މޯލްޑިވްސް ޕޮލިސް ސަރވިސްއަށް ހުށަހަޅާފައިާ މައްސަލަތަކުގެ ތެރޭގައި ގެވެށި އަނިޔާގެ 57 މައްސަލައެއް ހިމެނޭއިރު، އޭގެން އެއްވެސް މައްސަލައެއް ޕީޖީއަށް ފޮނުވާފައި ނުވާކަމަށް ތަފާސްހިސާބުން ދައްކައިފިއެވެ.
މި އަހަރުގެ ފުރަތަމަ ކުއާޓާގެ ކްރައިމް ސްޓެޓަސްޓިކްސްއިން ދައްކާގޮތުގައި ގެވެށި އަނިޔާގެ 146 މައްސަލަ ފުލުހަށް ރިޕޯޓު ކޮށްފައި ވާއިރު، 57 މައްސަލައެއް ތަހުގީގު ކޮށްފައިވެއެވެ. އޭގެ ތެރެއިން އެއްވެސް މައްސަލައެއް ޕީޖީއަށް ފޮނުވާފައެއް ނުވެއެވެ.
މި މައްސަލަތަކުގެ ތެރެއިން 32 މައްސަލައަކީ މާލެ ސަރަހައްދުން ހުށަހަޅާފައިވާ މައްސަލައެވެ. އަދި އައްޑޫއިން ދެ މައްސަލައާއި ފުވައްމުލަކުން އެއް މައްސަލަ ހުށަހަޅާފައިވެއެވެ.
އޭގެ ތެރޭގައި، އާއިލީ މެމްބަރުން ހިމެނޭ 29 މައްސަލައަކާއި ދެމަފިރިން ހިމެނޭ 28 މައްސަލައެއް ފާހަގަ ކޮށްފައި ވެއެވެ.
ފުލުހަށް ހުށަހަޅާފައިވާ ގެވެށި އަނިޔާގެ 67 އިންސައްތަ މައްސަލަތަކުގައި އަނިޔާގެ ޝިކާރައަކަށް ވެފައި ވަނީ އަންހެނުންނެވެ. އަދި 33 އިންސައްތަ މައްސަލައިގައި އަނިޔާގެ ޝިކާރައަކަށް ވެފައި ވަނީ ފިރިހެނުންނެވެ.
މައްސަލަ ހުށަހަޅާފައިވާ އުމުރުފުރާ ތަކަށް ބަލާއިރު، އެންމެ ގިނައީ 39-35 އަހަރުގެ މީހުންނާ ގުޅުންހުރި މައްސަލަތައް ކަމަށް ފުލުހުންގެ ތަފާސްހިސާބުން ދައްކައެވެ.
Advertisement
This content is created and paid for by advertisers and does not involve Voice Journalists
