ޗާގޯސްގެ ކަނޑުގެ މައްސަލައާއި ގުޅިގެން ގިނަ ތުހުމަތު ތަކެއް ސަރުކާރަށް އަމާޒުވަމުންދާ މިދަނޑިވަޅުގައި، ޝީޝެލްސްއާއި އެކުވެސް ރާއްޖޭގެ ކަނޑާއި ގުޅޭ އެއްބަސްވުންތަކެއްގައި ސޮއިކުރަމުން އަންނަ ކަމަށް އިދިކޮޅުން ތުހުމަތު ކޮށްފިއެވެ.
އިދިކޮޅުގެ ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމްގެ ޝަރީޢަތްތައް ކުރިއަށްދާ ގޮތާއިމެދު ހުރި ކަންބޮޑުވުންތަކާއިއެކު އިދިކޮޅު ލީޑާޝިޕްގެ ބޭފުޅުން މިއަދުވެސް ވަނީ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހާއި ބައްދަލު ކުރެއްވުމަށް ރައީސް އޮފީހަށް ވަޑައިގެންފައެވެ.
އެހެންނަމަވެސް ސީޝެލްސްގެ ވީއައިޕީއެއް ވަޑައިގެން އުޅުއްވާކަމަށްބުނެ މިއަދުވެސް ރައީސް ޞާލިހާއި ބައްދަލު ނުވެވޭނެ ކަމަށް އެ އޮފީހުން ބުނެފައިވާ ކަމަށް ޕީޕީއެމްގެ ނާއިބު ރައީސް އަހުމަދު ޝިޔާމް ވަނީ ނޫސްވެރިންނަށް މައުލޫމާތު ދެއްވާފައެވެ.
މިއާއެކު ޝިޔާމްގެ ވާހަކައިގައި އޭނާ ވަނީ، ދާދިފަހުން ދިވެހިރާއްޖެއާއި ސީޝެލްސްއާއި ދެމެދު ސޮއިކުރެވު އެއްބަސްވުންތަކާއި ގުޅޭގޮތުން އަލި އަޅުވާލައްވައި، އެ އެއްބަސްވުންތަކުގެ ތެރޭގައިވެސް ރާއްޖޭގެ ކަނޑާއި ގުޅޭ އެއްބަސްވުންތަކެއް ހިމެނޭކަމަށް މައުލޫމާތު ލިބިލައްވާފައިވާ ކަން ފާހަގަކުރައްވާފައެވެ. އަދި އެފަދަ "ޑީލެއް" ހައްދަވާފައިވަނީ ފޮރިން މިނިސްޓަރު އަބްދުالله ޝާހިދު ކަމަށްވެސް ޝިޔާމް ތުހުމަތު ކުރެއްވިއެވެ.
"ޝާހިދު އަމިއްލަފުޅު ޑީލް ތަކެއް ހައްދަވައިގެން ކަމަށް އަޅުގަނޑުމެންނަށް މި މައުލޫމާތު ލިބެނީ. އަނެއްކާވެސް ދިވެހިރާއްޖޭގެ ކަނޑުގެ މައްސަލައެއްގައި. މިހިރަ ފޮތިގަނޑުތައް ބަލާލީމާ. ވަރަށް ސްޓްރެޓެޖިކް ގުޅުމެއްގެ ވާހަކަ މިދައްކަނީ ސީޝެލްސްއާއެކީ. ސީޝެލްސްއާ އެކީގައި ކޮން ގުޅުމެއްތޯ ސްޓްރެޓެޖިކް އަޅުގަނޑުމެންގެ އޮންނަން ޖެހޭނީ؟ އަޅުގަނޑުމެންނަށް މި ލިބޭ މައުލޫމާތު ގައި، އަނެއްކާވެސް ކަނޑާއި ގުޅުންހުރި އެގްރީމެންޓް ތަކެއްގައި ސީޝެލްސްއާ އެކީގައި ސޮއިކުރެވިގެން މިދަނީ. އަނެއްކާވެސް ދިވެހި ރައްޔިތުންގެ، ދިވެހިރާއްޖޭގެ ސަރަހައްދުން ބައެއްގެ ވާހަކަ މިދެކެވެނީ."
ޝިޔާމް ވިދާޅުވީ، އެފަދަ ހުރިހާ "ޖަރީމާއެއް" ސަރުކާރުން ހިންގަމުންދަނީ ދިވެހިރައްޔިތުންނަށާއި، ރައްޔިތުންގެ މަޖިލީހަށް ވެސް ނާންގާ ކަމަށެވެ. އަދި އެކަމުގެ އެންމެ އަޑީގައި ހުންނަވަނީ ޝާހިދު ކަމަށާ، އެކަމާއި ގުޅޭ މާ ބޮޑު މައުލޫމާތެއް ރައީސް ޞާލިހަށްވެސް އެނގިވަޑައިނުގަންނަވާ ކަމަށެވެ. މިއާއެކު އޭނާ ވަނީ، އެނގިވަޑައިގެންނާއި، އެނގިވަޑައިނުގަންނަވާވެސް ރައީސް ޞާލިހު އަންނަނީ ދިވެހިންނަށް ގެއްލުމެއް ވާނެ ހުރިހާ ކަމެއް ކުރައްވަމުން ކަމަށް ވިދާޅުވި އެވެ.
ޝިޔާމް އިތުރަށް ވިދާޅުވީ، އިންސާފު ހޯދައި ކަންކަން ބަދަލު ކުރުމަށް ރައްޔިތުން މަގުމައްޗަށް ނުކުންނަން ޖެހިފައިވާ ކަމަށެވެ.
Advertisement
This content is created and paid for by advertisers and does not involve Voice Journalists
