ކުރިއަށް އޮތް ރިޔާސީ އިންތިހާބުގައި ރައީސް އިބްރާހިމް މުހައްމަދު ޞާލިހު ވާދަ ނުކުރެއްވުމުގެ ފުރުސަތު އެބައޮތް ކަމަށް އިދިކޮޅު ކޯލިޝަނުން ބުނެފިއެވެ.

އިދިކޮޅުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ރައްޔިތުންގެ މަޖިލީހުގެ މަޑުއްވަރީ ދާއިރާގެ މެންބަރު އާދަމް ޝަރީފް އުމަރު ވިދާޅުވީ މި ސަރުކާރުން ޣައިރު ގާނޫނީ ވަރަށް ގިނަ ކަންތައްތަކެއް ކުރަމުންދާ ކަމަށެވެ. 

ރައްޔިތުންގެ މަޖިލީހުގަ ދެކެވިފަ ހުރި ވާހަކަތަކަށް ބަލާއިރު، މިހާރުވެސް އިބްރާހިމް މުހައްމަދު ޞާލިހަކީ ރައީސުލް ޖުމްހޫރިއްޔާ ކަމުގެ ޝަރުތު ހަމަވާ ބޭފުޅެއް ނޫން ކަމަށް އާދަމް ޝަރީފް ވިދާޅުވިއެވެ.

Advertisement

އާދަމް ޝަރީފް ވިދާޅުވީ، އެމްޑީޕީގެ އެތެރޭގައި ހަމަނުޖެހުންތައް އޮތުމާއި، ގާނޫނު އަސާސީގައި ކަނޑައެޅިގެން ރައީސަކަށް ހުންނަވާ މީހެއްގެ ހުންނަންވާނެ ޝަރުތުތަކުގެ ތެރެއިން އެއް ޝަރުތު އުނިވެފަ ވާކަމަށް ގަބޫލު ކުރެވޭތީ، ރައީސް ޞާލިހު އިންތިހާބުގައި ވާދަ ނުކުރެއްވުމުގެ ފުރުސަތު އެބައޮތް ކަމަށެވެ.

"އެއީ ސުންނީ މުސްލިމެއްގެ ގޮތުގައި ހުންނެވި ބޭފުޅެއްތޯ، އެ ސުވާލު ރައްޔިތުންގެ މަޖިލީހުގަ ވަނީ އުފައްދާފަ." އާދަމް ޝަރީފް ވިދާޅުވިއެވެ.

އިއްޔެ ބޭއްވި ޑަބްލިޔުޑީސީގެ އިންތިހާބުން 11 ގޮނޑިން އަށް ގޮނޑި ޕީޕީއެމްއަށް ލިބުމުން  އޭގެން ދައްކުވައިދެނީ ރައީސް އަބްދުالله ޔާމީނަށް ރައްޔިތުން ބޮޑު ތާއީދެއް ކުރާކަން ކަމަށާއި ރައީސް ޞާލިހަށް ނޫނެކޭ ބުނާކަން ކަމަށް އާދަމް ޝަރީފް ވިދާޅުވިއެވެ.

އަދި އޭގެން އެނގެނީ މި ސަރުކާރާމެދު ރައްޔިތުންގެ މެދުގައިވާ ނުތަނަވަސްކަން ކަމަށް އާދަމް ޝަރީފް ވިދާޅުވިއެވެ.