އިއްޔެ ކުރިއަށް ދިޔަ ޑަބްލިޔުޑީސީގެ ބައި އިލެކްޝަންއިން ފެނިގެން ދިޔައީ ރައީސް އަބްދުالله ޔާމީނުގެ ޒައާމަތަކަށް ރައްޔިތުން ފެންބޮވައިގެންފައި އޮތްވަރު ކަމަށް އިދިކޮޅު އިއްތިހާދުގައި ހިމެނޭ ޕީއެންސީގެ ރައީސް އަބްދުއްރަހީމް (އަދުރޭ) ވިދާޅުވެއްޖެއެވެ.

އަދުރޭ މިހެން ވިދާޅުވީ، އަންހެނުންގެ ކޮމިޓީގެ ބައި-އިލެކްޝަންގައި 8 ރަށުގެ ތެރެއިން 5 ރަށުގެ ގޮނޑި ޕީޕީއެމްއިން ކާމިޔާބު ކުރުމާ ގުޅިގެންނެވެ.

އިދިކޮޅު ކޯލިޝަނުން ރޭ ބޭއްވި ހާއްސަ ޖަގަހަ ޖަލްސާގައި، ބައި-އިލެކްޝަން ކާމިޔާބު ކުރެއްވި ފަރާތްތަކަށް ތަހުނިޔާ ކިޔަމުން އަދުރޭ ވިދާޅުވީ މިއަދަކީ އުންމީދީ ދުވަހެއް ކަމަށެވެ.

ދިރުމެއް ތަނެއްގައި އުންމީދު އޮންނާނެކަން ފަހުގެ ތާރީހުގައި ސާބިތު ކޮށްދެއްވި ބޭފުލަކީ ރައީސް ޔާމީނު ކަމަށާއި އެ ދިރުން ވާކަން މިއަދު ހާމަވެއްޖެ ކަމަށް އަދުރޭ ވިދާޅުވިއެވެ.

"މިއަދަކީ މި ސަރުކާރަށް ރަނގަޅު ފިލާވަޅެއް ލިބިގެން ދިޔަ ދުވަހެއް. ސަރުކާރުގެ އާރާބާރާ ނުފޫޒާ މި ހުރިހާ އެއްޗަކާ ދެކޮޅަށް ދިވެހި ރައްޔިތުން ބުނީ، ތިމަންނަމެން ބޭނުންވަނީ ރައީސް ޔާމީން ވެރިކަމަށް ގެންނާށޭ. އެއީ މިއަދުގެ ނަތީޖާއަކީ" ބައި އިލެކްޝަންގެ ނަތީޖާއަށް އިޝާރާތް ކުރައްވަމުން އަދުރޭ ވިދާޅުވިއެވެ.

އެ ނަތީޖާއިންވެސް އެނގިގެން ދަނީ ރައްޔިތުން ރައީސް ޔާމީނުގެ ޒައާމަތަކަށް ފެންބޮވައިގެންފަ އޮތް މިންވަރު ކަމަށާއި ދިވެހި ގައުމަށް ސަރުކާރުން ދެމުންދާ އަނިޔާއަށް ދިވެހި ރައްޔިތުން ފާޅުގައި ނޫނެކޭ ބުނި އަޑު އިވިގެން ދިޔަ ކަމަށް އަދުރޭ ވިދާޅުވިއެވެ.

މީގެ އިތުރުން އަދުރޭ ވިދާޅުވީ، ބައި އިލެކްޝަންގެ ނަތީޖާ އަކީ ރައީސް ޔާމީނު ރިޔާސީ އިންތިހާބު ކާމިޔާބު ކުރައްވާނެ ކަމުގެ އަލިގަދަ ހެއްކެއް ކަމަށެވެ.

އިއްޔެ ބައި އިލެކްޝަންގެ ވޯޓު ލާފައި ވަނީ ލ. މާމެންދޫ، އއ. ފެރިދޫ، ހދ. ފިނޭ، މ. ވޭވަށް، ރ. އަނގޮޅިތީމު، ކ. ދިއްފުށި، ތ. ގާދިއްފުށި، ގދ. ހޯޑެއްދޫ އަންހެނުންގެ ތަރައްގީއަސް މަސައްކަތް ކުރާ ކޮމިޓީގެ މެމްބަރުން ހޮވުމަށެވެ.

އޭގެ ތެރެއިން މާމެންދޫ، ފިނޭ، ވޭވަށް، ދިއްފުށި އަދި ހޯޑެއްދޫގެ ގޮނޑި ކާމިޔާބު ކޮށްފައި ވަނީ ޕީޕީއެމްގެ ފަރާތުން ކުރިމަތިލި ކެނޑިޑޭޓުންނެވެ.