ކުރީގެ ރައީސް، އަދި އިދިކޮޅު ރިޔާސީ ކެންޑިޑޭޓް ރައީސް އަބްދުالله ޔާމީން އަބްދުލްގައްޔޫމް ގެ މިހާރު ކްރިމިނަލް ކޯޓާއި ހައިކޯޓުގައި ހިނގަމުންދާ މައްސަލަތައް ކުރިއަށް ގެންދަނީ ފަނޑިޔާރުން ކުޑަކަކޫ ޖައްސަވައި، ބިރު ދައްކަވައިގެން ކަމަށާ, އެކަން އެގޮތަށް ކުރައްވަނީ ޖުޑީޝަލް ސަރވިސް ކޮމިޝަންގެ ރައީސާ، ތުޅާދޫ ދާއިރާގެ މެންބަރު ހިސާން ހުސައިން ކަމަށް އިދިކޮޅުން ތުހުމަތު ކުރައްވައިފިއެވެ. 

ރ. ފުއްގިރި ކުއްޔަށް ދޫކުރުމުގެ މުއާމަލާތާއި ގުޅުވާ ރައީސް އަބްދުالله ޔާމީން އަބްދުލްގައްޔޫމުގެ މައްޗަށް އުފުލާފައިވާ ދައުވާތަކާއި ގުޅިގެން ކްރިމިނަލް ކޯޓުގައި ކުރިއަށްދާ ޝަރީޢަތްތައް "ފަރާސް ބަރިއެއްހެން" ފުލުފުލުން އެތައް ގަޑިއިރެއް ވަންދެން ކުރިއަށް ގެންދާތީ، އެކަމާއި ގުޅިގެން ހުރި ކަންބޮޑުވުންތަކާއިއެކު އިދިކޮޅުން އިއްޔެ އާއި މިއަދުވެސް ވަނީ ޖޭއެސްސީއާއި ރައީސް އޮފީހަށް ވަޑައިގެންފައެވެ. 

އެގޮތުން ރައީސް އޮފީހަށް ވަޑައިގެންނެވުމަށްފަހު މީޑިއާތަކަށް މައުލޫމާތު ދެއްވަމުން ނައިފަރު ދާއިރާގެ މެންބަރު އަހުމަދު ޝިޔާމް ވިދާޅުވީ، އިއްޔެވެސް 3 ޖަހަންދެން ރައީސް ޔާމީންގެ މައްސަލަ ކުރިއަށް ގެންގޮސްފައިވާއިރު، މިއަދުވެސް، ހައިކޯޓުގައި އެމަނިކުފާނުގެ ފަރާތްޕުޅުން ހުށަހެޅުއްވި އިސްތިއުނާފް މައްސަލަ ލަސް ކުރުމަށްފަހު ކްރިމިނަލް ކޯޓުގެ މައްސަލަ ކުރިއަށް ގެންދަވާ ކަމަށެވެ. އަދި އެއީ އެއްވެސް ގައުމެއްގައި ކަން ހިނގާ ގޮތް ނޫން ކަަންވެސް އޭނާ ފާހަގަކުރެއްވިއެވެ. 

Advertisement

ކަން މިހެން ހުރި ނަމަވެސް، ރައީސް ޔާމީންގެ ހައްގު ތަކަށް ބެއްލެވުމެއް ނެތި މުޅި ދައުލަތުން، ޚާއްސަކޮށް އަދުލުގެ ނިޒާމުން އެމަނިކުފާނަށް އަނިޔާވެރި ވަމުންދާތަން ފެންނަކަމަށް ޝިޔާމް ވިދާޅުވި އެވެ. 

އެހެންކަމުން، އިއްޔެވެސް ޖޭއެސްސީއަށް ވަޑައިގެންނެވި ކަމަށާ، ނަމަވެސް އިދިކޮޅު ފަރާތްތަކާއި ޖޭއެސްސީގެ އެއްވެސް އިސް މެންބަރެއް ބައްދަލު ނުކުރައްވާކަން ޝިޔާމް ފާހަގަކުރެއްވިއެވެ. އަދި އިދާރީ ގޮތުން އިސް ފަރާތަކާއި ބައްދަލުވެ ކަންބޮޑުވުން ހިއްސާކުރެވުނު ނަމަވެސް އެކަން އާޚިރުގައި ދާނީ ޖޭއެސްސީގެ ރައީސާ ހިސާންގެ އަރިހަށް ކަމަށް ޝިޔާމް ވިދާޅުވި އެވެ. 

ޝިޔާމް ވިދާޅުވީ، ހައިކޯޓުގެ މައްސަލަ އަވަސް ކޮށްދެއްވުމަށް އެދި އެވާހަކަ ދެއްކެވުމުން، ރައީސް ޔާމިންގެ މައްސަލަތައް އަވަހަށް ކުރިއަށްދާ ކަމަށް ހިސާން ވިދާޅުވާ ކަމަށެވެ. ނަމަވެސް، އަވަހަށް ކުރިއަށް ދަނީ ކްރިމިނަލް ކޯޓުގެ މައްސަލަ ކަމަށާ، ހަގީގަތުގައި އަވަހަށް ކުރިއަށް ދާން ޖެހޭނީ ދަށުކޯޓަށްވުރެ މަތީ ކޯޓުގެ މައްސަލަ ކަމަށް ޝިޔާމް ވިދާޅުވި އެވެ.