ބޯހިޔާވަހިކަމަށް ބޭނުންޖެހިފައި ތިިބި އެތައް ބަޔަކު ހިޔާ ފްލެޓުތަކަށް ކުރިމަތިލާފައި އޮއްވާ އެ ފްލެޓުތައް އެ ފަރާތްތަކަށް ނުދިނީ މި ސަރުކާރުން ކަމަށް މާލޭ ސިޓީގެ ކުރީގެ މޭޔަރު ޝިފާ މުޙައްމަދު ވިދާޅުވެއްޖެ އެވެ. 

ޝިފާ މިފަދައިން ވިދާޅުވެފައިވަނީ ސަރުކާރުގެ ބިންވެރިޔާ ސްކޯމުގެ ދަށުން ގޯތި ލިބުނު ވަރަށް ނިކަމެތި ފަރާތެއްގެ ވާހަކަ ހިއްސާކޮށް ލިޔެފައިވާ ރިޕޯޓެއް ހިއްސާކުރައްވާ ކުރެއްވި ޓްވީޓެއްގަ އެވެ. 

އެމީހާއަށް އިޝާރާތްކޮށް ޝިފާ ވިދާޅުވީ، މި ސަރުކާރުގެ ބިންވެރިޔާ ސްކީމަށް ކުރިމަތިލި ބޯހިޔާވަހިކަމަށް ބޭނުންޖެހިފައިވާ ކިތަންމެ ބަޔަކު ހިޔާ ފްލެޓުތަކަށް ވެސް ކުރިމަތިލި ކަމަށެވެ. 

ހިޔާ ފްލެޓުތަކަކީ ހަދާ ނިންމާފައިވާ ތަންތަނަށް ވީ ނަމަވެސް އެ ފަރާތްތަކަށް އެ ފްލެޓުތައް ނުދީ މި ސަރުކާރުން ބަހާލާފައިވާކަމަށް ޝިފާ ވިދާޅުވި އެވެ. 

ހިޔާ ފްލެޓުތައް ބެހުމުގެ މަސައްކަތް ފްލެޓު ކޮމެޓީން ކުރިއަށް ގެންގޮސްފައިވާ ގޮތަށް ވެސް މާލޭ ސިޓިގެ ކުރީގެ މޭޔަރު ޝިފާ ވަނީ ބޮޑެތި ފާޑުކިޔުންތަކެއް އަމާޒުކުރައްވާފަ އެވެ. 

ޝިފާ މިފަދައިން ވިދާޅުވެފައިވާއިރު ފްލެޓު ކޮމެޓީއިން ހިޔާ ފްލެޓުތައް ބަހާފައިވާ ގޮތަށް ބަލާއިރު ކޮރަޕްޝަން އެކުލެވޭ އެތައް ކަމެއް ފާހަގަވާތީ އޭސީސީއަށް ގިނަ މައްސަލަތަކެއް ވެސް އޭރު ހުށައެޅިއެވެ. 

ކުރީ ސަރުކާރުން ފްލެޓު ލިބޭ މީހުންގެ ލިސްޓު އެކުލަވާލާ، ހިޔާ ފްލެޓުތައް ލިބޭނެކަމަށް ލިޔުން ހަވާލުކޮށްފައި ވަނިކޮށް، ސަރުކާރު ބަދަލުވި ހިސާބުން، ފްލެޓު ކޮމެޓީ އުފައްދާ ކުރިން ފްލެޓު ލިބިފައި ތިބި އެތައް ބަޔަކު ލިސްޓުން އުނިކޮށް، ހައްގުވެރި ނޫން އެތައް ބަޔަކަށް ފްލެޓުތައް ދީފައިވާ އެތައް މައްސަލައެއް ވެސް ވަނީ ފެންމަތިވެގެން ގޮސްފަ އެވެ. 

އޭގެ އިތުރުން މި ސަރުކާރުގެ ބިންވެރިޔާ ސްކީމުގެ ދަށުން ރާއްޖޭގެ އެންމެ އަގުބޮޑެތި ބިންތައް ހިލޭ ބަހާލުމަށް ނިންމުމާއި ގުޅިގެން، ހިޔާ ފްލެޓުތަކުން ކުލި ދެއްކުން ހުއްޓާލުމުގެ މަޝްވަރާތަކެއް ވެސް މިހާރު ވަނީ ފަށާފައެވެ.