ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ފިޔަވައި "ފިކުރެއްގެ ދިރުން" ގޮތްޕަށް ނިސްބަތްވެވަޑައިގަންނަވާ މެންބަރުން އެމްޑީޕީން ވަކިވުމަކީ މިވަގުތު އެ ޕާޓީއަށް ލިބުނު ބޮޑު ކުރިއެރުމެއް ކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އިބްރާހީމް ޝަރީފް (މަވޯޓާ) ވިދާޅުވެއްޖެއެވެ. 

އެމްޑީޕީގެ ރައީސް މުހައްމަދު ނަޝިދުގެ 'ފިކުރެއްގެ ދިރުން' ފެކްޝަނަށް ނިސްބަތްވެވަޑައިގަންނަވާ ރައްޔިތުންގެ މަޖިލީހުގެ 12 މެންބަރަކު މިއަދު ވަނީ އެ ޕާޓީން ވަކިވެވަޑައިގެންފައެވެ. 

އެކަމާއި ގުޅިގެން މަވޯޓާ ކުރެއްވި ޓްވީޓެއްގައި ވަނީ އެއީ ޕާޓީއަށް ލިބުނު ބޮޑު ކުރިއެރުމެއް ގޮތުގައި ސިފަ ކުރައްވާފައެވެ. އަދި ފާއިތުވެދިޔަ 4 އަހަރުގައި އެ މެންބަރުން މަސައްކަތް ކުރެއްވީ ޕާޓީ ފުނޑާލައި ސަރުކާރު އިދަ ޖައްސާލަން ކަމަށްވެސް އޭނާ ވިދާޅުވި އެވެ. 

އެސްޓީއޯގެ ކުރީގެ މެނޭޖިން ޑިރެކްޓަރު ހުސައިން އަމްރު އާއި އެމްޑީޕީގެ ނާއިބު ރައީސް މުހައްމަދު ޝިފާޒު އާއި އެމްޑީޕީއަށް ނިސްބަތްވެވަޑައިގަންނަވާ 12 މަޖިލިސް މެންބަރުން ހިމެނޭހެން ޖުމްލަ 14 މެންބަރުން މިއަދު ވަނީ އެމްޑީޕީން ވަކިވެވަޑައިގެންފައެވެ. 

އެގޮތުން ޕާޓީން ވަކިވި އެމްޑީޕީގެ މަޖިލިސް މެމްބަރުންނަކީ؛

1- މަޖިލީހުގެ ނައިބު ރައީސް، ގަލޮޅު އުތުރު ދާއިރާގެ މެންބަރު އީވާ އަބްދުالله

2- އެމްޑީޕީގެ ކުރީގެ ޗެއާޕާސަން، ހެންވޭރު ހުޅަނގު ދާއިރާގެ މެންބަރު ހަސަން ލަތީފް

3-މާފަންނު އުތުރު ދާއިރާގެ މެންބަރު އިމްތިޔާޒު ފަހުމީ (އިންތި)

4-މާފަންނު މެދު ދާއިރާގެ މެންބަރު އިބްރާހިމް ރަޝީދު (ބޮންޑޭ)

5-މައްޗަންގޮޅި އުތުރު ދާއިރާގެ މެންބަރު މުހައްމަދު ރަޝީދު (ބޯދިގު)

6-ކުޅުދުއްފުށި އުތުރު ދާއިރާގެ މެންބަރު ޔާސިރު އަބްދުލް ލަތީފު

7-ވިލުފުށީ ދާއިރާގެ މެންބަރު ހަސަން އަފީފް

8-އުނގޫފާރު ދާއިރާގެ މެންބަރު މުހައްމަދު ވަހީދު (ވައްޑެ)

9-ތޮއްޑޫ ދާއިރާގެ މެންބަރު ހަސަން ޝިޔާން (ގިޓާ)

10-މަޑެވެލީ ދާއިރާ މެންބަރު ހުސައިން ފިރުޝާން

11-ގައްދޫ ދާއިރާގެ މެންބަރު އަހްމަދު ޒާހިރު

12-ހުޅުދޫ ދާއިރާގެ މެންބަރު އިލްޔާސް ލަބީބް

އެ މެންބަރުން ޕާޓީން ވަކިވެވަޑައިގެންނެވި ނަމަވެސް ޕާޓީގެ ރައީސް މުހައްމަދު ނަޝީދު އަދިވެސް ހުންނެވީ އެމްޑީޕީގެ މެންބަރެއްގެ ގޮތުގައެވެ.