ސްކޫލު ބަންދާ ދިމާކޮށް ހުޅުމާލޭގައި މަގުމަތީ ބާޒާރު ބާއްވަން މާލެ ސިޓީ ކައުންސިލުން ނިންމައިފިއެވެ.
ސިޓީ ކައުންސިލުން ކުރި އިއުލާނެއްގައި ބުނީ، މި މަހުގެ 22 ވަނަ ދުވަހުން ފެށިގން އަންނަ މަހުގެ 1 ވަނަ ދުވަހުގެ ނިޔަލަށް ހުޅުމާލޭގައި މަގުމަތީބާޒާރު ބާއްވަން ބޭނުންވާ ފަރާތްތަކަށް އެފުރުޞަތު ހުޅުވާލެވިފައިވާ ކަމަށެވެ.
އެގޮތުން އަމިއްލަ މަޢުލޫމާތު ފުރިހަމަ ކުރުމަށްފަހު، ހުޅުމާލޭ އަމިން އެވެނިއު މޭޕްލް ބިލްޑިންގެ 1 ވަނަ ފަންގިފިލާގައި ހުންނަ ސިޓީ ކައުންސިލްގެ ހުޅުމާލޭ ސެކްޝަނުނަށް ފޯމް ހުށަހެޅުމަށް އެ ކައުންސިލުން އެދިފައިވެއެވެ.
މާކެޓް ބޭއްވުމަށް ހޮވޭ ފަރާތަށް މާކެޓް ބޭއްވުމުގެ ހުއްދަ ދޫކުރެވޭނީ ޑިޕޮސިޓްގެ ގޮތުގައި ބަހައްޓަންޖެހޭ 50,000 ރުފިޔާ މާލެ ސިޓީކައުންސިލަށް ދެއްކުމުން ކަމަށާއި އަދި މާކެޓް ބޭއްވުމަށް ހުއްދަ ދެވުނު ފަރާތުން، އެއްވެސް ސަބަބަކާހެދި މާކެޓް ނުބޭއްވުމަށް ނިންމައިފިނަމަ، ޑިޕޮސިޓް ފައިސާ ދޫކުރެވޭނީ ޑެޕޮސިޓްގެ 50% ކެނޑުމަށްފަހުގައި ކަމަށް އެ ކައުންސިލްގެ އިއުލާނުގައި ވެއެވެ.
ނައިޓްމާކެޓް ނުވަތަ މަގުމަތީ ބާޒާރު ހިންގުމުގެ ހުއްދައަށްއެދޭ ފޯމު ބަލައިގަތުމަށް ހަމަޖެހިފައިވަނީ މިއަދުން ފެށިގެން އަންނަ ހޮނިހިރު ދުވަހުގެ ނިޔަލަށެވެ.
Advertisement
This content is created and paid for by advertisers and does not involve Voice Journalists
