މުޅި ނިޒާމު ބޭނުންކޮށްގެން ވާދަވެރި ސިޔާސީ ލީޑަރު އަދި ޕީޕީއެމްގެ ރިޔާސީ ކެންޑިޑޭޓު ރައީސް އަބްދުالله ޔާމީން އަބްދުލްގައްޔޫމަށް އަނިޔާކުރަމުން ދާ ކަމަށް ޕީޕީއެމްގެ ނައިބު ރައީސް އަދި މަޖިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމު ވިދާޅުވެއްޖެ އެވެ.
ޝިޔާމު މިފަދައިން ވިދާޅުވެފައި ވަނީ ޕްރޮގްރެސިވް ކޮންގްރެސް ކޯލިޝަނުން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ނެވެ.
ޝިޔާމު ވިދާޅުވީ ދަށުކޯޓުގައި އޮތް ރައީސް ޔާމިނުގެ ފުއްގިރި މައްސަަލައިގެ ޝަރީއަތުގެ އަޑުއެހުމެއް ކުރިއަށް ގެންދިއުމަށް ރައީސް ޔާމިނަށް ޝަރީއަތުގައި 13 ގަޑިއިރު ހޭދަކުރައްވަން ޖެހިވަޑައިގެންނެވި ކަމަށެވެ.
ދަށު ކޯޓުގައި އެ އޮތް މައްސަލައަކީ އަވަސް އަރުވާލައިގެން ކުރިއަށް ގެންދަން ޖެހޭ މައްސަލައަކަށް ނުވާއިރު، އެ މައްސަލައިގެ އަޑުއެހުންތައް ރައީސް ޔާމިނަށް ބޮޑު ތަކުލީފަކަށް ވާގޮތަށް ކުރިއަށް ގެންދިއުމަކީ އެމަނިކުފާނަށް ދިން އަނިޔާއެއްކަމަށް ޝިޔާމު ސިފަކުރެއްވި އެވެ.
"13 ގަޑިއިރު އެމަނިކުފާނަށް ޝަރީއަތުގައި ހޭދަކުރައްވަން ޖެހިވަޑައިގެންނެވި. އަނެއްކާ އެފަހުން މިއަދު (އަންގާރަ ދުވަހު) ހެނދުނު 9:00 އަށް ކްރިމިނަލް ކޯޓުގައި އަޑުއެހުން ތާވަލުކުރި. މީ އަނިޔާ! މިޔަށް ކިޔަނީ އަނިޔާ! ނިޒާމުން ކުރާ އަނިޔާ!"
ޕީޕިއެމްގެ ނައިބު ރައީސް ޝިޔާމު
ޝިޔާމު ވިދާޅުވީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ރައީސް ޔާމިނަށް ނިޒާމުގެ ތެރެއިން ދެމުންދާ ހުރިހާ އަނިޔާތަކަށް ފުރިހަމައަށް ޒިންމާވެވަޑައިގަންނަވަން ޖެހޭނެ ކަމަށެވެ.
ޝިޔާމު އިތުރަށް ވިދާޅުވީ ފުއްގިރި މައްސަލަ ހަވާ ފަޓާސް ބަރިއެއްހެން ކުރިއަށް ގެންދަނީ ހައިކޯޓުގައި އިސްތިއުނާފު އަޑުއެހުންތަކެއް ފަށާފައިވަނިކޮށެވެ. އަދި އެ މައްސަލައަކީ ކޮންމެހެން ވެސް އަވަށް ކުރަން ބޭނުންވާ މައްސަލައެއްކަމަށް ރައީސް ޔާމިނުގެ ޤާނޫނީ ވަކީލުންނާއި ޚުދު އެމަނިކުފާނު ވެސް ގެންދަވަނީ ފާހަގަކުރައްވަމުން ނެވެ.
އޭގެ އިތުރުން އާރަށުގެ އިސްތިއުނާފު މައްސަލައަށް ހުރަސް ނޭޅޭނެ ފަދަ ގޮތަކަށް ކްރިމިނަލް ކޯޓުގައި އޮތް މައްސަލަ ކުރިއަށް ނުގެންދިއުމަށް ވެސް އެމަނިކުފާނުގެ ފަރާތްޕުޅުން ވަނީ އެދިވަޑައިގެންފަ އެވެ.
Advertisement
This content is created and paid for by advertisers and does not involve Voice Journalists
