ރ. ފުއްގިރި މުއާމަލާތާއި ގުޅުވައި އިދިކޮޅު ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމް ގެ މައްޗަށް ކްރިމިނަލް ކޯޓުގައި ކުރިއަށްދާ ޝަރީއަތުގައި 13 ގަޑި އިރުވަންދެން ޕްލާސްޓިކް ގޮނޑިއެއްގައި އެމަނިކުފާނު ބައިންދަވާފައިވަނީ، ކެއުމާއި، ފާޚާނާ ކުރެއްވުމުގެ އިތުރުން ނަމާދު ކުރައްވަންވެސް ފުރުސަތު ނުދެއްވާ ކަމަށް އިދިކޮޅުން ބުނެފިއެވެ.
ރައީސް ޔާމީންއަށް ނުހައްގުން އަނިޔާ ކުރަމުންދާ ކަމަށް ވިދާޅުވެ، އިދިކޮޅު ޕީޕީއެމްގެ ލީޑަރުން މިއަދުވެސް ވަނީ އެޗްއާރުސީއެމް އަށް ވަޑައިގެންފައެވެ.
އެއަށްފަހު ނޫސްވެރިންނާއި ބައްދަލުކުރައްވައި ވާހަކަދައްކަވަމުން ޕީޕީއެމްގެ ނައިބު ރައީސް އަދި ރައްޔިތުންގެ މަޖިލީހުގެ ނައިފަރުދާއިރާގެ މެމްބަރު އަހުމަދު ޝިޔާމް ވިދާޅުވީ، ރައީސް ޔާމީން އަށް ގާނޫނުން ލިބިދޭ ހައްގެއް ނިގުޅައިގަނެ، އެމަނިކުފާނަށް ނުހައްގުން އަނިޔާވެރިވަމުންދާ ކަމަށާ، އެހެންނަމަވެސް އެޗްއާރުސީއެމް އަށް އެތަން ނުފެންފަ ކަމަށެވެ.
ގާނޫނު އަސާސީގައި އޮންނާނެ (ޝަރީއަތް ކުރިއަށްދާ އިރު) ވަގުތާއި ވަސީލަތްތައް ފޯރުކޮށްދޭން ޖެހޭނެ ކަމަށް. ރައީސް ޔާމީން ދަށު ކޯޓުގެ ޝަރީއަތުގެ މަޖިލީސް ތަކުގައި އިންނަވަނީ، 8 ފޫޓު 4 ފޫޓުގެ ގޮޅިއެއްގައި، ގިނި ކަންޏާ މާ އެކަނި. ކޮބާތޯ ވަސީލަތްތައް؟ ކޮންމެ ދުވަހަކު 13 ގަޑިއިރު 12 ގަޑިއިރު އެމަނިކުފާނުގެ ޝަރީއަތްތައް ކުރިއަށް ގެންދާއިރު ކޮބައިތޯ ވަސީލަތް؟ ކޮބައިތޯ އެމަނިކުފާނުގެ ގާނޫނީ ވަކީލުންނާ ވާހަކަ ދައްކާލާނެ ފުރުސަތެއް ވެސް އެބަ އޮތްތޯ؟ ނޫނީ ދިފާޢުވާން ތައްޔާރު ވުމަށްޓަކައި އެމަނިކުފާނަށް ވަގުތު އެބަ އޮތްތޯ؟
ޕީއެންސީގެ ނާއިބު ރައީސް އަހުމަދު ޝިޔާމް
ޝިޔާމް ވިދާޅުވީ، 13 ގަޑިއިރު ވަންދެން ޝަރީއަތެއް ދިގުލައި ދެންމުމަކީ ދުނިޔޭގެ ގައުމުތަކުގައި ކަންކަން ކުރަމުން އަންގަ ގޮތެއް ނޫން ކަމަށެވެ. އަދި ރައީސް ޔާމީން ބުރަކަށިފުޅުގެ އާލާސްކަންފުޅެއްގައި އުޅުއްވާއިރު، އެފަދައިން އިންނަންޖެހުމުން، އުނދަގޫވެގެން، ޚދު އެމަނިކުފާނު ވެސް ޝަރީއަތުގެ މަޖިލީހުގައި އެތައް ފަހަރަކު އެމަނިކުފާނަށް އެހާ ގިނައިރު އިންނަން އުނދަގޫ ވެވަޑައިގަންނަވާ ކަމަށް ވިދާޅުވެފައިވާ ކަން ޝިޔާމް ފާހަގަކުރެއްވިއެވެ. އޭނާ ވިދާޅުވީ ރައީސް ޔާމީންގެ ބުރަކަށިފުޅުގެ އާލާސްކަންފުޅާއި ގުޅޭ މައުލޫމާތުތައް ކަރެކްޝަންސްއާއި ދައުލަތާއި ވެސް ހިއްސާ ކުރައްވާފައިވާނެ ކަމަށެވެ. އަދި އެފަދަ ކަމަކާއި ގުޅިގެން ޝަކުވާއެއް ހުށަހަޅައިފިނަމަ އެ ހިސާބުން ޝަރީއަތް މެދު ކަނޑާލަައި ދެފަރާތާއި ވާހަކަ ދައްކައި، ދެ ފަރާތް އެއްބަސްވާ ގޮތަކަށް މެނުވީ ޝަރީއަތް ކުރިއަށް ނުގެންދެވޭނެ ކަމަށްވެސް ޝިޔާމް ވިދާޅުވި އެވެ.
އިދިކޮޅުން ބޭއްވި ނޫސްވެރިންގެ ބައްދަލުވުމުގެ ތެރެއިން--ފޮޓޯ/ ވޮއިސް
"ކީއްވެގެންތޯ އެޗްއާރުސީއެމް އަށް މިކަންކަން ނުފެންނަނީ؟ އެޗްއާރުސީއެމް އަށް މި ފެންނަނީ މީހަކު ކަންފަތް މަތީގައި ޖެހީމާ، އެއީ މީހަކަށް ލިބޭ އަނިޔާ ކަމަށް. މިއީ އަނިޔާ އަކަށް ނުވޭތޯ؟ ކިތައް ރައްޔިތުންގެ ހައްގުތޯ މި ގެއްލެނީ. ކިތައް ރައްޔިތުންގެ އުއްމީދާއި ގުޅިފައި ހުރި ބޭފުޅެއްތޯ ރައީސް ޔާމީން އަކީ. އިދިކޮޅު ސިޔާސީ ޕާޓީގެ ރިޔާސީ ކެންޑިޑޭޓް. އެމަނިކުފާނަށް ސައިކޮލޮޖިކަލީ ލިބޭ އަނިޔާއެއީ އަނިޔާ. އެޗްއާރުސީއެމަށް އެކަން ނޭނގެންޏާ އެއީ މައްސަލައެއް"
މިއަދުގެ ނޫސްވެރިންގެ ބައްދަލުވުމުގައި ވާހަކަދައްކަވަމުން ޕީއެންސީގެ ނާއިބު ރައީސް މުހައްމަދު ސައީދުވެސް ވަނީ، ރައީސް ޔާމީންގެ އަސާސީ ހައްގުތައް ނިގުޅައިގަނެ، އެމަނިކުފާނަށް އަނިޔާ ކުރަމުންދާކަން ފާހަގަކޮށް ކަންބޮޑުވުން ފާޅުކުރައްވާފައެވެ.
ރައީސް ޔާމީން ޕްލާސްޓިކް ގޮނޑިއެއްގައި ބައިންދާފައި، 13 ގަޑިއިރު ބޭންދީމާ، އެމަނިކުފާނު އަތް ހިއްލަވާލާފައި އެ ވިދާޅުވަނީ، ފާޚާނަ ކޮށްލަން ވަގުތެއް ނުދޭ، ފަރިއްކުޅުވަން ވަގުތެއް ނުދޭ، ނަމާދުކޮށްލަން ވަގުތެއް ނުދޭ. އަދި ތިމަން މަނިކުފާނުގެ ބުރަކަށީގައި މައްސަލައެއް އެބަހުއްޓޭ. 13 ގަޑިއިރު، 13 ގަޑިއިރު ރޮބަޓަކަށްވެސް ނީނދެވޭނެ 13 ގަޑިއިރު.
ސައީދު ވިދާޅުވީ، ރައީސް ޔާމީން ގެ ހައްގެއް ގެއްލިގެން، އެ މައްސަލަ ހައިކޯޓުގައި އިސްތިއުނާފު ކުރައްވާފައި ވަނިކޮށް، ދަށުކޯޓުގެ މައްސަލަ "އިންޖީނެއް ހެން ހިންގާލަމުންދާ" ކަމަށެވެ. އަދި ދަށު ކޯޓުގެ ބަދަލުގައި ހިންގަންޖެހޭނީ އިސްތިއުނާފް ކަމަށްވެސް ސައީދު ވިދާޅުވި އެވެ.
Advertisement
This content is created and paid for by advertisers and does not involve Voice Journalists
