ރައްޔިތުންގެ މަޖިލީހުގައި "މަރުތަޅު" އަޅުވާ މަޖިލީހުގެ މަސައްކަތްތައް ހުއްޓުވާފައި އޮތް މައްސަލައާ އެކު އިދިކޮޅު (ޕީޕީއެމް-ޕީއެންސީ) ކޯލިޝަންގެ މެމްބަރު މަޖިލީހުގެ ރައީސް މުޙައްމަދު ނަޝީދާއި ބައްދަލުކުރައްވައިފި އެވެ. 

ރައްޔިތުންގެ މަޖިލީހުގެ މިއަދުގެ ޖަލްސާއެއް ތާވަލުކޮށްފައި ނެތް ނަމަވެސް އިދިކޮޅު ކޯލިޝަނަށް ނިސްބަތްވާ މެމްބަރުން ވަނީ މަޖިލީހަށް ވަޑައިގެންފަ އެވެ. 

ރައްޔިތުންގެ މަޖިލީހުގައި އެ މެމްބަރުންގެ އަޑު ނުއިއްވޭ ކަމަށާއި، ރައްޔިތުން ހަވާލުކޮށްފައިވާ މަސްއޫލިއްޔަތުތަށް އަދާ ނުކުރެވޭކަން ފާހަގަކޮށް އެ މެމްބަރުން ވަނީ މެމްބަރުންގެ ގޮނޑިކޮޅު މަޖިލީސް ކުރާ ގެކޮޅުން ނެރެ ގޯތި ތެރޭގައި ބަހައްޓާފަ އެވެ. އަދި އެ ގޮޑިކޮޅުތައް މަޖިލީހުން ނެރެ ރައީސް އޮފީހަށް ގެންދިއުމަށް ވެސް މެމްބަރުން ވަނީ މަސައްކަތް ކޮށްފަ އެވެ. 

Advertisement

ފަރެސްމާތޮޑާ ދާއިރާގެ ގޮނޑި މަޖިލީހުން ނެރުމަށް އެ ދާއިރާގެ މެމްބަރު މަސައްކަތް ކުރައްވަނީ 

އިދިކޮޅު މެމްބަރުން ވަނީ މަޖިލީހުގެ މަސައްކަތްތައް ހުއްޓުވާފައި އޮތުމުން ކަންބޮޑުވުން ފާޅުކުރައްވާފަ އެވެ. 

އެގޮތުން އެ މެމްބަރުން ވިދާޅުވީ މަޖިލީހުގެ މަސައްކަތްތައް ކުރިއަށް ގެންދިއުމަށް މަޖިލީހުގެ މެޖޯރިޓީ ލީޑަރު ގޮތް ދޫކުރައްވަން ޖެހިވަޑައިގަންނަވާ ކަމަށެވެ. އަދި އެ ނޫންގޮތަކަށް މަޖިލީހުގެ މަސައްކަތްތައް ކުރިއަށް ނުގެންދެވޭނެކަމަށް މަޖިލީހުގެ މައިނޯރިޓީ ލީޑަރު އަހުމަދު ސަލީމު ވަނީ ވިދާޅުވެފަ އެވެ. 

މަޖިލީހުގެ އިދިކޮޅު މެމްބަރުން ނޫސްވެރިންނަށް މައުލޫމާތު ދެއްވުން 

އިދިކޮޅު މެމްބަރުންގެ ހުރި ކަންބޮޑުވުންތައް މީޑިއާއާއި ހިއްސާކުރުމަށް ފަހު، އެ މެމްބަރުން ވަނީ އިދިކޮޅުގެ ހުރި ކަންބޮޑުވުންތަކާއެކު މަޖިލީހުގެ ރައީސް މުޙައްމަދު ނަޝީދާއި ބައްދަލުކުރައްވާފަ އެވެ. އަދި އިދިކޮޅުގެ އޮތް ކަންބޮޑުވުން މަޖިލީހުގެ ރައީސް މުޙައްމަދު ނަޝީދާއި ހިއްސާކުރައްވާފަ އެވެ. 

އިދިކޮޅު މެމްބަރުން ރައީސް ނަޝީދާއި ބައްދަލުކުރެއްވުން 

މަޖިލީސް ހުއްޓިފައި އޮތް އޮތުމުގެ ސަަބަބުން ސަރުކާރު ޖަވާބުދާރީ ކުރުވުމަށް މަޖިލީސް މެމްބަރުންނަށް ގާނޫނުން މަތިކޮށްފައި އޮތް ޒިންމާތަކަށް ވަރަށް ބޮޑަށް ހުރަސްއެޅިފައިވާކަން އިދިކޮޅުން ދަނީ ފާހަގަކުރަމުންނެވެ. 

މަޖިލީސް ތަޅުއަޅުވާފައި އޮތް އޮތުން ނިމުމަކަށް ގެނެސް މަޖިލީހުގެ މަސައްކަތްތައް ކުރިއަށް ގެންދެވޭނެ މަގު ފަހިކޮށްދިނުމަށް އިދިކޮޅުން ވަނީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހަށް ގޮވާލައްވާފަ އެވެ.