މާލޭގެ ރައްޔިތުންނަށް ބޯހިޔާވަހިކަން ކަށަވަރު ކޮށްދިނުމަށް މިސަރުކާރުން ފެށި ބިންވެރިޔާ ސްކީމްގެ ގޯތި ލިބޭ ލިސްޓުގައި، އިންޑިއާއަށް ނިސްބަތްވާ އެހެން މީހަކުވެސް ހިމެނޭކަން ހާމަވެއްޖެއެވެ. 

އެގޮތުން ގޯތި ލިބޭ ލިސްޓުގައި ހިމެނުނު މީހާއަކީ ދަފްތަރު ނަންބަރު ދރ 3033، މުހައްމަދު ނަޒީރު ކިޔާ މީހެކެވެ. އޭނާ ނަން ވަނީ ގޯތި ލިބޭ މީހުންގެ ލިސްޓުގެ 3300 ވަނާގައެވެ. 

މުހައްމަދު ނަޒީރު އަކީ ގިނަ ވިޔަފާރިތަކެއް ހިންގާ މީހެކެވެ. އެގޮތުން، އޭނާގެ ނަމުގައި ޕެރަމައުންޓް ހޮޓެލް އާއި، އަލީ ނަޒީރު ކޮންސްޓްރަކްޝަން އާއި, ނިޔު ސަމުދުރާ ސްޕާ އާއި، ޕްލާޒާ ރެޑް އެޕަލް ނަމަކަށް ކިޔާ ވިޔަފާރިތަކެއް އަންނަނީ ހިންގަމުންނެވެ. 

Advertisement

މުހައްމަދު ނަޒީރު، ރާއްޖޭގެ ރަށްވެއްސެއްގެ ގޮތުގައި މިހާރު ހުއްޓަސް، އޭނާ އަކީ ދިވެއްސަކާއި އިނދެގެން އުޅޭ އިންޑިއާއަށް ނިސްބަތްވާ މީހެއްކަން "ވޮއިސް" އަށް ވަނީ ކަށަވަރުވެފައެވެ. 

މުހައްމަދު ނަޒީރު 

މުހައްމަދު ނަޒީރުގެ އިތުން އެހެން އިންޑިޔާ މީހަކަށްވެސް ގޯތި ލިބުނުކަން ހާމަވެ ގިނަ ބައެއްގެ ފާޑުކިޔުންތައް ސަރުކާރަށް އަންނަނީ އަމާޒު ވަމުންނެވެ. އެގޮތުން، ގޯތި ލިބިފައިވަނީ، މއ. މަލިކުވިއު، ހަބީބު ރަހިމާން މުހައްމަދު ހަނީފާ ނަމަކަށް ކިޔާ މީހެކެވެ. އޭނާ ވަނީ ޝަރުތުހަމަވާ، އިތުރު މީހަކާ ޖޮއިންވުމުން ގޯތި ލިބުމުގެ ފުރުސަތު ލިބޭ ބައިގައި ހިމެނިފައެވެ.

އެހެންނަމަވެސް، ހަބީބުގެ ނަން ލިސްޓުގައި އޮތީ އޮޅުމަކުން ކަމަށާ، ދާއިމީ ލިސްޓު އާންމު ކުރާއިރު އެކަންކަން އިސްލާހު ކުރާނެ ކަމަށް ޕްލޭނިންގ މިނިސްޓްރީން ވަނީ ބުނެފަ އެވެ.

ގޯތި ލިސްޓު އެކުލަވާލުމުގައި ކޮރަޕްޝަންގެ އެއްވެސް އަމަލެއް ނުހިމެނޭނެ ކަމުގެ ޔަގީންކަން ޕްލޭނިން މިނިސްޓަރު މުޙައްމަދު އަސްލަމް ދެއްވި ނަމަވެސް، ލިސްޓަށް ބަލާއިރު އެއީ ވަކި ފަރާތުން އަންގައިގެން ތައްޔާރުކޮށްފައިވާ، ލިސްޓެއްކަމަށް އިދިކޮޅު ފަރާތްތަކުން ދަނީ ތުހުމަތު ކުރަމުން ނެވެ.