ވެރިންނަށް އަމާޒުކޮށްގެން ބޮމުގެ ހަމަލާތައް ދިނުމަކީ ޖޯކު ޖަހާވަރަށް ވުރެ ބޮޑެތި މައްސަލަތަކެއްކަން މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އަށް ވިސްނުނީ އެ ޕާޓީގެ ރައީސް މުޙައްމަދު ނަޝީދުގެ ފުރާނަފުޅު ދުއްވާލުމަށް އެފަދަ ނުރައްކާތެރި ހަމަލާއެއް ދިނުމުންކަމަށް ރައްޔިތުންގެ މަޖިލީހުގެ މަހިބަދޫ ދާއިރާގެ މެމްބަރު އަހުމަދު ތާރިގު ވިދާޅުވެއްޖެ އެވެ.
ތާރިގު މިފަދައިން ވިދާޅުވެފައިވަނީ އެމަނިކުފާނު ފޭސްބުކުގައި ލިޔުއްވި ޕޯސްޓެއްގަ އެވެ.
ތާރިގު ވިދާޅުވީ 2015 ވަނަ އަހަރު ރައީސް އަބްދުالله ޔާމީން އަބްދުލްގައްޔޫމު އެމަނިކުފާނުގެ އާއިލާއާ އެއްކޮށް ދަތުރުކުރައްވަމުން ދިޔަ ރިޔާސީ ލޯންޗުކޮޅު ގޮއްވާލުމަށް ބޮމެއް ގޮއްވާލި ހާދިސާއަށް އޭރު އިދިކޮޅުގައި އޮވެގެން އެމްޑީޕީން ޖޯކު ޖަހާފައިވާ ކަމަށެވެ.
އެ ހާދިސާގެ މުހިންމުކަން ނުވަތަ ހައްސާސްކަން ކުޑަކުރުމަށް އެކި ޝައްކުތައް އުފައްދާ ސުވާލުތައް ކުރަމުން ގެންދިޔަ ކަމަށެވެ.
އެހެން ނަމަވެސް އެމްޑީޕީގެ ވެރިކަމުގައި، އެ ޕާޓީގެ ލީޑަރު މުޙައްމަދު ނަޝީދަށް އެފަދަ ހަމަލާއެއް އަމާޒުވުމުން، ބޮން ގޮއްވާލައިގެން މީހެއްގެ ފުރާނަ ދުއްވާލުމަށް ދޭ ހަމަލާތަކަކީ ޖޯކު ޖަހަން ހެޔޮވާވާރުގެ ހަމަލާތަކެއް ނޫންކަން އެމީހުންނަށް ވެސް ވިސްނުނުކަމަށް ތާރިގު ވިދާޅުވި އެވެ.
"2015 ވަނަ އަހަރުގައި ހިނގި ރިޔާސީ ލޯންޗްގެ ހާދިސާ އެމްޑީޕީ މީހުންނަށް މުހިއްމުކަމަކަށް ނުވިއެވެ. ޖެހީޖޯކެވެ. އުފެއްދީ ޝަައްކެވެ. 2021 ގެ 6 މޭގައި ބޮމެއް ގޮއްވާލީމަ އެނގުނީ އެއީ ޖޯކުޖަހާވަރަށްވުރެ ސީރިއަސްކަމެއްކަމެވެ"
މަހިބަދޫ މެމްބަރު ތާރިގު
ބޮން ގޮއްވާލި ހާދިސާއިން ތާރިގު މިސާލު ނެންގެވީ ރައީސް އޮފީހުގެ ޗީފް އޮފް ސްޓާފު އަލީ ޒާހިރަށް ކުރެވޭ ތުހުމަތުތައް ޖުމްހޫރީ ޕާޓީން މީގެ ކުރިން ދިފާއު ކުރަމުން ދިޔަ ނަމަވެސް ޕާޓީގެ ރައީސް ޤާސިމް އިބްރާހިމްގެ ފަޅެއް ވިއްކާލުމަށް އަލީ ޒާހިރު ހުރަސްއެޅުމާއި ގުޅިގެން އޭނާއަށް ޖޭޕީން ފާޑުކިޔަން ފެށުމާއި ގުޅިގެން ނެވެ.
ތާރިގު މިފަދައިން ވިދާޅުވީ އަލީ ޒާހިރާއި ގުޅޭގޮތުން މީގެކުރިން އިދިކޮޅުން ކުރަމުން ދިޔަ ތުހުމަތުތައް އޭރު ޖޭޕީން ގަބޫލު ނުކުރި ނަމަވެސް މިހާރު އަމިއްލައަށް އެކަން ތަޖުރިބާ ކުރަން ޖެހުމުން ޤަބޫލުކޮށް، އަލީ ޒާހިރަށް ފާޑުކިޔުން ވެސް އަމާޒުކުރަމުންދާކަން ހާމަކުރުމުގެ ގޮތުންނެވެ.
"އަލީ ޒާހިރު ކިޔާމީހަކު ފަނޑިޔާރުންނަށް ގުޅާ، ނިޒާމު ގަޑުބަޑު ކުރާވާހަކަ، އަދި ރައީސް ޔާމީންގެ ޝަރީއަތަށް ނުފޫޒު ފޯރުވާކަމަށް 2020 ވަނަ އަހަރުން ފެށިގެން ޕީޕީއެމުން ދައްކަމުން އާދެއެވެ. ޖުމްހޫރީ ޕާޓީގެ ލީޑަރުގެ ފަޅެއް ވިއްކުން އަލީޒާހިރު ހުއްޓުވީމާ، ޖުމްހޫރީންނަށް އަލީ ޒާހިރުގެ ފޮޓޯ ފެނިއްޖެ"
މަހިބަދޫ މެމްބަރު ތާރިގު
ރައީސް އޮފީހުގެ ޗީފް އޮފް ސްޓާފުގެ މަޤާމުގައި ހުންނަވާ އަލީ ޒާހިރު ރައީސް ޔާމީންގެ މައްސަލަތަކަށް ނުފޫޒު ފޯރުވާކަމަށް އިދިކޮޅު ފަރާތްތަކުން ދަނީ ތުހުމަތު ކުރަމުންނެވެ. ވަކިން ޚާއްސަކޮށް އޭނާ މެދުވެރިވެގެން ރައީސް ޔާމިނުގެ މައްސަލަތައް ބައްލަވާ ފަރާތްތަކަށް ރިޝްވަތު ހުށައަޅާ ކަމަށާއި، ގާޒީން ނިންމަވާ ނިންމުންތައް ބަދަލުކުރުމަށް މަސައްކަތް ކުރާކަމުގެ ތުހުމަތުތައް ވެސް އިދިކޮޅުން ކުރެއެވެ.
Advertisement
This content is created and paid for by advertisers and does not involve Voice Journalists
