ފެކަން ކޯޕަރޭޝަން އަކީ ދިވެހިރާއްޖޭގައި 24 ގަޑިއިރު ކަރަންޓްގެ ޚިދުމަތް ފޯރުކޮށްދޭ ހަމައެކަނި ކުންފުނި ކަމަށާ، އެކުންފުނި ސުންނާފަތި ކޮށްލިއަ ނުދެއްވާނެ ކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އިބްރާހީމް ޝަރީފް (މަވޯޓް) ވިދާޅުވެއްޖެއެވެ.
މަވޯޓާ މިފަދައިން ވިދާޅުވީ މިއަދުގެ ރައްޔިތުންގެ މަޖިލީހުގެ ޖަލްސާގައި ފެނަކަ ކޯޕަރޭޝަނުން ކުދި ވިޔަފާރިތަކާއި ކުންފުނިތަކަށް ދޭންޖެހޭ ފައިސާދިނުން އަވަސް ކުރުމަށާއި، ފެނަކައިގެ ފައިނޭންސް އަދި މެނޭޖުމަންޓު އޮޑިޓެއް ހެދުމަށާއި ދަރަނި އަދާކުރާނެގޮތުގެ ޕްލޭނެއް އެކުލަވާލުމަށް ގޮވާލާ ހުށަހެޅި ޤަރާރަށް ބަހުސް ކުރައްވަމުންނެވެ.
އެގޮތުން ވާހަކަ ދައްކަވަމުން މަވޯޓާ ވިދާޅުވީ، އަމިއްލަ ގޭގޭގެ ބަދިގޭގައި ކައްކާނީ ކޮންކަހަލަ ރިހައެއްތޯ ކަނޑައަޅާ ތަނަކަށް ރައްޔިތުންގެ މަޖިލީސް ވެއްޖެކަމަށެވެ.
މަވޯޓާ ވިދާޅުވީ އެ ގަރާރަކީ ރާއްޖޭގެ އަތޮޅު ތަކުގެ ރަށްތަކަށް ކަރަންޓުގެ ޚިދުމަތް ފޯރުކޮށްދެމުންދާ ކުންފުނި ސުންނާފަތި ކޮށްލުމަށް ހުށަހަޅާފައިވާ ގަރާރެއް ކަމަށެވެ. އަދި ގަރާރުގެ ބޭނުމަކީ ބިރު ދައްކައިގެން އެ ކުންފުނި ބަނގުރޫޓް ކޮށްލުން ކަމުގައިވެސް އޭނާ ވިދާޅުވި އެވެ.
މިއާއެކު މަވޯޓާ ވިދާޅުވީ ފާއިތުވެގެން ދިޔައީ ދަތި 4 އަހަރު ކަމަށާ، 2020 ވަނަ އަހަރުގައި ރައްޔިތުންގެ މަޖިލީހުން ކުރަމުން ދިޔަ މަސައްކަތަކީ ދިވެހިރާއްޖެ ބަނގުރޫޓް ކޮށްލުން ކަމަށެވެ. އެހެންނަމަވެސް، އެކަން ކާމިޔާބު ނުވާ ކަން ފާހަގަކުރައްވައި އޭނާ ވިދާޅުވީ މިއަދު ފެންނަމުންދަނީ ރާއްޖޭގެ ރައްޔިތުންނަށް ޚިދުމަތް ކުރަން ހުރި ކުންފުނިތައް ބަނގުރޫޓް ކޮށްލުމަށް ކުރަމުންދާ ބިރުވެތި، ނުރައްކާތެރި އަދި މަކަރުވެރި މަސައްކަތް ކަމަށެވެ.
މަވޯޓާ ވިދާޅުވީ ފެނަކައަށް ފައިސާ ދައްކާ ގޮތާއި، އެ ކުންފުންޏާއި އެހެން ފަރާތްތަކާއި މެދު އޮންނަ ގުޅުމަކީ ރައްޔިތުންގެ މަޖިލީހުން "އަތް ބާނަން" ޖެހޭ ކަމެއް ނޫން ކަމަށެވެ. އަދި، އެއީ ފައިދާއަށް ހިންގާ ކުންފުންޏެއް ނޫން ކަމަށާ އެހެނެއް ކަމަކު ރައްޔިތުންނަށް ޚިދުމަތް ކޮށްދޭ ވިޔަފާރި ކުންފުންޏެއް ކަމަށްވެސް އޭނާ ވިދާޅުވި އެވެ.
ކިތަންމެ ތެލުގެ އަގު ބޮޑު ވިޔަސް، ކިތަންމެ އިންޖީނެއް ގެންނަން ޖެހޭ ޚަރަދު ބޮޑުވިޔަސް، ކިތަންމެ ކޭބަލެއްގެ އަގު ބޮޑުވިޔަސް، އެއަށް ކުރަންޖެހޭ ޚަރަދު ބޮޑުވިޔަސް، ރައްޔިތުންނަށް ކަރަންޓް ކަށަވަރު ކޮށްދިނުމަށްޓަކައި އަޅަންޖެހޭ ފިޔަވަޅު ފެނަކައިން ވަނީ އަޅާފައި. އަޅަމުން އަދިވެސް ގެންދާނީ. އަޅުގަނޑުމެން ނުދޭނަން ފުރުސަތެއް ފެނަކަ ބަނގުރޫޓް ކޮށްލާކަށް. އަޅުގަނޑުމެން ނުދޭނަން ރައްޖެއަށް ދެމުންދާ ކަރަންޓުގެ ޚިދުމަތް މެދު ކެނޑުނަކަ. އަޅުގަނޑުމެން ނުދޭނަން ފެނަކައިގެ އެތައް މުވައްޒަފުންގެ ވަޒީފާ ގެއްލުނަކަ.
ހީފުޅު ކޮށްގެން ނުވާނެ ވަލު ދޮރާށިން ވައްދައިގެން މި ގައުމުގައި އޮތް އެންމެ ބޮޑު، ޔުޓިލިޓީ ކުންފުނި، ރައްޔިތުންނަށް ކަރަންޓް ފޯރުކޮށްދޭ ކުންފުނި. ރައްޔިތުންނަށް 24 ގަޑިއިރު ކަރަންޓް ކަށަވަރުކޮށްދިން ހަމައެކަނި ކުންފުނި ބަނގުރޫޓް ކޮށްލާނަމޭ ހިތާ، މިތަނަށް މައްސަލަ ހުށަހަޅައިގެން އެކަންކަން ކުރެވިދާނެ.
މަރަދޫ ދާއިރާގެ މެންބަރު އިބްރާހީމް ޝަރީފް (މަވޯޓާ)
ޝަރީފް ވިދާޅުވީ، ސަރުކާރަށްވެސް ފައިސާގެ ދަތިތައް ހުރި ކަމަށާ، އަދި ދަރަނިވެސް ބޮޑު ކަމަށެވެ. އެހެންކަމުން ކުންފުނިތަކަށްވެސް އެ ދަތި އޮތް ކަމަށާ، އެ މައްސަލަ އަކީ އެ ކުންފުނީގެ މެނޭޖްމަންޓުން އެހެން ފަރާތްތަކާއި ގުޅިގެން ހައްލު ކުރަންޖެހޭ ކަމެއް ކަމަށެވެ. އެކަންކަމަށް ރިޢާޔަތް ނުކޮށް ރައްޔިތުންނަށް ޚިދުމަތް ފޯރުކޮށްދެމުންދާ ކުންފުނި ބަނގުރޫޓް ކޮށްލަން މަސައްކަތް ކޮށްގެން ނުވާނެ ކަމަށާ، އެގޮތަށް އެކަން ވިޔަ ނުދެއްވާނެ ކަމަށް އޭނާ ވިދާޅުވި އެވެ.
Advertisement
This content is created and paid for by advertisers and does not involve Voice Journalists
