުޅިގެން އަމްރު ނެރުނު ނޫސްބަޔާނެއްގައި ވިދާޅުވީ މާސްޓާ ޕްލޭން އަކީ ދުރު ރާސްތާ ތަރައްޤީ ކުރިއަށްގެންދާނެގޮތް ބައްޓަންކޮށް ފަރުމާކުރުމުގެ މަގުސަދުގައި ތަރައްގީއާ ގުޅޭ އެކު ދާއިރާ ތަކުގެ ސިފަ ތަކާއި، ބޭނުން ތަކަށް ވިސްނުމަށްފަހު، އެންމެ ފައިދާ ހުރި، ނަފާވާ ގޮތްތައް ފާހަގަކޮށްގެން އެކުލަވާލެވޭ ދުރުރާސްތާ ތަސައްވުރެއް ކަމަށެވެ.

އަމްރު ވިދާޅުވީ، ރަށެއް އާބާދުކުރާއިރު އެ ރަށެއްގައި ދިރި އުޅޭ މީހުންނަށް އާމްދަނީ ލިބޭނެ ފުރުސަތު ހޯދޭނެ ޖާގަ ކަނޑައެޅިފައި އޮންނަން ވާނެ ކަމަށާ، އަދި އެ ރަށެއްގެ މީހުން އިޖްތިމާއީ ކަންކަންކޮށް ހިތްހަމަޖެއްސޭނެ މަގުވެސް ފަހިވެފައި އޮންނަންވާނެ ކަމަށެވެ. 

މިއާއެކު އަމްރު ވިދާޅުވީ، ރަށުގައި ގޯތި ގެދޮރު ހޯދޭނެ މަގު ތަނަވަސްކޮށްދޭން ވާނެ ކަމަށާއި ނަމަވެސް އެ ގޯތި ގެދޮރުގައި އުޅޭ މީހުންނަށް އާމްދަނީ ލިބޭނެ މަގު ބަންދުކުރުމަކީ ރައްޔިތުންނަށް ހިދުމަތްކޮށްދޭން އޮންނަ ސަރުކާރަކުން ކުރާނެ ކަމެއް ނޫން ކަމަށެވެ. 

އަމްރު ވިދާޅުވީ، ކުރޫސް ޝިޕަކުން އެތަށް ހާސް ފަތުރުވެރިންނެއް އަންނަ ކަމަށާއި، ނަމަވެސް މާލެއަށް އަދި ހުޅުމާލެ އަށް ކުރޫސް ޝިޕްތަށް ކައިރި ނުކުރެވޭތީ އެ ބޯޓުން މާލެ ފައިބަނީ މަދު ބައެއް ކަމަށެވެ. އެހެން ކަމުން ހުޅުމާލެއަށް ކުރޫސް ބަނދަރު ކުރެވޭނެ ޓާމިނަލެއް އޮވެއްޖެނަމަ އެކަމުގެ ސަބަބުން ވަޒީފާތަށް އުފެދި އާމްދަނީ އިތުރުވެ ރައްޔިތުންގެ ދިރިއުޅުން ތަނަވަސް ވެގެން ދާނެކަމަށް ވެސް އަމްރު ވިދާޅުވިއެވެ.

މީގެ އިތުރުން އަމްރު ވިދާޅުވީ، ހުޅުމާލޭގެ ދިގު ރާސްތާގެ މާސްޓާ ޕްލޭނުގައި އެ ސަރަހައްދުގައި އެކަން ރާވާފައިވަނީ މި ހުރިހާ ކަމަކަށް ކަމާބެހޭ މާހިރުން ވަރަށް ފުޅާކޮށް ވިސްނުމަށްފަހު ކަމަށެވެ.

ނަމަވެސް 5 އަހަރު ވާއިރު، ސަރުކާރުން ރައްޔިތުންނަށް ބޯހިޔާވަހިކަން ފޯރުކޮށްނުދެވުމުން އިންތިޚާބަށް ހަތަރު މަހަށް ވުމުން މުޅި ހުޅުމާލޭގެ ރައްޔިތުންނަށް ބޮޑު އާމްދަނީ އެއްހޯދުމަށް ޕްލޭންކޮށްފައޮތް ފުރުސަތު ގެއްލުވާލަން ނިންމި ކަމަކީ ސަރުކާރަށް ރައްޔިތުންގެ ތާއީދެއް އެވެސް ވަރަކަށް ނެތްކަން ސާފުވާކަމެކެވެ.