ރައްޔިތުން މަޖިލީހުގެ ރައީސް މުހައްމަދު ނަޝީދު މަޖިލީހުގެ އިމްތިޔާޒަށް އަރައިގެންފައިވާ ކަމަށް ބުނެ ވެރިކަންކުރާ އެމްޑީޕީގެ ފަރާތުން އިންތިޔާޒާބެހޭ މައްސަލަ އެއް މަޖިލީހަށް ހުށަހަޅައިފިއެވެ.
މި މައްސަލަ މަޖިލީހަށް ހުށަހެޅުއްްވީ މަރަދޫ ދާއިރާގެ މެންބަރު އިބްރާހިމް ޝަރީފް (ވަމޯޓާ) އެވެ.
ޝަރީފް މަޖިލީހަށް ހުށަހެޅި މައްސަލައިގައި ބުނެފައި ވަނީ މަޖިލީހުގެ ނައިބު ރައީސް އީވާ އަބްދުاللهގެ އިތުބާރު ނެތްކަމުގެ މައްސަލައިގެ ނޯޓިސް ހަމަވުމަށްފަހު އެންމެ އަވަހަށް ބާއްވާ ޖަލްސާއަށް އެކަން އެޖެންޑާކުރަންޖެހޭ ކަމަށާއި، އެ ޖަލްސާގެ ރިޔާސަތު ބަލަހައްޓަން ޖެހޭނީ މަޖިލީހުގެ ރައީސް ކަމަށް ގަވައިދުގައި ބުނެފައިވާ ކަމަށެވެ. ނަމަވެސް މަޖިލީހުގެ ރިޔާސަތާއި ނަޝީދު ހަވާލުނުވެ، އެދުވަހުވެސް އިންނެވީ މަޖިލީހުގެ ބޭރުގައި ކުޑަ ދަށުގައި ކަމަށާ، ޖަލްސާގައި ބައިވެރިވެ ވަޑައިގަތުމަށް އުޒުރުވެރިވި ނަމަވެސް ރައީސްގެ ހައިސިއްޔަތުން އެހެން ކަންކަމުގައި ބައިވެރިވެ ވަޑައިގަންނަވާ ކަމަށް ޝަރީފް ވިދާޅުވި އެވެ.
އެފަދައިން ކަންކުރައްވައި މަޖިލީހުގެ ޖަލްސާތަކަށް އެމަނިކުފާނު ހުރަސް އަޅުއްވާފައިވާ ކަން ފާހަގަކުރައްވައި ޝަރީފް ވިދާޅުވީ، މަޖިލީހުގެ ޖަލްސާ ތަކަށް ހުރަސް އެޅުމަކީ މުޅި މަޖިލީހުގެ އިމްތިޔާޒަށް އަރައިގަތުން ކަމަށެވެ.
"މިއަދާ ހަމައަށްވެސް ރައްޔިތުންގެ މަޖިލީހުގެ ރައީސް އެ ޖަލްސާގެ ރިޔާސަތު ބަލަހައްޓަވަން އިންކާރު ކުރައްވައި، ރައްޔިތުންގެ މަޖިލީހުގެ އިމްތިޔާޒަށް ވަނީ އަރާވަޑައިގެން މަޖިލިސް ގަވާއިދާ ގާނޫނުއަސާސީއާ ހިލާފަށް އަމަލު ކުރައްވާފަ،" އޭނާ ވިދާޅުވި އެވެ.
ނަޝީދު މަޖިލީހުގެ އިމްތިޔާޒަށް އަރައިގެންފައިވާ ކަމަށް ބުނާ މައްސަލައިގެ ބަހުސް ކުރަން ފެނޭތޯ ބެލުމަށް ނެގި ވޯޓްގައި އެމައްސަލައަށް ބަހުސް ކުރަން ފެންނަކަމަށް 37 މެންބަރުން ވޯޓް ދެއްވިއެވެ. ބަހުސް ކުރަން ނުފެންނަ ކަމަށް ވޯޓް ދެއްވީ 13 މެންބަރުންނެވެ.
އެއާއެކު މައްސަލައިގެ ބަހުސް ވަނީ މަޖިލީހުގައި ފަށާފައެވެ.
Advertisement
This content is created and paid for by advertisers and does not involve Voice Journalists
