Advertisement
އިދިކޮޅުން ފޮނުވި ސިޓީ؛ ރައީސްގެ ފަރާތްޕުޅުން ޔާމީނަށް އަނިޔާ ލިބޭނަމަ މައްސަލަ ކަމާބެހޭ ފަރާތަށް ހުށަހަޅުއްވާ: ރައީސް އޮފީސް
އިދިކޮޅުން އިއްޔެ ރައީސް ޞާލިހަށް ލިޔުއްވި ސިޓީއަށް ހަވާލާދީ ރައީސް އޮފީހުން ފޮނުއްވާފައިވާ ސިޓީގައި ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހުގެ ފަރާތްޕުޅުން ކުރީގެ ރައީސް އަބްދުﷲ ޔާމިން އަބްދުލްޤައްޔޫމްއަށް އަނިޔާއެއް ލިބޭކަމަށް ގަބޫލުކުރާނަމަ އެކަން ކަމާބެހޭ މުއައްސަސާއަކަށް ހުށަހަޅުއްވުމަށް އެ އޮފީހުން މިއަދު ވިދާޅުވެއްޖެއެވެ.
އިދިކޮޅުން އިއްޔެ ރައީސް ޞާލިހާއި ބައްދަލުކުރައްވަން ވަޑައިގެންނެވުމުން، ރައީސް އޮފީހުން ވަނީ ރަސްމީ ޕްރޮޓޮކޯލްއިން ރައީސް ސޯލިހަށް ސިޓީ ލިބިވަޑައިނުގަންނަވާ ކަމަށް އަންގަވާފައެވެ. އެހެންކަމުން އެ އޮފީހުގައި ތިއްބަވައިގެން، އިދިކޮޅުންް ވަނީ ރައީސް ޞާލިހުއަށް އެޑްރެސް ކުރައްވައި ސިޓީއެއް ލިޔުއްވާފައެވެ.
އިދިކޮޅު ކޯލިޝަނާއި މިވަގުތު ހަވާލުވެވަޑައިގެން ހުންނެވި ޕީއެންސީގެ ރައީސް އަބްދުއްރަހީމް އަބްދުالله ގެ ނަމުގައި ލިޔުއްވާފައިވާ އެ ސިޓީގައި ބުނެފައިވަނީ، އިދިކޮޅުން ރައީސް ޞާލިހާއި ބައްދަލުކުރެއްވުމަށް އަންނަނީ ރައްޔިތުންގެ ހުރި ގިނަ ކަންބޮޑުވުންތަކާއި އެކުގައި ކަމަށެވެ.
"އޭގެ ތެރޭގައި ދިވެހިރާއްޖޭގެ އެންމެ ގިނަ ރައްޔިތުންގެ ތާއީދު ލިބިވަޑައިގެން ހުންނެވި އިދިކޮޅު ލީޑަރ އަދި ރިޔާސީ ކެންޑިޑޭޓް މަނިކުފާނު (ރައީސް ޞާލިހު) އިސްވެހުރެ އަނިޔާ ކުރަމުންދާތީ އާއި، އެމަނިކުފާނު (ރައީސް ޔާމީން) ޖަލުގައި ބާއްވައިގެން، ދިވެހި މަސްކަނޑުތަކާއި، ދިވެހިރާއްޖޭގެ ބިން ބިމާއި، މިނިވަންކަން ވިއްކާލައި، ރައްޔިތުން އަޅުވެތިކުރަމުންދާތީ އާއި، ދައުލަތުގެ ތިން ބާރުން އެއް ބާރު ކަމުގައިވާ، ގާނޫނު ހެދުމުގެ ބާރު (ރައްޔިތުންގެ މަޖިލީސް) ހުއްޓުމަކަށް މަނިކުފާނު ގެނެސްފައިވުމާއި، އަދި ރައްޔިތުންނަށް ޖަވާބުދާރީ ނުވެ، ރައްޔިތުންނަށް ފިއްލަވައިގެން އުޅުއްވާތީއާއި މިފަދަ އެތައް ކަމެއް ހުރުމުންނެވެ."
އަދުރޭގެ އެ ސިޓީގައި ވަނީ ރައީސް ޞާލިހާއި ބައްދަލުކުރެއްވުމަށް އެދި އެތައް ސިޓީއެއް މީގެ ކުރިންވެސް ފޮނުއްްވާފައިވާ ކަން ފާހަގަކުރައްވާފައެވެ. އެހެންކަމުން ވީހާވެސް އަވަހަށް ރައީސް ޞާލިހާއި ބައްދަލުކުރެވޭނެ ގޮތެއް ހަމަޖައްސައިދިނުމަށް ވަނީ އެދިލައްވާފައެވެ.
މިސިޓީއަށް ހަވާލާދީ ރައީސް އޮފީހުގެ ޗީފް އޮފް ސްޓާފް އަލީ ޒާހިރުގެ ނަމުގައި ލިޔުއްވާފައިވާ ސިޓީގައި ވިދާޅުވެފައިވަނީ އިދިކޮޅުގެ ސިޓީގައި ބަޔާންކުރައްވާފައިވާ ވާހަކަތަކަކީ އެއްވެސް ހަޤީޤަތެއްގެ މައްޗަށް ލިޔުއްވާފައިވާ ވާހަކަތަކެއް ކަމަށް ރައީސުލްޖުމްހޫރިއްޔާ ދެކެވަޑައިނުގަންނަވާ ކަމަށެވެ.
މިއާއިއެކު ރައީސް ޔާމީން މިހާރު ތަންފީޒުކުރައްވަމުން ގެންދަވަނީ ޝަރުއީ ކޯޓަކުން އެމަނިކުފާނުގެ މައްޗަށް އިއްވާފައިވާ ޙުކުމެއް ކަމަށާއި މި ޙުކުމާއި ރައީސް ޞާލިހާއި އެއްވެސް ގުޅުމެއް ނެތުމުގެ އިތުރުން އެއްވެސް މީހަކަށް އަނިޔާއެއް ދިނުމަކީ ރައީސް އިސްވެ ހުންނަވައިގެން ކުރައްވާނެ ކަމެއް ނޫން ކަމަށް ސިޓީގައި ވަނީ ވިދާޅުވެފައެވެ.
މީގެ އިތުރުން ރައީސް ޔާމީން ޝަރުއީ ހުކުމެއް ތަންފީޒު ކުރައްވަމުން ގެންދަވާއިރު އަދި ޙުކުމެއްގެ އިސްތިއުނާފުގެ މަރުހަލާ މިހާރު ހިނގަމުންދާއިރު އެފަދަ ކަމެއްގެ ތެރެއަށް ރައީސް ޞާލިހު ވަދެވަޑައިގެން އެކަމާއި ގުޅޭގޮތުން އެއްވެސް ބަޔަކާއި ބައްދަލުކުރެއްވުމަކީ ހަމަ ޖެހޭގޮތެއް ނޫންކަން އަބްދުއްރަހީމްވެސް ގަބޫލްކުރައްވާނެ ކަމަށް ރައީސް ޔަގީންކުރައްވާ ކަމަށް ސިޓީގައިވެއެވެ.
"ރައީސުލްޖުމްހޫރިއްޔާ ގެ ފަރާތްޕުޅުން އެއްވެސް މީހަކަށް އަނިޔާއެއް ލިބޭކަމަށް ގަބޫލުކުރައްވާނަމަ އެ މައްސަލައެއް ކަމާބެހޭ މުއައްސަސާއަކަށް ހުށަހަޅުއްވައިގެން ޝަރުއީ މަރުހަލާގެ ތެރެއިން ކުރިއަށް ވަޑައިގަތުމަށްް ދަންނަވަން ރައީސުލްޖުމްހޫރިއްޔާ ވިދާޅުވިއެވެ."
ސިޓީ ނިންމާލަމުން ރައީސް އޮފީހުން ވިދާޅުވިއެވެ.
އިދިކޮޅު ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމް ޖަލަށް ލައިގެން އަނިޔާ ކުރައްވަމުންދާ ކަމަށް ބުނެ، އެކަމާއި ގުޅިގެން ހުރި ކަންބޮޑުވުންތައް ހިއްސާ ކުރުމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހާއި ބައްދަލު ކުރަން އިދިކޮޅު ލީޑަރޝިޕުން މިއަދާއި ލައިގެން ޖެހިޖެހިގެން ފަސް ދުވަހު ވަނީ ރައީސް އޮފީހަށް ވަޑައިގަންނަވާފައެވެ.
Advertisement
Advertisement
Advertisement
This content is created and paid for by advertisers and does not involve Voice Journalists
