އިދިކޮޅު ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމް ޖަލަށް ލައިގެން އަނިޔާ ކުރައްވަމުންދާ ކަމަށް ބުނެ، އެކަމާއި ގުޅިގެން ހުރި ކަންބޮޑުވުންތައް ހިއްސާ ކުރުމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހާއި ބައްދަލު ކުރަން އިދިކޮޅު ލީޑަރޝިޕް ދިޔަ ހަތަރު ވަނަ ދުވަހުވެސް އެ ބޭފުޅުންނާއި ރައީސް ޞާލިހް ބައްދަލު ނުކުރައްވާ ކަމަށް ބުނެފިއެވެ.
ރައީސް ޞާލިހާއި ބައްދަލުކުރެއްވުމަށް ރައީސް އޮފީހަށް ވަޑައިގެންނެވުމަށްފަހު، ނޫސްވެރިނާއި ބައްދަލު ކުރައްވައި ވާހަކަ ދައްކަވަމުން, އިދިކޮޅު ހިންގެވުމާއި މިވަގުތު ހަވާލުވެ ވަޑައިގެން ހުންނެވި އަބްދުއްރަހީމް އަބްދުالله ވިދާޅުވީ، ރާއްޖޭގެ އިދިކޮޅުގެ އެންމެ ބޮޑު ސިޔާސީ ޕާޓީން ރައީސުލްޖުމްހޫރިއްޔާ އާއި ބައްދަލުކުރަން ވަޑައިގެންނެވުމުން ކޮންމެ ދުވަހަކުވެސް ކޮންމެވެސް ބަހަނާއެއް ދެއްކެވުމަށް ފަހު ފިއްލަވާ ކަމަށެވެ.
އަދުރޭ ވިދާޅުވީ، މި ވެރިކަން ނިމެން ދެން އޮތީ އެންމެ 80 ވަރަކަށް ދުވަސް ކަމަށާ އެއަށްފަހު ދެން ރައީސް އޮފީހުގައި އިންނަވާނީ ރައީސް ޔާމީން ކަމަށެވެ. އަދި އެކަން, އިއްޔެ ބޭއްވުނު ބައި އިލެކްޝަންސްގެ ނަތީޖާއިންވެސް އެނގިގެން ގޮސްފައިވާ ކަމަށާ، ރައްޔިތުން މިހާރު ވަނީ މިސަރުކާރަށް ނޫނެކޭ ބުނެފައި ކަމަށްވެސް އަދުރޭ ވިދާޅުވިއެެވެ.
އަދުރޭ ވިދާޅުވީ، އިދިކޮޅުން ރައީސް ޞާލިހާއި ބައްދަލު ކުރައްވަން ވަޑައިގަންނަވަނީ ސަރުކާރާއިމެދު ރައްޔިތުންގެ ގިނަ ކަންބޮޑުވުންތަކެއް ހުރެގެން ކަމަށެވެ. އަދި އިދިކޮޅު ޕާޓީން އެ ކަންބޮޑުވުންތަކާއި އެކު ރައީސުލްޖުމްހޫރިއްޔާގެ އަރިހަށް ވަޑައިގެންނެވުމުން ބައްދަލުކުރައްވަން ޖެހޭނެކަމަށްވެސް އޭނާ ވިދާޅުވި އެވެ.
އަޅުގަނޑުމެން އައީމާ، ޖަވާބުދާރީވާ ސަރުކާރެއް ކަމަށްވަންޏާ، ޒިންމާ ނެންގެވޭ ރައީސުލްޖުމްހޫރިއްޔާ އެއް ކަމަށް ވަންޏާ ޖެހޭނެ އަޅުގަނޑުމެންނާ ބައްދަލު ކުރަން. އެ ހިތްވަރު ހުންނަން ވާނެ. އަޅުގަނޑުމެންގެ ސުވާލުތަކަށް ޖަވާބުދެވެން ވާނެ. ކެރުން ތެރިކަން ހުންނަންވާނެ. އެކަންކަން ނެތީވިއްޔާ، އިސްތިއުފާ ދެއްވާފައި ވަޑައިގަތުމަށްވުރެ ރަނގަޅީ ކޮން ގޮތެއްތޯ މިއަދު އަޅުގަނޑުމެންނަށް؟. ރައްޔިތުން އެންމެ ބޭނުންވާ ގޮތް އެއީ. ރައްޔިތުން ބޭނުމެއް ނޫން މިކަހަލަ ސްލޯ ސަރުކާރެއް އޮންނާކަށް.
ޕީއެންސީގެ ރައީސް އަބްދުއްރަހީމް އަބްދުالله
އަދުރޭ ވިދާޅުވީ، ސަރުކާރެއް ހިންގަޗާނެ ބާރުމިނާއި، "ސްޕީޑް" ރައީސް ޔާމީން ވަނީ ރައްޔިތުންނަށް ދައްކަވާފައި ކަމަށެވެ. އެ ތަސައްވުރު އެމަނިކުފާނު ކުރަހައިދެއްވާފައިވާއިރު, ރައީސް ޞާލިހުގެ މި ސަރުކާރުން ކަންކުރައްވަމުން އަންނަނީ އޭގެ އިދިކޮޅަށް ވަރަށް "ސްލޯކޮަށް" ކަމަށެވެ.
އަދި ރައްޔިތުންގެ ހުރި ކަންބޮޑުވުންތައް ރައީސް ޞާލިހާއި ހިއްސާ ކުރެވެންދެން ރައީސް އޮފީހަށް ދާނެ ކަމަށްވެސް އަދުރޭ ވިދާޅުވިއެެވެ.
Advertisement
This content is created and paid for by advertisers and does not involve Voice Journalists
