މަޖިލީހުގެ ޤާނޫނީ ބާރު އަނބުރާ މަޖިލީހަށް ރުޖޫޢަ ވާންޖެހޭ ކަމަަށް ރައްޔިތުންގެ މަޖިލީހުގެ މަރަދޫ ދާއިރާގެ މެމްބަރު އިބްރާހިމް ޝަރީފް ވިދާޅުވެއްޖެއެެވެ.

ޝަރީފް މިހެން ވިދާޅުވީ އޭނާ ކުރައްވާފައިވާ ޓްވީޓް ތަކެއްގައެެވެ.

"ޤާނޫން އަސާސީ އެބަ ދަމަހައްޓަންޖެހޭ، މަޖިލީހުގެ ޤާނޫނީ ބާރު މަޖިލީހަށް އަނބުރާ ރުޖޫޢަ ވާންޖެހޭ، މިމައްސަލަ ސުޕުރީމް ކޯޓަށް ހުށައަޅާ ރައީސް ނަޝީދު ޤާނޫނާއި ޚިލާފަށް މަޖިލިސް ހައިޖެކް ކުރައްވާފައި އޮތް އޮތުން ނިމުމަކަށް ގެންނަން އެބަޖެހޭ" ޝަރީފް ވިދާޅުވިއެވެ.

ޝަރީފް ވިދާޅުވީ ދައުލަތުގެ އެއްބާރު ހައިޖެކް ކުރުމުގެ ފުރުސަތު މީހަކަށް ދެވިގެން ނުވާނެ ކަމަށެވެ. ޤާނޫނުގެ ވެރިކަން އަދި ޤާނޫނު އަސާސީ ދެމެހެއްޓުމަކީ ދައުލަތުގެ ޒިންމާއެއް ކަމަށްވެސް ޝަރީފް ވިދާޅުވިއެވެ.

"މަޖިލިސް މިވަނީ ރައީސް މުޙައްމަދު ނަޝީދު ޤާނޫނާއި ޚިލާފަށް ހިސޯރުކޮށްފަ، 54 މެމްބަރުން އިތުބާރު ނެތް ކަމަށް ހުށައެޅުމުން ވޯޓަކަށް ގެންދިޔަ ނުދީ، އިދާރީ މުވައްޒަފުން ބޭނުން ކުރައްވައިގެން ކުޅުއްވާ ޑްރާމާ އިން ވަނީ ޤާނޫނު އަސާސީގެ ބާރު ކަނޑުވާލައިފައި" ޝަރީފް ވިދާޅުވިއެވެ.

ޤާނޫނު އަސާސީ ދަމަހައްޓައި ޤާނޫނުގެ ވެރިކަން ދެމެހެއްޓުމަކީ މުޅި ދައުލާތާއި ދައުލަތުގެ އެންމެ އިސްވެރިޔާ ރައީސުލް ޖުމްހޫރިއްޔާގެ މަސްއޫލިއްޔަތެއް ކަމަށާއި މަޖިލިސް ރައީސްގެ މަޤާމުގައި ކުރިން ހުންނެވި ރައީސް ނަޝީދު ޤާނޫނާއި ޚިލާފަށް މަޖިލިސް ހެކްކޮށްފައި އޮތް އޮތުމަށް ޤާނޫނީ ފިޔަވަޅު އަޅަންޖެހޭ ކަމަށް ޝަރީފް ވިދާޅުވިއެވެ.

މަޖިލީހުގެ ރައީސް ކަމުން ރައީސް ނަޝީދު ވަކިކުރުމަށް ބުދަ ދުވަހު ވަނީ މަޖިލީހަށް ހުށައަޅައިފައެވެ.

ފާއިތުވި ހަފްތާގައި މަޖިލީހުގެ ޖަލްސާތައް ކުރިއަށް ގޮސްފައިވަނީ ނިޒާމާއި ބެހޭ ނުކުތާތައް ނެގުމުގައެެވެ. މަޖިލިސް ހޫނުވެ ނިޒާމް ގެއްލިގެން މަޖިލިސް ހުއްޓައިލި ވަގުތުތައްވެސް ދިޔައެވެ.