މަޖިލީހުގެ އަމީންއާމާއެކު މަޖިލިސް ރައީސް މުހައްމަދު ނަޝީދު އެކުރައްވަނީ ބަޣާވާތެއް ކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެމްބަރު އިބްރާހީމް ޝަރީފް (މަވޯޓާ) ވިދާޅުވެއްޖެއެވެ.
މަވޯޓާ މިހެން ވިދާޅުވީ، މަޖިލީހުގެ ރައީސްއާއި ނައިބުރައީސްގެ އިތުބާރު ނެތްކަމުގެ މައްސަލަ ކުރިއަށް ނުދާތީ އެކަމާ ނުރުހުން ފާޅު ކުރައްވައި ކުރެއްވި ޓުވީޓެއްގައެވެ.
އޭނާ ވިދާޅުވީ، ނަޝީދު ގާނޫނާ ހިލާފަށް މަޖިލިސް ހިސޯރު ކޮށްފައިވާ ކަމަށެވެ.
"54 މެމްބަރުން އިތުބާރުނެތް ކަމަށް ހުށައެޅުމުން ވޯޓަކަށް ގެންދިޔަ ނުދީ އިދާރީ މުވައްޒަފުން ބޭނުން ކުރައްވައިގެން ކުޅުއްވާ ޑްރާމާއިން ވަނީ ގާނޫނުއަސާސީގެ ބާރު ކަނޑުވާލާފަ" މަވޯޓާ ވިދާޅުވިއެވެ.
ގާނޫނުއަސާސީ ދަމަހައްޓަން ޖެހޭކަން ފާހަގަ ކުރައްވައި މަވޯޓާ ވިދާޅުވީ މަޖިލީހުގެ ގާނޫނީ ބާރު މަޖިލީހަށް އަނބުރާ އުޖޫއަވާން ޖެހޭ ކަމަށެވެ. އަދި މި މައްސަލަ ސުޕްރިމްކޯޓަށް ހުށަހަޅައި، ގާނޫނާ ހިލާފަށް ނަޝީދު މަޖިލިސް އައިޖެކްޓް ކުރައްވާފައި އޮތް އޮތުން ނިމުމަކަށް ގެންނަން އެބަ ޖެހޭ ކަމަށް މަވޯޓާ ވިދާޅުވިއެވެ.
"ދައުލަތުގެ އެއް ބާރު ހައިޖެކްޓް ކުރުމުގެ ފުރުސަތު އެއްވެސް މީހަކަށް ދެވިގެން ނުވާނެ. ގާނޫނުގެ ވެރިކަން އަދި ގާނޫނު އަސާސީ ދެމެހެއްޓުމަކީ މުޅި ދައުލަތުގެ ޒިންމާއެއް" މަވޯޓާ ވިދާޅުވިއެވެ.
ގާނޫނާ ހިލާފަށް ނަޝީދު މަޖިލިސް ހައިޖެކްޓް ކޮށްފައި އޮތުމަށް ގާނޫނީ ފިޔަވަޅު އަޅަން ޖެހޭ ކަމަށް މަވޯޓާ ވިދާޅުވިއެވެ.
މީގެ އިތުރުން މަވޯޓާ ވިދާޅުވީ ދައުލަތުގެ އެއް ބާރު ގާނޫނާ ހިލާފަށް މަޖިލީހުގެ އިދާރާގެ މުވައްޒަފުން ބޭނުން ކޮށްގެން ނަޝިދު މަޖިލިސް މަރުތަޅު އަޅުވާފައި އޮތް އޮތުން ނިމުމަކަށް ގެންނަން ޖެހޭ ކަމަށާއި ގާނޫނުއަސާސީގެ ބާރު ކަނޑުވާލުމަކީ އެންމެ ބޮޑު ހިޔާނާތް ކަމަށެވެ.
އެކަން ކުރި އެންމެނަށް ޖިނާއީ ދައުވާ ކުރަން ޖެހޭނެ ކަމަށް މަވޯޓާ ވިދާޅުވިއެވެ.
Advertisement
This content is created and paid for by advertisers and does not involve Voice Journalists
