ދަށްފެންވަރުގެ ސިޔާސީ ބަޔާންތައް ދޭ ކަމަށް ވާ ނަމަ، ހަމަ އެފެންވަރުގެ ޖަވާބަށް ހުރަހެޅެން ތައްޔާރަށް ހުރުމަށް ކުރީގެ ޑެޕިއުޓީ އިސްލާމިކް މިނިސްޓަރު އަދި މަޝްހޫރު ދީނީ ޢިލްމުވެރިޔާ އައްޝެއިޚު ޑރ. މުހައްމަދު ޤުބާދު ވިދާޅުވެއްޖެއެވެ. 

ގުބާދު މިފަދައިން ވިދާޅުވެފައި މިވަނީ، އިދިކޮޅު ޕީޕީއެމް/ޕީއެންސީން މަގުމަތީގައި އިހްތިޖާޖެއް ކުރަމުންދިޔަ ވަގުތުގައި، ޢަދާލަތު ޕާޓީގެ ޢިލްމުވެރިންގެ މަޖިލީހުގެ ނައިބު ރައީސް އަދި އެކްޓިވިސްޓް، ޑރ އިޔާޒް އަބްދުލް ލަތީފް އެ މަގުން، ސައިކަލުގައި ވަނިކޮށް، އިހްތިޖާޖުގެ ބައެއް ބައިވެރިން އޭނާއާ ދިމާކުރުމާއި ގުޅިގެން އެއީ ޢިލްމުވެރިންނަށް ފުރައްސާރަ ކުރުން ކަމަށް އެ ޕާޓީން ސިފަ ކުރުމާއި ގުޅިގެން، ކޮށްފައިވާ ފޭސްބުކް ޕޯސްޓެއްގައެވެ. 

އެގޮތުން ގުބާދުގެ ޕޯސްޓުގައި އެނާ ވަނީ، ދަށްފެންވަރުގެ ސިޔާސީ ބަޔާންތައް ދޭ ކަމަށް ވާ ނަމަ، ހަމަ އެފެންވަރުގެ ޖަވާބަށް ހުރަހެޅެން ތައްޔާރަށް ހުރުމަށް އެދިލައްވާފައެވެ. 

Advertisement

"މި ކަމުގައި ޢިލްމުވެރިންނަށް ވެސް އިސްތިނާއެއް ނުލިބޭނެއެވެ." ގުބާދު ވިދާޅުވި އެވެ. 

އިޔާޒުގެ ފަހަތުން އިދިކޮޅު އިހްތިޖާޖުގެ ބައިވެރިން ގޮސް ފުރައްސާރަ ކުރި ކުރުމަކީ، ދީނީ އިލްމުވެރިޔަކަށް ކުރި ފުރައްސާރަ ކަމަށް ސަރުކާރާއި ސަރުކާރު ކޯލިޝަން ބައިވެރިން ތެރޭ ހިމެނޭ ވަރަށް ގިނަބަޔަކު އަންނަނީ ސިފަކުރަމުންނެވެ. 

އެހެންނަމަވެސް، ސަރުކާރާއި ދެކޮޅު ފަރާތްތަކުން ބުނަމުން އަންނަނީ އިޔާޒަށް ކުރި ފުރައްސާރަ އަކީ، އޭނާއަކީ ޢިލްވެރިއެއް ކަމަށް ވުމުން ކުރި ފުރައްސާރައެއް ނޫން ކަމަށެވެ. އަދި، އޭނާ އަކީ ދީނީ ޢިލްމު ކިޔަވައިގެން ހުންނެވި ބޭފުޅެއް ނަމަވެސް، ރާއްޖޭގެ ސިޔާސީ މައިދާނުގައި، އޭނާ އަކީ ސިޔާސީ އެކްޓިވިސްޓެއް ކަމަށާ، މީސްމީޑިއާގައި، ސިޔާސީ މީހުންނަށް ބަހުގެ ހަމަލާތައް އަމާޒުކުރައްވާ، ތާއީދު ކުރައްވާ ލީޑަރަށް ސަނާ ކިޔުމުގައި އިޒާޔަޒަކީ އަރާހުންނެވި އެކްޓިވިސްޓެއް ކަމަށް އެފަރާތްތަކުން ބުނެއެވެ. 

އަދި މިވަގުތު ރާއްޖޭގެ ސިޔާސީ މަޝްރަހު އޮތް ގޮތުން، ސިޔާސީ ފަރާތްތަކަށް ފުރައްސާރަ ކުރުން ފަދަ ދަށު ދަރަޖައިގެ ކަންކަން ކުރުމަކީ އާއްމު ކަމަކަށްވެފައިވާއިރު، ސިޔާސީ އެކްޓިވިސްޓެއް ނަމަ އެފަދަ ދަށު ދަރަޖައިގެ އަމަލުތަކަށް ހުށަހެޅޭނެ ކަމަށް ގަބޫލު ކުރަންޖެހޭނެ ކަމަށްވެސް ބައެއް ފަރާތްތަކުން އަންނަނީ ބުނަމުންނެވެ. އަދި އެއީ އިލްމުވެރިއަކަށް ކުރި ފުރައްސާރަ އެއް ނޫން ކަންވެސް އެފަރާތްތަކުން އަންނަނީ ބުނަމުންނެވެ.