ރައްޔިތުންގެ މަޖިލީހުގެ ޖަލްސާތައް "މާ ހޫނު ވަނީ" ކަމަށް ބުނެ ލައިވް ނުކުރަން ދައުލަތުގެ މީޑިއާއިން ނިންމި ނިންމުމާއި ގުޅިގެން ޢަމާޒުވި ފާޑުކިޔުންތަކާއިއެކު، އެ ނިންމުން ބަދަލުކޮށް އަލުން ޖަލްސާތައް ލައިވްކޮށް ދައްކަން ނިންމައިފިއެވެ.

ފަހަކަށް އައިސް ރައްޔިތުންގެ މަޖިލީހުގެ ޖަލްސާތަކުގައި ސަރުކާރަށާއި، ޚާއްސަކޮށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހަށް ގިނަ ފާޑުކިޔުންތަކެއް މެންބަރުން އަންނަނީ އަމާޒު ކުރައްވަމުންނެވެ. ޚާއްޞަކޮށް އިޓްލޮސްގެ މައްސަލައާއި، އަދި ފާއިތުވެދިޔަ ދެ ދުވަހު، މަޖިލީހުގެ ރައީސް މުހައްމަދު ރައީސް ނަޝީދަށް ދެވުނު ބޮމުގެ ހަމަލާއާއި ގުޅިގެން ބޮޑެތި ތުހުމަތު ތަކާއި ފާޑުކިޔުއްތައް ރައީސް ޞާލިހަށް އަމާޒުވެ މަޖިލީހުގެ ޖަލްސާތައް މެދު ކަނޑާލަންޖެހޭ ފަހަރުތައްވެސް ވަނީ ގިނަވެފައެވެ. 

އެފަދަ ދަނޑިވަޅެއްގައި ދައުލަތުގެ މީޑިއާ ޕީއެސްއެމް ވަނީ އިއްޔެއިން ފެށިގެން މަޖިލީހުގެ ޖަލްސާތައް ލައިވް ނުކުރަން ނިންމާފައެވެ. އެކަމާއި ގުޅިގެން "މިހާރު" ނޫހަށް މައުލޫމާތު ދެއްވަމުން ޕީއެސްއެމްގެ މެނޭޖިން ޑިރެކްޓަރު އަލީ ޚާލިދު ވަނީ އެފަދައިން ކަން ކުރެއްވީ މަޖިލިސް ހޫނުވުމުން މެންބަރުން ބޭނުން ކުރައްވާ ބަސްތަކާއި ގުޅިގެން ކަމަށް ވިދާޅުވެފައެވެ. 

Advertisement

"މަޖިލިސް ލައިވް ކުރާއިރު އަޅުގަނޑުމެންނަށް އޭގެ ކޮންޓްރޯލެއް ނޯންނާނެ އެ ދައްކާ ވާހަކައަކަށް. އަޅުގަނޑުމެން އެންމެން މަޝްވަރާކޮށްފައި ނިންމީ މި ވަގުތަށް ލައިވް ކުރުން ހުއްޓާލަން. މަޖިލީހުގެ ބަހުސްތައް މާ ހޫނު ވީމަ، ބޭނުންކުރާ ބަސްތަކާ މިކަހަލަ ކަންކަމަށް ބަލައިފައި،" އަލީ މިހާރު ނޫހަށް މައުލޫމާތު ދެއްވަމުން ވިދާޅުވިކަމަށް އެ ނޫހުން ރިޕޯޓު ކޮށްފައިވެއެވެ.

އެކަމާއި ގުޅިގެން ގިނަ ބައެއްގެ ފާޑުކިޔުންތައް ޕީއެސްއެމްއަށް އަމާޒުވެގެން ދިޔައެވެ. ޚާއްސަކޮށް މަޖިލީހުގެ އިދިކޮޅު ޕާޓީތަކުގެ މެންބަރުން ވަނީ ދައުލަތުގެ މީޑިއާ އަކީ ސަރުކާރުގެ ޕްރޮގެންޑާތައް ފަތުރަން ބޭނުންކުރާ މެޝިނަކަށް ހަދާފައިވާ ކަމަށް ތުހުމަތު ކުރައްވާފައެވެ. 

އަދި ޕީއެސްއެމް އަކީ ރައްޔިތުންގެ ޓެކްސް ފައިސާއިން ޚަރަދު ކޮށްގެން ހިންގާ ތަނަކަށްވާއިރު، ރައްޔިތުން ތަމްސީލުކުރަން އިންތިހާބު ކޮށްފައި ތިބޭ މެންބަރުން ދައްކާ ވާހަކައާއި، ވޯޓުލާ ގޮތް ރައްޔިތުންނަށް އެނގެންޖެހޭ ކަމަށްވެސް މެންބަރުން ވަނީ ވިދާޅުވެފަ އެވެ. 

މިނޫންވެސް އެތައް ބައެއްގެ ފާޑުކިޔުންތައް ޕީއެސްއެމްއަށް އަމާޒުވެގެން ގޮސްފައިވާއިރު، މީގެ ކުރިން ޖަލްސާތައް މާ ބޮޑަށް ހޫނުވެ، އެތައް ފަހަރަކު މެދު ކަނޑާލަންޖެހުނު އިރުވެސް ޕީއެސްއެމުން ޖަލްސާތައް ލައިވް ކޮށްފައިވާކަން އެފަރާތްތަކުން ވަނީ ފާހަގަކޮށްފައެވެ.

އެފަދަ އެތައް ފާޑުކިޔުންތަކެއް އަމާޒުވެފައި ވަނިކޮށް ޕީއެސްއެމް އިން މިވަނީ އަނެއްކާވެސް ނިންމުން ބަދަލުކޮށް ޖަލްސާތައް ލައިވް ކުރަން ނިންމާފައެވެ. ނަމަވެސް އެ ނިންމި ސަބަބު ސާފުކުރަން "ވޮއިސް" އިން ޕީއެސްއެމްގެ އެމްޑީ އަލީ ޚާލިދަށް ގުޅިއިރު، ފޯނު ނިއްްވާލާފައި އޮތުމުން ބަހެއް ލިބޭ ގޮތެއް ނުވިއެވެ.