ހުޅުމާލޭ ފަޅު ހިއްކައިފިނަމަ ހުޅުލެއަށް އަސަރު ކުރާނެ ކަމަށް މާވަށު ދާއިރާގެ މެންބަރު މުހައްމަދު ސަޢީދު ވިދާޅުވެއްޖެއެވެ.

ހުޅުމާލެ އިން އިތުރަށް ބިން ހިއްކުމަށް ސަރުކާރާއި އާބަންކޯ މަޝްވަރާ ކުރަމުން ދާ މި ދަނޑިވަޅުގައި ސައީދު ކުރި ޓުވީޓެއްގައި ވިދާޅުވީ އެންވަޔަރަންމެންޓް މިނިސްޓްރީގެ ފަރާތުން ހުޅުމާލޭ ފަޅު ހިއްކުން ހުއްޓަންޖެހޭ ކަމަށެވެ.

"ހުޅުމާލޭގެ މާސްޓަރޕްލޭން ބަދަލުކޮށް ފަޅުހިއްކައިފިނަމަ ހުޅުލެއަށް އަސަރުކުރާނެ. ރައީސް ޞާލިޙުފަދަ ނޭފަތުކުރިއަށް ވިސްނާ ވެރިން ލިބުމަކީ ލައިބިލިޓީ އަކަށްވަނީ މިހެންވެ،" ސައީދު ވިދާޅުވިއެވެ.

Advertisement

ހުޅުމާލޭގެ ފޭސް އެކެއް އަދި ފޭސް 2 ބޭރުން ހިއްކަން މަޝްވަރާ ކުރާ ސަރަހައްދަކީ ކުރިން ޔޮޓް މެރީނާއަކާއި ކުރޫޒް ޓާމިނަލެއް ތަރައްޤީކުރުމަށް ޚާއްޞަކޮށްފައިވާ ފަޅެކެވެ. އެކަން ކުރުމަށް ކުރީ ސަރުކާރުން އެ ފަޅުގައި 2، 3 ރަށްވެސް ހިއްކާފައިވެއެވެ.

ރާއްޖޭގައި ކުރޫޒު ޓާމިނަލެއް އަދި އެކަށީގެންވާ މިންވަރުގެ ޔޮޓު މެރީނާއެއް ނެތުމުން އެކަމަށް ޚާއްޞަކޮށް މި ފަޅު ތަރައްޤީކުރަން އެއިރު ނިންމިއެވެ.

މި ދަނޑިވަޅަކީ މާލޭގެ ރަށް ވެހިންނަށް ގޯތި ދޫކުރާ ވާހަކަ ދެކެވިފައިވާ ދަނޑި ވަޅެކެވެ. ހުޅުމާލެ އިން އިތުރު ތަނެއް ހިއްކާ ވާހަކަ އިޢްލާނު ކުރުމާއި އެކު އާންމުން ދަނީ ކަންބޮޑުވުން ފާޅު ކުރަމުންނެވެ.