ޗާގޯސް މައްސަލައިގައި ރާއްޖޭގެ މަސްކަނޑުން ގެއްލުނު ސަރަހައްދު އަނބުރާ ހޯދަން މަޖިލީހަށް ގަރާރެއް ހުށަހަޅައިފިއެވެ.

މި ގަރާރު ހުށަހަޅާފައި ވަނީ ރައްޔިތުންގެ މަޖިލީހުގެ މަޑުއްވަރީ ދާއިރާގެ މެމްބަރު އާދަމް ޝަރީފް އުމަރުއެވެ.

އެ ގަރާރުގައި ވަނީ، ދިވެހިންނަކީ ޒަމާނުއްސުރެ މަސްވެރިކަމުން ކެއިންބުއިމާއި އަސާސީ ބޭނުންތައް ފުއްދަމުން އައި ބައެއް ކަމަށާއި އިގްތިސޯދީ ސަރަހައްދުން 200 ނޯޓިކަލް މޭލު ބޭރަށް ނުކުމެވޭ ވަރަށް ބޮޑެތި އޮޑިދޯނިފަހަރު އުފައްދާފައިވާ ކަމަަށެވެ.

Advertisement

ނަމަވެސް އައްޑޫ ދެކުނުން އޮންނަ މަސްކަނޑުން 45،331 އަކަކިލޯމީޓަރު ރާއްޖެއަށް ގެއްލޭގޮތަށް އިޓްލޮސްއިން ނިންމިއިރު ދިވެހި ސަރުކާރުން ދިވެހި މަސްކަނޑުގެ ދިފާއުގައި ނުނިކުންނަ ކަމަށް އެ ގަރާރުގައި ފާހަގަ ކުރިއެވެ.

ދިވެހިރާއްޖޭގެ ހާއްސަ އިގްތިސޯދީ ސަރަހައްދުގެ ތެރޭގައި ހިމެނޭ ކަނޑުގައްޔާއި، ކަނޑުގެ އަޑީގެ ބިމުގައިވާ ދިރުންހުރި އަދި ދިރުމެއްނެތް ޠަބީޢީ އަގުހުރި ހުރިހާ އެއްޗެއް މިލްކުވެގެން ވަނީ ދިވެހި ދައުލަތަށް ކަމަށް ގާނޫނުގައި ބަޔާންކުރާއިރު، އަދި ދިވެހި މަސްކަނޑަކީ ރާއްޖޭގެ އިގްތިސޯދީ ބާރުތަކާ ގުޅުންހުރި ތަނަކަށްވާއިރު ރާއްޖެއަށް ގެއްލުން ލިބޭ ފަދަ ގޮތަކަށް ސަރުކާރުގެ ސްޓޭންޑް ބަދަލު ކުރުމުގެ ސަބަބުން ލިބުނު ގެއްލުމަށް ދިވެހިންގެ ކިބައިން ސަރުކާރުން މައާފަށް އެދުމަށް އެ ގަރާރުގައި ވަނީ ގޮވާލާފައެވެ.

މީގެ އިތުރުން އެ ގަރާރުގައި ބުނީ އިޓްލޮސްގެ ނިންމުން ދިވެހިން ބަލައި ނުގަންނަ ކަމަށެވެ. އަދި އެ ނިންމުން މުރާޖަޢާ ކުރުމަށް ދިވެހި ސަރުކާރުގެ ފަރާތުން ހުށަހަޅަން ޖެހޭ ކަމަށާއި ދިވެހި މަސްކަނޑުން ގެއްލުނުބައި ހޯދުމަށް ކުރަންޖެހޭ ކަންތައްތައް އަވަހަށް ފަށަން ޖެހޭ ކަމަށެވެ.