މަޖިލީހުގެ ރައީސް އަދި ކުރީގެ ރައީސް މުޙައްމަދު ނަޝީދާއި އެމަނިކުފާނުގެ ބައިވެރިން ރައްޔިތުންގެ މަޖިލީހުގެ އިމްތިޔާޒަށް އަރައިގަނެފައިވާ މައްސަލަ ޝަރީޢަތަށް ހުށައަޅަން ޖެހޭ ކަމަށް މަރަދޫ ދާއިރާގެ މެމްބަރު އިބްރާހިމް ޝަރީފް ވިދާޅުވެއްޖެއެވެ.
ޝަރީފް މިހެން ވިދާޅުވެފައިވަނީ އޭނާ މިއަދު ކުރެއްވެވި ޓްވީޓެއްގައެވެ.
ޝަރީފްގެ ޓްވީޓުގައި ވިދާޅުވެފައިވަނީ މަޖިލިސް ރައީސް ކަމުގައި ހުންނެވި ރައީސް މުޙައްމަދު ނަޝީދާއި އެމަނިކުފާނުގެ ބައިވެރިން މަޖިލިސް ހިސޯރުކޮށް އެކި ބަހަނާ ދައްކަވައިގެން ޖަލްސާ ތަކަށް ހުރަސްއަޅައި، މެމްބަރުންގެ އިމްތިޔާޒަށް އަރައިގަނެފައިވާ ކަމަށާއި އަދި އެ މައްސަލަ ތަހްޤީޤު ކޮށް ޝަރީޢަތަށް ހުށައަޅަން ޖެހޭ ކަމަށްވެސް ވިދާޅުވި އެވެ.
"މަޖިލިސްގެ އިމްތިޔާޒަށް އެއްވެސް ފަރާތަކުން އަރައިގަތުމަށް ފުރުސަތު ދެވިގެން ނުވާނެ، މިފަދަ ކަންކަން އަޅައި ނުލައި ދޫކޮށްލާނަމަ ޤާނޫނުގެ ބާރު ކެނޑި ޤައުމު ބޮއްސުންލައިގެން ހިނގައިދާނެ، އަދި ވެރިކަމުގެ އަދި މަޖިލިސް ރައީސް މަގާމުގެ ބޭނުން ނަހަމަ ގޮތުގައި ބޭނުންކުރުމުގެ ދޮރު ހުޅުވިގެންދާނެ" ޝަރީފް ވިދާޅުވެފައިވެއެވެ.
ޝަރީފް މިހެން ވިދާޅުވެފައިވާއިރު ރައްޔިތުންގެ މަޖިލީހުގެ ޖަލްސާ މިވަގުތު އޮތީ ޗުއްޓީގައެވެ. ނަމަވެސް ދައުރުން ބޭރުގައި މަޖިލީހުގެ ޖަލްސާއެއް ބޭއްވުމަށް ވަނީ މަސައްކަތް ކޮށްފައެވެ. ނަމަވެސް ޖަލްސާ ރަނގަޅަށް ނުވެސް ފެށިގެން އުޅެނިކޮށް މަޖިލިސް ވަނީ ހުއްޓިފައެވެ.
މަޖިލީހުގެ ރައީސާއި ނައިބު ރައީސްގެ އިތުބާރުނެތް ކަމުގެ މައްސަލަ މަޖިލީހަށް ހުށައެޅިފައިވާއިރު މަޖިލިސް ޗުއްޓީ އަށް ގޮސްފައިވަނީ އެ މައްސަލަތައް ކުރިއަށް ނުގެންދެވިހުއްޓައެވެ.
Advertisement
This content is created and paid for by advertisers and does not involve Voice Journalists
