ބްރިޖްމަތިން ދުއްވާއިރު ބުރުގާ އަޅާ މީހުން ސަމާލުވުމަށް ފުލުހުން އިލްތިމާސްކޮށްފިއެވެ.

ފުލުހުން ބުނީ، މި ދުވަސްވަރަކީ މޫސުން ގޯސްވެ ގަދަ ވައި ޖެހެމުންދާ ދުވަސްވަރަކަށް ވާތީ ސިނަމާލެ ބްރިޖް އަދި ލިންކް ރޯޑް ބޭނުން ކުރާ މީހުން ސަމާލުވުމަށް އިލްތިމާސް ކުރާ ކަމަށެވެ.

އެގޮތުން ބުރުގާ އަޅާ މީހުން، ވަޔާއެކު ބުރުގާ މޫނުމައްޗަށް ނުދާނެހެން ބެހެއްޓުމާއި ވިއްސާރަކޯޓު ބޭނުންކުރާ ފަރާތްތަކުން، ވަޔާއެކު ކޯޓު ހަލާކުވެގެން ގޮސް އެހެންމީހުންގެ މޫނުމަތީގައި ނޭޅޭފަދަ ރަނގަޅު ފެންވަރެއްގެ ކޯޓު ބޭނުން ކުރުމަށް ފުލުހުން ވަނީ އެދިފައެވެ.

Advertisement

މީގެ އިތުރުން ފުލުހުން ބުނީ، ވައި ގަދަވާ ގަޑިތަކުގައި އުޅަނދުގެ ސްޕީޑް ކޮންޓްރޯލް ކުރެވޭ މިންގަނޑެއްގައި ހިފަހައްޓަން ވާނެ ކަމަށެވެ.

އެއްްގަމު އުޅަނދު ދުއްވާ އެންމެހާ ފަރާތްތަކުން އެ ކަންކަމަށް ސަމާލު ވުމަކީ، ހުރިހާ އެންމެންގެ ސަލާމަތާ ރައްކާތެރިކަމަށްޓަކާ ކުރުން މުހިންމު ކަމެއް ކަމަށް ފުލުހުން ބުންޏެވެ.

އަދި ކަނޑުދަތުރު ކުރާ ފަރާތްތަކުންވެސް މޫސުމަށް ސަމާލުވެ، ދަތުރަށް ފެށުމުގެ ކުރިން މޫސުމާ ބެހޭ އެންމެ ފަހުގެ މައުލޫމާތު ހޯދުމަށް ފުލުހުން ވަނީ އެދިފައެވެ.