ކުރިއަށް އޮތް ރިޔާސީ އިންތިހާބުގައި ޔާމީން ނުހޮވިއްޖެނަމަ އަނދިރިއަނދިރިންގެ ދުވަސްވަރަށްވުރެ ހަޑިކޮށް ރައްޔިތުންނާމެދު އަމަލު ކުރާނެ ކަމަށް ކުރީގެ ހޯރަފުށީ ދާއިރާގެ މަޖިލިސް މެމްބަރު މުހައްމަދު އިސްމާއީލް ވިދާޅުވެއްޖެއެވެ.

އޭނާ މިހެން ވިދާޅުވީ، ރޭ ޕްރެގޮސްރެސިވް ކޮންގްރެސް ކޯލިޝަނުން ކުރިއަށް ގެންދިޔަ ހާއްސަ ޖަގަހަ ޖަލްސާގައި ވާހަކަ ދައްކަވަމުންނެވެ.

މުހައްމަދު އިސްމާއީލް ވިދާޅުވީ، ކުރިއަށް އޮތް ރިޔާސީ އިންތިހާބުގައި ރައީސް ޔާމީނު ހޮވުމަށް 'ހެސް ކިޔާފައި' މަސައްކަތް ކުރަން ޖެހޭނެ ކަމަށެވެ. އެހެން ނޫން ނަމަ ތާރީހުގައި އަނދިރި އަނދިރިންގެ ދުވަސްވަރު ލިޔެފައި އޮތް ގޮތަށްވުރެ ހަޑިކޮށް ރައްޔިތުންނާމެދު ސަރުކާރުން އަމަލު ކުރާނެ ކަމަށެވެ.

"މިހާރު ގަދަކަމުން ރައްޔިތުމީހާ ހިފަހައްޓާފަ ކަރަށް ރާ ނާޅާކަން. ގަދަކަމުން އަންހެން ކަނބަލުން ހިފާ ހައްޔަރުކޮށް ރޭޕްކުރާ ވާހަކައެއް އަޅުގަނޑުމެންނަށް އެބަ ދެކެވޭ. އެ ޒަމާނުގަ ކަންހިނގާ ދިޔަ ގޮތުގެ ވާހަކަ އަޅުގަނޑުމެންނަށް ތާރީހުން ފެންނަން ހުރި ވާހަކަތައް މި ދައްކަނީ" މުހައްމަދު އިސްމާއީލް ވިދާޅުވިއެވެ.

އޭނާ ވިދާޅުވީ، އެހިސާބަށް މިގައުމު ދިއުމުން، އޭރު ބޮޑުތަކުރުފާނު ކުރެއްވި މަސައްކަތް މިހާރު ކުރަން ޖެހިފައިވާ ކަމަށެވެ. އެގޮތުން ޖަލުވައިވާ "ބޮޑުތަކުރުފާނު" މިނިވަން ކުރަން ޖެހޭ ކަމަށް މުހައްމަދު އިސްމާއީލް ވިދާޅުވިއެވެ.

އެހެންނޫން ނަމަ މި ގައުމު ރަނގަޅަށް ބިނާ ނުކުރެވޭނެ ކަމަށް އޭނާ ވިދާޅުވިއެވެ