ކުރީގެ ރައީސް އަދި އިދިކޮޅު ރިޔާސީ ކެންޑިޑޭޓް ރައީސް އަބްދުالله ޔާމީން އަބްދުލްގައްޔޫމް އަށް އަދުގެ ސަރުކާރުން އަނިޔާ ކުރަމުންދާ ކަމަށް ވިދާޅުވެ، އިދިކޮޅު ކޯލިޝަންގެ ލީޑަރޝިޕް ރައީސް އޮފީހަށް ވަޑައިގެންފިއެވެ. 

"ފްރީ ޕްރެސިޑެންޓް ޔާމީން" ނުވަތަ ރައީސް ޔާމީން މިނިވަންކުރުމަށް ގޮވާލާ ޕޯސްޓަރ ތައް ހިފައިގެން އިދިކޮޅުގެ ލީޑަރޝިޕްގެ ބޭފުޅުންގެ ތެރެއިން، މާވަށު ދާއިރާގެ މެންބަރު މުހައްމަދު ސަޢީދު އާއި، ގުރައިދޫ ދާއިރާގެ މެންބަރު ޣައްސާން މައުމޫން އާއި، ކ އަތޮޅު ކައުންސިލްގެ ރައީސް މުހައްމަދު ނިމާލް އާއި، ނައިފަރު ދާއިރާގެ މެންބަރު އަހުމަދު ޝިޔާމްގެ އިތުރުން ފަރެސްމާތޮޑާ ދާއިރާގެ މެންބަރު ހުސައިން މުހައްމަދު ލަތީފް (ސެމްބެ) ވަނީ ރައީސް އޮފީސް ދޮށަށް އެއްވެފައެވެ. 

އެބޭފުޅުންގެ އިތުރުން ޕީޕީއެމްގެ މެންބަރުންވެސް ރައީސް ޔާމީން އަށް ކުރަމުންދާ އަނިޔާ ހުއްޓާލުމަށް ގޮވާލައި ޕޯސްޓަރ ތައް ހިފައިގެން އެ ސަރަހައްދުގައި އަންނަނީ އަޑު އުފުލަމުންނެވެ. 

Advertisement

އެފަރާތްތައް ރައީސް އޮފީސް ކުރިމަތީގައި ތިއްބެވި އިރު، އެ ސަރަހައްދުގައި މިވަގުތު ރައީސް އޮފީހުގެ ސެކިޔުރިޓީންނާ ސިފައިން އަންނަނީ ހަރަކާތްތެރިވަމުންނެވެ. 

ރައީސް ޔާމީން ނުހައްގުން ޖަލަށްލައި ނުހައްގުން އަނިޔާ ކުރަމުންދާ ކަމަށާ އެކަން ކުރައްވަނީ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އަންގަވައިގެން އިދިކޮޅުން ތުހުމަތު ކުރެއެވެ. އަދި ރައީސް ޞާލިހު އާއި ސަރުކާރުން އެފަދައިން ކަން ކުރައްވަނީ ރައީސް ޔާމީނަށް ރިޔާސީ އިންތިހާބުގައި ވާދަކުރެއްވުމުގެ ފުރުސަތު ނުދެއްވަން ކަމަށްވެސް އިދިކޮޅުން ބުނެއެވެ. 

ނަމަވެސް ޖަލުން މިނިވަންވެ ވަޑައިގެން، ރިޔާސީ އިންތިހާބު ކާމިޔާބު ކުރައްވާނީ ރައީސް ޔާމީން ކަމަށްވެސް އިދިކޮޅުން އަންނަނީ ބުނަމުންނެވެ.