ރައްޔިތުންގެ މަޖިލީހުގައި ދޭލިޔާ މުޙައްމަދަށް ޚާއްސަ ގޮތެއް ނޯންނާނެ ކަމަށް ވިދާޅުވެ ދާންދޫ ދާއިރާގެ މެންބަރު ޔައުގޫބު މަޖިލީހުގެ ރައީސް މުހައްމަދު ނަޝީދަށް ހޫނު ރައްދެއް ދެއްވައިފިއެވެ.

ރައްޔިތުންގެ މަޖިލީހުގެ ނާއިބްރައީސް ގަލޮޅު އުތުރު ދާއިރާގެ މެންބަރު އީވާ އަބްދުالله ގެ އިތުބާރު ނެތްކަމަށް އެމްޑީޕީގެ ޕާލަމެންޓްރީ ގުރޫޕުން މިހިނގާ މެއި މަހުގެ 18 ވަނަ ދުވަހު ވަނީ ފާސްކޮށްފަ އެވެ. އެ މައްސަލަ އެމްޑީޕީގެ ޕީޖީ ގްރޫޕުން ރައްޔިތުންގެ މަޖިލީހަށް މިއަދު ވަނީ ހުށަހަޅައިފަ އެވެ. މައްސަލަ ހުށަހެޅީ ޕީޖީ ގްރޫޕުގެ 50 މެންބަރުންގެ ސޮޔާއެކުއެވެ.

އެކަމާ ގުޅިގެން އެމްޑީޕީގެ މަޖިލީސް މެންބަރުން ތިއްބަވާ ވަޓްސްއަޕް ގްރޫޕަށް ހުޅުމާލޭ ދާއިރާގެ މެންބަރު ޢަލީ ނިޔާޒް މިއަދު ފޮނުއްވި މެސެޖެއްގައި ވިދާޅުވީ، އޭނާއަކީ "ޙަޤީޤީ ޑެމޮކްރޭޓެއް" ކަމަށެވެ. އެހެންކަމުން އޭނާ ތަބާވަނީ މެޖޯރިޓީއަށް ކަމަށެވެ.

ނިޔާޒަށް ރައްދު ދެއްވައި ރައީސް ނަޝީދު ފޮނުއްވި މެސެޖެއްގައި ވަނީ، އޭނާ އެކުރާ ކަންތައް ހަނދާނުގައި ބެހެއްޓުމަށް އެދިފައެވެ. އަދި ތިޔަ އެއްލާލަނީ ދޭލިޔާ މުޙައްމަދުބޭގެ ދަރި ކަމަށްވެސް ނަޝީދު ވިދާޅުވި އެވެ. 

އެ ދެބޭފުޅުންގެ ބަހުސްގެ ތެރެއަށް ޔައުގޫބް ވަންނަވައި، އޭނާ ވިދާޅުވީ ރައްޔިތުންގެ މަޖިލީހުގައި ދޭލިޔާ މުޙައްމަދެއް ތުއްތު މަނިކެއް ނޯންނާނެ ކަމަށެވެ.

"ބުނަންތަ ވާހަކައެއް. މަޖިލީހުގައި ދޭލިޔާ މުހައްމަދެއް، ތުއްތުމަނިކެއް އެހެން މީހެއް ތަފާތެއް ނުވާނެ." ޔައުޤޫބު ވިދާޅުވިއެވެ.

ޅ. ހިންނަވަރު ދޭލިޔާ، އަބްދުالله މުހައްމަދު ނުވަތަ ދޭލިޔާއަކީ މެންބަރު އީވާގެ ބައްޕާފުޅެވެ. އަދި އެއީ ރައީސް ޞާލިޙާއި، މެންބަރު ޢަލީ ނިޔާޒްގެ މަންމާފުޅާ ދޭލިޔާގެ މަންމާފުޅަކީ އެއްބަނޑު އެއްބަފާ ދެ ބޭފުޅުންނެވެ.